ഗള്‍ഫില്‍നിന്ന് വരുന്നവര്‍ ഏഴ് ദിവസം ഇന്‍സ്റ്റിറ്റിയൂഷനല്‍ ക്വാറന്റീനിലും ഏഴ് ദിവസം ഹോം ക്വാറന്റീനിലും ഇരിക്കണമെന്ന് സര്‍ക്കാര്‍ കര്‍ശനമായി നിര്‍ദേശിക്കുമ്പോഴും കോഴിക്കോട് ജില്ലയിലുണ്ടാകുന്ന നിരീക്ഷണ കാലാവധിയിലെ പാളിച്ച പ്രതിരോധ പ്രവര്‍ത്തനങ്ങള്‍ക്ക് വെല്ലുവിളിയാവുകയാണ്.

ഇന്നലെ കോവിഡ് ബാധിച്ച് മരിച്ച കോഴിക്കോട് മാവൂര്‍ സ്വദേശിനി സുലൈഖ ഗള്‍ഫില്‍നിന്നെത്തി സര്‍ക്കാര്‍ ക്വാറന്റീനില്‍ കഴിഞ്ഞത് രണ്ട് ദിവസം മാത്രമാണ്. മെയ് ഇരുപതാം തീയതി ഭര്‍ത്താവിനൊപ്പം റിയാദില്‍നിന്നു കണ്ണൂര്‍ അന്താരാഷ്ട്ര വിമാനത്താവളത്തിലെത്തിയ ഇവര്‍ 23-ാം തീയതി വരെ മാത്രമാണ് കോഴിക്കോട്ടെ സ്വകാര്യ ടൂറിസ്റ്റ് ഹോമില്‍ സര്‍ക്കാര്‍ ക്വാറന്റൈനില്‍ കഴിഞ്ഞത്.

ഭര്‍ത്താവിനൊപ്പമായിരുന്നു ഇവര്‍ വിമാനത്താവളത്തില്‍ എത്തിയതെങ്കിലും ഹൃദ്രോഗിയായ ഭര്‍ത്താവിനെ ആശുപത്രിയിലേക്ക് കൊണ്ട് പോയതോടെ ഇവരെ വീട്ടിലേക്ക് പോവാന്‍ അനുവദിക്കുകയായിരുന്നു. ഇത് മാവൂര്‍ പഞ്ചായത്ത് അധികൃതരോ ആരോഗ്യ വിഭാഗമോ അറിഞ്ഞിട്ടുമുണ്ടായിരുന്നില്ല. തുടര്‍ന്ന് 25-ാം തീയതി ലക്ഷണങ്ങള്‍ കണ്ടതിനെ തുടര്‍ന്ന് മെഡിക്കല്‍ കോളേജ് കോവിഡ് ഐസൊലേഷന്‍ വാര്‍ഡിലാക്കുകയും ഇന്ന് മരിക്കുകയുമായിരുന്നു.

സ്ത്രീയും ഇവരുടെ ഭര്‍ത്താവും ഒരുമിച്ചാണ് ക്വാറന്റീനില്‍ കഴിഞ്ഞത്. ഇവരും ഹൃദ്രോഗിയാണ്. ഇദ്ദേഹത്തിനും കഴിഞ്ഞ ദിവസം കോവിഡ് സ്ഥിരീകരിച്ചിട്ടുണ്ട്. പെരുന്നാള്‍ സമയത്താണ് ഇവര്‍ വീട്ടിലെത്തിയത്. ഇതോടെ ഇവരുമായി ബന്ധപ്പെട്ടുവെന്ന് കരുതുന്ന മക്കള്‍ അവരുടെ കുടുംബം എന്നിവരും ക്വാറന്റീനിലാണ്.

മെയ് 21ന് കണ്ണൂര്‍ വിമാനത്താവളത്തിലെത്തി വീട്ടില്‍ നിരീക്ഷണത്തിലായിരുന്നു സുലൈഖ. മെയ് 25 ന് രോഗലക്ഷണം കണ്ടതിനെ തുടര്‍ന്ന് കോഴിക്കോട് മെഡിക്കല്‍ കോളേജ് ആശുപത്രിയില്‍ സ്രവ പരിശോധന നടത്തുകയായിരുന്നു. ബുധനാഴ്ചയാണ് ഫലം പോസിറ്റീവായത്.

