കേരളത്തെ അകെ ഞെട്ടലിലാഴ്ത്തിയ കൊലപാതകം ആയിരുന്നു കൊല്ലം അഞ്ചലിൽ ഭര്ത്താവ് ഭാര്യയെ പാമ്പിനെകൊണ്ട് കടിപ്പിച്ച് കൊന്നത്. ഒത്തിരിയേറെ വാദപ്രതിവാദങ്ങൾ നിലനിൽക്കുന്ന ഈ സാഹചര്യത്തിൽ തനിക്കുണ്ടായ ഒരു അനുഭവം വെളിപ്പെടുത്തികൊണ്ട് രംഗത്തേക്ക് എത്തിയിരിക്കുകയാണ് ജോമോൾ ജോസെഫ്. പാമ്പിനെ ഉപദ്രവിച്ചാൽ പാമ്പ് എത്ര കാലം കഴിഞ്ഞാലും പകവീട്ടാനായി വരും, ആ പക പാമ്പിന്റെ തലമുറകളിലൂടെ പകർന്ന് മനുഷ്യരുടെ പുതുതലമുറകളിലെ ആളുകളിലേക്ക് വരെയെത്തിനിൽക്കുന്ന തരത്തിൽ ഡിസൈൻ ചെയ്യപ്പെട്ട ഒരു കടുത്ത അന്ധവിശ്വാസം. പാമ്പിനെ പേടിയുള്ള ബഹുഭൂരിപക്ഷം ആളുകളും ഈ അന്ധവിശ്വാസത്തിനൊപ്പം മാത്രമേ നിൽക്കൂ, അതിപ്പോൾ വിദ്യാഭ്യാസം നേടിയവരായാലും സർപ്പവിശ്വാസമില്ലാത്തവരായാലും, പാമ്പിനെ പേടിയുള്ളവര് പൊതുവായി തന്നെ സർപ്പകോപത്തെ അംഗീകരിച്ചേക്കാം- എന്നും ജോമോൾ പറയുന്നുണ്ട്.

പാമ്പും വിശ്വാസവും

കുറച്ച് വർഷങ്ങൾക്ക് മുമ്പ് ഞങ്ങൾ അഞ്ചലിലെ മാർബിൾ, ഗ്രാനൈറ്റ്സ് ആന്റ് ടൈൽസ് ഷോറൂമിന്റെ കൺസ്ട്രക്ഷൻ കറാറെടുത്ത് ചെയ്യുന്ന സമയം. പണികൾ അവസാനഘട്ടത്തിലെത്തി, ഫിനിഷിങ് ജോലികൾ നടക്കുന്ന സമയം. സന്ധ്യയായപ്പോൾ വർക്ക് സൈറ്റിൽ പാമ്പിനെ കാണുന്നു, നല്ല വിഷമുള്ള അണലിയാണ്. ഷോറൂമിന്റെ ഓണർ പാമ്പിനെ കൊല്ലാമെന്ന് പറഞ്ഞപ്പോൾ, അവിടെ ജോലിചെയ്യുന്ന സ്ത്രീകളടക്കമുള്ള ജീനവനക്കാർ പാമ്പിനെ കൊല്ലാൻ സമ്മതിക്കുന്നില്ല. അവർ വിശ്വാസത്തെ കൂട്ടുപിടിക്കുന്നു, ഒപ്പം തന്നെ ഇന്ന് ശിവരാത്രിയാണ്, പാമ്പിനെ ശിവവിശ്വാസവുമായി ബന്ധപ്പെടുത്തിയാണ് അവരെതിർക്കുന്നത്. എന്നാൽ ഷോറൂമിന്റെ ഓണറും വിനുവും തമ്മിൽ സംസാരിച്ച് അതിനെ കൊല്ലാമെന്ന് തീരുമാനിച്ചു, വിനു ഒരു വടിയുമായി വന്ന് പാമ്പിനെ അടിച്ചു കൊന്നു. പാമ്പിനെ കൊന്നതോടെ പലമുഖങ്ങളിലും വിഷമം തെളിഞ്ഞു വരുന്നു. പിന്നീടും ഇവരെയൊക്കെ കാണുമ്പോൾ പലപ്പോഴും അവരൊക്കെ "നിങ്ങൾ പാമ്പിനെ കൊന്നില്ലേ" എന്ന പരിഭവം ആവർത്തിച്ചു പറയുന്നു.

ഇതിപ്പോൾ പറഞ്ഞതിന് കാരണമുണ്ട്. ഇതേ അഞ്ചലിൽ വെച്ച് തന്നെയാണ് പാമ്പുകടിയേറ്റ് ഉത്ര കൊല്ലപ്പെടുന്നത്. ഉത്രയെ കൊല്ലണമെന്ന് മുൻകൂട്ടി പ്ലാൻ ചെയ്ത് പാമ്പിനെ കൊണ്ടുവന്ന് ഉത്രയെ ബോധം കെടുത്തിയ ശേഷം കടിപ്പിച്ച് കൊല്ലുകയായിരുന്നു എന്നാണ് പുറത്തുവരുന്ന വിവരം.
ആ പ്രദേശത്തുള്ള ചിലരെങ്കിലും ഇപ്പോഴും ഇതൊരു കൊലപാതമാണ് എന്നംഗീകരിക്കാൻ തയ്യാറാകും എന്നു തോന്നുന്നില്ല. കാരണം പാമ്പുമായി ബന്ധപ്പെടുത്തി പല അന്ധവിശ്വാസങ്ങളും ഉള്ളവരാണ് ഇവർ. ആ അന്ധവിശ്വാസത്തിന് ശക്തിപകരുന്നതാകും അവരെ സംബന്ധിച്ചിടത്തോളം ഉത്രയുടെ മരണം.
സർപ്പദോഷമുള്ള കുട്ടിയായതുകൊണ്ടാണ് ആദ്യം അണലിയും പിന്നീട് മൂർഖൻപാമ്പും കടിച്ചതെന്ന വാദമേ അവരുടെ ചിന്തകളിൽ ആദ്യം കടന്നുവരൂ.

