വയനാട് പനമരത്ത് മേയാനായി വയലില്‍ കെട്ടിയ പോത്തിനെ കടുവ കൊന്നു. പൂതാടി പഞ്ചായത്തിലെ ചീങ്ങോട് അയനിമല രാജേഷിന്റെ പോത്തിനെയാണ് ഇന്നലെ രാവിലെ പത്തരയോടെ കടുവ പിടിച്ചത്.

4 പോത്തുകളെ കെട്ടിയിരുന്ന വയലില്‍ ശബ്ദംകേട്ടു സ്ഥലത്തെത്തിയ വീട്ടുകാര്‍ ബഹളം വച്ചതോടെ കടുവ വനത്തിലേക്കു കയറി. ഒന്നര വയസ്സ് പ്രായവും ഒന്നര ക്വിന്റല്‍ തൂക്കമുള്ള പോത്തിനെ കൊന്ന് 6 മീറ്റര്‍ ദൂരം വലിച്ച് കൊണ്ടുപോയിരുന്നു.

പോത്തിനെ പിടിച്ച വലിയ കൊഴുത്ത കടുവയുടെ ദേഹത്ത് വരയുണ്ടെന്നും വീട്ടുകാര്‍ പറഞ്ഞു. പാതിരി സൗത്ത് സെക്ഷനില്‍പെട്ട ഈ പ്രദേശത്ത് അടുത്തിടെയായി വന്യമൃഗ ശല്യം രൂക്ഷമാണ്. ആന, പന്നി തുടങ്ങിയവ ജനവാസ കേന്ദ്രങ്ങളില്‍ ഇറങ്ങുന്നത് നിത്യ സംഭവമാണെന്നും എന്നാല്‍, കടുവ ഇറങ്ങി പോത്തിനെ പിടിച്ചത് ആദ്യമായാണെന്നും പ്രദേശവാസികള്‍ പറഞ്ഞു.

കടുവയെ നിരീക്ഷിക്കുന്നതിന് ഈ ഭാഗത്ത് ക്യാമറ സ്ഥാപിക്കുമെന്നും ഉടമയ്ക്ക് അര്‍ഹമായ നഷ്ട പരിഹാരം നല്‍കുമെന്നും സ്ഥലത്തെത്തിയ പുല്‍പള്ളി സ്റ്റേഷനിലെ വനപാലകരും കേണിച്ചിറ പൊലീസും പൂതാടി പഞ്ചായത്ത് അധികൃതരും ഉറപ്പ് നല്‍കി.