കോഴിക്കോട് ജില്ലയിലെ ആദ്യത്തെ കോവിഡ് മരണമാണിത്. മലപ്പുറം, കണ്ണൂര്‍, വയനാട് സ്വദേശികള്‍ നേരത്തേ കോഴിക്കോട്ട് ചികിത്സയിലിരിക്കേ മരിച്ചിരുന്നു.

അതേസമയം, ജില്ലയില്‍ ഞായറാഴ്ച രണ്ട് കോവിഡ് പോസിറ്റിവ് കേസുകള്‍ കൂടി റിപ്പോര്‍ട്ട് ചെയ്തതായും നാല് പേരുടെ ഫലം നെഗറ്റിവായതായും ജില്ല മെഡിക്കല്‍ ഓഫിസര്‍ ഡോ. വി. ജയശ്രീ അറിയിച്ചു. 23 വയസ്സുള്ള കൊടുവള്ളി സ്വദേശിനിയാണ് രോഗം സ്ഥിരീകരിച്ച ഒന്നാമത്തെയാള്‍.മേയ് 18 ന് ഖത്തറില്‍ നിന്ന് കോഴിക്കോട്ടെത്തി വീട്ടില്‍ നിരീക്ഷണത്തില്‍ കഴിയുകയായിരുന്നു. മേയ് 30 ന് കോഴിക്കോട് മെഡിക്കല്‍ കോളജില്‍ സ്രവ പരിശോധന നടത്തുകയും കോവിഡ് പോസിറ്റിവ് ആവുകയും ചെയ്തു. ശനിയാഴ്ച ഇവരുടെ ഒരു വയസ്സുള്ള കുഞ്ഞിന് കോവിഡ് സ്ഥിരീകരിച്ചിരുന്നു.

രണ്ടാമത്തെയാള്‍ 36 വയസ്സുള്ള കല്ലാച്ചി നാദാപുരം സ്വദേശിയാണ്. മേയ് 27 ന് ദുബൈയില്‍ നിന്ന് വിമാനമാര്‍ഗം കണ്ണൂരിലെത്തി സര്‍ക്കാര്‍ സജ്ജമാക്കിയ വാഹനത്തില്‍ വടകര കൊറോണ കെയര്‍ സെന്ററില്‍ നിരീക്ഷണത്തിലായിരുന്നു. രോഗലക്ഷണങ്ങള്‍ കണ്ടതിനെ തുടര്‍ന്ന് മേയ് 29ന് കോഴിക്കോട് മെഡിക്കല്‍ കോളജില്‍ പ്രവേശിപ്പിച്ചു. രണ്ട് പേരുടേയും ആരോഗ്യനില ഇപ്പോള്‍ തൃപ്തികരമാണ്.

ജില്ലയില്‍ കോവിഡ് ചികിത്സയിലുണ്ടായിരുന്ന നാല് പേര്‍ ഞായറാഴ്ച രോഗമുക്തരായി. മെഡിക്കല്‍ കോളജില്‍ ചികിത്സയിലായിരുന്ന മൂന്ന് പേരും കോവിഡ് ഫസ്റ്റ് ലൈന്‍ ട്രീറ്റ്മെന്റ് സെന്ററില്‍ ഒരാളുമാണ് രോഗവിമുക്തരായത്. ഇപ്പോള്‍ 34 കോഴിക്കോട് സ്വദേശികള്‍ കോവിഡ് പോസിറ്റിവായി ചികിത്സയിലുണ്ട്.

ഞായറാഴ്ച 257 സ്രവ സാമ്പിള്‍ പരിശോധനക്ക് അയച്ചിട്ടുണ്ട്. ആകെ 4,993 സ്രവ സാമ്പിളുകള്‍ പരിശോധനക്ക് അയച്ചതില്‍ 4,683 എണ്ണത്തിന്റെ ഫലം ലഭിച്ചു. ഇതില്‍ 4,600 എണ്ണം നെഗറ്റിവ് ആണ്. പരിശോധനക്കയച്ച സാമ്പിളുകളില്‍ 310 പേരുടെ പരിശോധന ഫലം കൂടി ലഭിക്കാന്‍ ബാക്കിയുണ്ട്