ആയുര്‍വേദ ചികില്‍സാ മേഖലകളില്‍ ആശയക്കുഴപ്പവും ആശങ്കയും ഉയര്‍ത്തി ആയുഷ് വകുപ്പ് സെക്രട്ടറിയുടെ ഉത്തരവ്. ആയുര്‍വേദ ആശുപത്രികളില്‍ രോഗികളെ പ്രവേശിപ്പിക്കാം, ചികിത്സിക്കാം എന്നാല്‍ ശരീരസ്പര്‍ശം പാടില്ലെന്ന രീതിയിലുള്ള നിര്‍ദേശമാണ് ഉത്തരവിലുള്ളത്. കൊറോണ വൈറസിനെതിരെ ആയുര്‍വേദ പ്രതിരോധ മാര്‍ഗങ്ങള്‍ പരമാവധി ഉപയോഗിക്കാന്‍ കേന്ദ്ര, സംസ്ഥാന സര്‍ക്കാരുകള്‍ പദ്ധതി നടപ്പാക്കുമ്പോഴാണ് ആശുപത്രികളിലെ ചികിത്സയ്ക്കു പരോക്ഷമായി തടയിടുന്ന സംസ്ഥാന ആയുഷ് വകുപ്പിന്റെ ഈ നീക്കം.

ചുമ, പനി, തലവേദന, ശ്വാസ പ്രശ്‌നങ്ങളുമുള്ളവരെ ഉടന്‍ ആലോപ്പതി ആശുപത്രിയിലേക്കു അയക്കാനുള്ള നിര്‍ദേശത്തിലും ദുരൂഹതയുണ്ടെന്നാണു പരാതി. അതു കോവിഡ് ആശുപത്രിയിലേക്കാണോ എന്ന് ഉത്തവില്‍ വ്യക്തമാക്കിയിട്ടില്ല. ഭൂരിഭാഗം അലോപ്പതി ആശുപത്രികളും പൂര്‍ണമായി രോഗപ്രതിരോധ പ്രവര്‍ത്തനത്തില്‍ മുഴുകിയിരിക്കേയാണ് വകുപ്പിന്റെ ഈ നടപടി.

പനി, ജലദോഷം എന്നിവയ്ക്ക് ഉള്‍പ്പടെയുള്ള ആയുര്‍വേദ ചികിത്സകള്‍ക്കാണു ആയുര്‍ മന്ത്രാലയം കഴിഞ്ഞ ദിവസം അനുമതി നല്‍കിയത്. രോഗം അധികരിച്ചാല്‍ ഇപ്പോഴത്തെ സാഹചര്യത്തില്‍ കോവിഡ് പ്രതിരോധ ചട്ടമനുസരിച്ച് മറ്റു സ്ഥാപനങ്ങളിലേക്കു മാറ്റാം. ഉത്തരവ് സ്വകാര്യ ആശുപത്രികള്‍ക്കും ബാധകമാണോ എന്നതു സംബന്ധിച്ചും ആശയക്കുഴപ്പമുണ്ട്.

ആയുര്‍വേദ ചികിത്സയില്‍ പലതിലും പിഴിച്ചിലും കിഴിയും വസ്തിയും വമനവുമുള്‍പ്പെടെ വേണമെന്നിരിക്കേ ശരീരസമ്പര്‍ക്കം എങ്ങനെ ഒഴിവാക്കുമെന്നാണ് ഡോക്ടര്‍മാരുടെ ചോദ്യം. ആയുര്‍മന്ത്രാലയത്തിന്റെ തീരുമാനം അടിസ്ഥാനമാക്കിയുളള നടപടിക്കുപകരം ചികിത്സയുടെ അടിസ്ഥാന തത്വങ്ങള്‍ക്കും കേന്ദ്രചട്ടത്തിനും എതിരാണ് വകുപ്പിന്റെ ഉത്തരവെന്നു ആയുര്‍വേദ ഡോക്ടര്‍മാര്‍, സ്ഥാപനങ്ങള്‍ എന്നിവയുമായി ബന്ധപ്പെട്ട സംഘടനകള്‍ ആരോപിക്കുന്നു. എന്നാല്‍ കോവിഡ് പ്രതിരോധചട്ടം അനുസരിച്ചാണ് ഉത്തവിറക്കിയതെന്നാണ് ആയുഷ് അധികൃതരുടെ നിലപാട്.

കോവിഡിന്റെ തുടക്കത്തില്‍ ആയുര്‍വേദ ആശുപത്രിയില്‍ ചികിത്സയിലുള്ളവരെ ഡിസ്ചാര്‍ജ് ചെയ്യണമെന്ന രീതിയില്‍ വകുപ്പ് ഉത്തരവ് ഇറക്കിയെങ്കിലും ഡോക്ടര്‍മാരുടെ സംഘടനകള്‍ രംഗത്തുവന്നതോടെ അതു തിരുത്തിയിരുന്നു. ഡെങ്കിപനി, എലിപ്പനി എന്നിവയുടെ ചികിത്സയ്ക്ക് വര്‍ഷങ്ങള്‍ക്കു മുന്‍പുതന്നെ ആയുര്‍വേദ വകുപ്പ് ചട്ടം തയാറാക്കിയിട്ടുണ്ട്.