കാരുണ്യ ബനവലന്റ് ഫണ്ട് (കെബിഎഫ്) മുടങ്ങി അര്‍ബുദ രോഗികളും കിഡ്‌നി രോഗികളും കഷ്ടപ്പെടുന്നു. ധനവകുപ്പിന്റെ ഉത്തരവിലെ അവ്യക്തത മൂലമാണ് സ്തംഭനം. ഉത്തരവില്‍ ഒരു വരി കൂട്ടിച്ചേര്‍ത്താല്‍ പ്രശ്‌നം തീരുമെന്നിരിക്കെ, ധനമന്ത്രിയുടെ മുന്‍പിലേക്കു വിഷയം എത്തിക്കാന്‍ ആരോഗ്യവകുപ്പു തയാറായിട്ടില്ല.

ആരോഗ്യ ഡയറക്ടര്‍ക്കും (ഡിഎച്ച്എസ്) മെഡിക്കല്‍ വിദ്യാഭ്യാസ ഡയറക്ടര്‍ക്കും (ഡിഎംഇ), ആരോഗ്യ വകുപ്പ് പ്രിന്‍സിപ്പല്‍ സെക്രട്ടറി രാജന്‍ ഖോബ്രഗഡെ തടസ്സങ്ങള്‍ എന്തൊക്കെയെന്നു ചോദിച്ച് കത്തുനല്‍കിയതു മാത്രമാണ് ഇന്നലെ ഉണ്ടായ നടപടി. നൂറുകണക്കിന് അത്യാസന്നരോഗികള്‍ക്കു ചികിത്സാസഹായം നിഷേധിക്കപ്പെട്ടതായി ബോധ്യമായതിനു ശേഷമാണ് ഈ മെല്ലെപ്പോക്കുനയം.

ചികിത്സാസഹായം മുടങ്ങിയതു സംബന്ധിച്ചു ധനവകുപ്പിനോടു ചോദിക്കണമെന്നാണ് ആരോഗ്യ മന്ത്രിയുടെ ഓഫിസിന്റെ നിലപാട്. ഈ സാമ്പത്തിക വര്‍ഷം മുഴുവന്‍ കെബിഎഫ് തുടരുമെന്നു ധനമന്ത്രി ബജറ്റില്‍ പ്രഖ്യാപിച്ചതാണെന്ന് ആരോഗ്യ പ്രിന്‍സിപ്പല്‍ സെക്രട്ടറിയുടെ കത്തില്‍ ചൂണ്ടിക്കാട്ടുന്നു.

സഹായം തുടരുന്നതിനുള്ള തടസ്സങ്ങളെന്തെന്ന് ആശുപത്രികളുടെ അഭിപ്രായം സ്വരൂപിക്കാനും കത്തിലുണ്ടായിരുന്നു. അനുവദിച്ച തുക തീരുന്നതു വരെ സംവിധാനം തുടരണമെന്നായിരുന്നു ആശുപത്രി സൂപ്രണ്ടുമാരുടെ മറുപടി. ഡിഎച്ച്എസും ഡിഎംഇയും ഇന്നലെ വൈകിട്ടു തന്നെ ആരോഗ്യ സെക്രട്ടറിക്കു റിപ്പോര്‍ട്ട് നല്‍കി. അതുമായി ആരോഗ്യ മന്ത്രി അടുത്ത ദിവസം ധനമന്ത്രിയെ കാണുമെന്നാണു സൂചന.