ലോറിയിൽ നിന്ന് ഓക്സിജൻ സിലിണ്ടർ തെറിച്ചു ദേഹത്തുവീണ് കെ.എസ്.ഇ.ബി ജീവനക്കാരന് ദാരുണാന്ത്യം. തളിപ്പറമ്പിലെ ചിറക്കൽ പുഴാതി സോമേശ്വരീ ക്ഷേത്രത്തിന് സമീപം താമസിക്കുന്ന ശ്രീജിത്ത് (48) ആണ് മരിച്ചത്.

കണ്ണൂർ പാപ്പിനിശേരിയിൽ ചുങ്കം ദേശീയപാതയിൽ വെച്ച് ബൈക്കിൽ യാത്ര ചെയ്യുന്നതിനിടെയാണ് ദാരുണമായ അപകടം സംഭവിച്ചത്. വെള്ളിയാഴ്ച രാത്രി ഒമ്പതരയോടെ ജോലി കഴിഞ്ഞ് ബൈക്കിൽ വീട്ടിലേക്ക് പോകുകയായിരുന്നു ശ്രീജിത്ത്. അതേസമയം, ഓക്സിജൻ സിലിണ്ടർ കയറ്റിക്കൊണ്ടു പോവുകയായിരുന്ന മിനി ലോറിയിൽ നിന്നും ഒരു സിലിണ്ടർ കെ.എസ്.ഇ.ബി ജീവനക്കാരന്റെ ദേഹത്തേക്ക് വീണ് പൊട്ടിത്തെറിക്കുകയായിരുന്നു.

ലോറിക്ക് പുറകിലായിരുന്നതിനാൽ പെട്ടെന്ന് തെറിച്ച സിലിണ്ടറിനെ വെട്ടിക്കാനായി ശ്രീജിത്തിന് കഴിഞ്ഞില്ല. അതാണ് ദേഹത്തേക്ക് വീഴാൻ കാരണമായത്. ഗുരുതര പരിക്കേറ്റയാളെ പാപ്പിനിശേരിയിലെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

ലോറിയുടെ പുറകുവശത്തെ ഡോർ തുറന്നുകിടക്കുകയായിരുന്നുവെന്നും ആക്ഷേപമുണ്ട്. ലോറി വളപട്ടണം പൊലീസ് കസ്റ്റഡിയിലെടുത്തു. സംഭവത്തിൽ അന്വേഷണം പുരോഗമിക്കുന്നു.