ഇത്തരമൊരു വാദത്തിൽ വിശ്വസിക്കുന്നവർ പ്രശ്നം വെച്ച് നോക്കിക്കുകയും, രണ്ടാം തവണയും കടിയേറ്റ കുട്ടിക്കും, അവരുടെ മാതാപിതാക്കൾക്കും സർപ്പദോഷമുണ്ട് എന്നും, ഇതിന് പരിഹാരമായി സർപ്പത്തെ കുടിയിരുത്താനായി ഒരു സർപ്പക്കാവ് ഉയരേണ്ട ബാധ്യത ഉത്തരയുടെ കുടുംബത്തിന് വരികയും ചെയ്യും. കാരണം ഇതൊരു വിശ്വാസമാണ്, വിശ്വാസമെന്നതിലുപരി കടുത്ത അന്ധവിശ്വാസമാണ്. പാമ്പിനെ ഉപദ്രവിച്ചാൽ പാമ്പ് എത്ര കാലം കഴിഞ്ഞാലും പകവീട്ടാനായി വരും, ആ പക പാമ്പിന്റെ തലമുറകളിലൂടെ പകർന്ന് മനുഷ്യരുടെ പുതുതലമുറകളിലെ ആളുകളിലേക്ക് വരെയെത്തിനിൽക്കുന്ന തരത്തിൽ ഡിസൈൻ ചെയ്യപ്പെട്ട ഒരു കടുത്ത അന്ധവിശ്വാസം. പാമ്പിനെ പേടിയുള്ള ബഹുഭൂരിപക്ഷം ആളുകളും ഈ അന്ധവിശ്വാസത്തിനൊപ്പം മാത്രമേ നിൽക്കൂ, അതിപ്പോൾ വിദ്യാഭ്യാസം നേടിയവരായാലും സർപ്പവിശ്വാസമില്ലാത്തവരായാലും, പാമ്പിനെ പേടിയുള്ളവര് പൊതുവായി തന്നെ സർപ്പകോപത്തെ അംഗീകരിച്ചേക്കാം.

ഉത്രയുടെ മരണം സർപ്പകോപം കൊണ്ടല്ല മറിച്ച് ഉത്രയെ കൊലപ്പെടുത്താനായി ഉത്രയുടെ ഭർത്താവ് പ്ലാൻചെയ്ത് നടപ്പിലാക്കിയ പദ്ധതിയിലെ അയാൾ തിരഞ്ഞെടുത്ത ഒരു ടൂൾ മാത്രമാണ് ഉത്രയെ കടിച്ച പാമ്പ് എന്നത് ഇത്തരമൊരു വിശ്വാസത്തിന്റെ കടക്കലാണ് കോടാലിയായി മാറുന്നത്. ഇവിടെ വേണ്ടത് മക്കളിലേക്കോ യുവതലമുറയിലേക്കോ അടുത്ത തലമുറയിലേക്കോ പകരുന്ന അറിവുകൾ ശാസ്ത്രീയ അടിത്തറയുള്ളതാണോ എന്ന പരിശോധനയാണ്.

പാമ്പിനെ സംബന്ധിച്ചായാലും പല്ലിയെ സംബന്ധിച്ചായാലും ലോകത്തിലുള്ള എന്തിനെ സംബന്ധിച്ചായാലും നമ്മുടെ മക്കളോട് നമ്മൾ പങ്കുവെക്കുന്ന, അവരിലേക്ക് നമ്മൾ കൈമാറുന്ന അറിവുകൾ ശാസ്ത്രീയ അടിത്തറയുള്ളതാകണം. അങ്ങനെയായാൽ മാത്രമേ പല അന്ധവിശ്വാസങ്ങളിൽ തെറ്റായ അറിവുകളിൽ നിന്നും നമ്മുടെ കുട്ടികളെ വിമുക്തരാക്കാൻ സാധിക്കൂ. അതിനായി ശാസ്ത്രീയ അടിത്തറയിലേക്ക് നമ്മൾ മാറേണ്ടതുണ്ട്.

ശാസ്ത്രീയ അടിത്തറയിലേക്ക് നമ്മെ നയിക്കുന്നത് ചോദ്യങ്ങളാണ്, സ്വയം ചോദിക്കുന്ന ചോദ്യങ്ങളിൽ നിന്നും, പരിസരങ്ങളിൽ നിന്നും ഉയർന്നു വരുന്ന ചോദ്യങ്ങളിൽ നിന്നും, ആ ചോദ്യങ്ങൾക്ക് കണ്ടെത്തുന്ന ഉത്തരങ്ങളിൽ നിന്നും തന്നെയാണ് സയൻസിന്റെ, ശാസ്ത്രത്തിന്റെ വളർച്ച. (എന്നാൽ വിശ്വാസങ്ങളും അന്ധവിശ്വാസങ്ങളും ചോദ്യങ്ങളും ഉത്തരങ്ങളും ആഗ്രഹിക്കുന്നില്ല.) കുട്ടികൾ ചോദ്യം ചോദിക്കാൻ പഠിക്കട്ടെ, ചോദ്യങ്ങളിൽ നിന്നും നമുക്കവരെ തടയാതിരിക്കാം. പുതിയ വിദ്യാഭ്യാസ വർഷത്തിലേക്ക് എല്ലാ കൊച്ചുകൂട്ടുകാർക്കും സ്വാഗതം..