മിഥുന മാസപൂജകള്‍ക്കായി ഈ മാസം 14-ാം തീയതി ശബരിമല നട തുറക്കാനിരിക്കെയാണ് തന്ത്രി കണ്ഠര് മഹേഷ് മോഹനര് ദേവസ്വം കമ്മീഷണര്‍ക്ക് കത്ത് നല്‍കിയത്. കൊവിഡ് വ്യാപനം കണക്കിലെടുത്താണ് ഭക്തരെ ഉടന്‍ പ്രവേശിപ്പിക്കരുതെന്ന ആവശ്യം ഉന്നയിച്ചത്. തീരുമാനമെടുത്തത് തന്ത്രി കുടുംബവുമായി ആലോചിച്ചാണെന്ന് പറഞ്ഞ ദേവസ്വം ബോര്‍ഡ് തന്ത്രിയുടെ ആവശ്യം തള്ളി. പക്ഷേ, തന്ത്രിയുടെ അഭിപ്രായം മാനിക്കണമെന്നാവശ്യപ്പെട്ട് ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍ രംഗത്തെത്തിയതോടെ രാഷ്ട്രീയ വിവാദം ചൂടുപിടിച്ചു. ഇതോടെ ഏറ്റുമുട്ടല്‍ ഒഴിവാക്കി സര്‍ക്കാര്‍ അയഞ്ഞു.തന്ത്രിമാരെയും ദേവസ്വംബോര്‍ഡിനെയും ഒന്നിച്ചിരുത്തി ചര്‍ച്ചയ്ക്ക് വിളിച്ചു.

ശബരിമലയില്‍ മാസപൂജയ്ക്കായി നട തുറക്കുമ്പോള്‍ ഭക്തരെ പ്രവേശിപ്പിക്കുന്ന കാര്യത്തില്‍ തീരുമാനമെടുക്കുന്നതിനായി ഇന്ന് ദേവസ്വം ബോര്‍ഡ് അധികൃതരുമായും തന്ത്രിമാരുമായും സര്‍ക്കാര്‍ ചര്‍ച്ച നടത്തും.രാവിലെ 11 മണിക്ക് തിരുവനന്തപുരത്താണ് യോഗം.തന്ത്രിമാരുടെ അഭിപ്രായത്തെ കൂടി മാനിച്ചുകൊണ്ടുളള തീരുമാനം ഇക്കാര്യത്തിലെടുക്കാനാണ് സര്‍ക്കാര്‍ ശ്രമം

സര്‍ക്കാരിനെ സംബന്ധിച്ചിടത്തോളം കൊവിഡ് വ്യാപനം തടയുക എന്നുള്ളതാണ് പ്രധാനം. കേന്ദ്ര സര്‍ക്കാര്‍ നിര്‍ദേശത്തോടൊപ്പം വിശ്വാസ സംരക്ഷണത്തിന്റെ പേരില്‍ ക്ഷേത്രങ്ങള്‍ തുറക്കണമെന്ന രാഷ്ട്രീയ കക്ഷികള്‍ ആവശ്യപ്പെട്ടതിന്റെ പശ്ചാത്തലത്തിലാണ് നിബന്ധനകളോടെ ക്ഷേത്രങ്ങള്‍ തുറക്കാന്‍ തീരുമാനിച്ചത്. എന്നാല്‍ നേരത്തെ ക്ഷേത്രങ്ങള്‍ തുറക്കണമെന്ന് ആവശ്യപ്പെട്ടവര്‍ തന്നെ പുതിയ വിവാദത്തിന് തിരികൊളുത്തി കൊണ്ട് സര്‍ക്കാരിനെതിരെ മലക്കം മറിയുകയായിരുന്നു.

ശബരിമലയില്‍ മലയാളികള്‍ മാത്രമല്ല ഇതരസംസ്ഥാനക്കാര്‍ കൂടി വരുന്നുണ്ട്. ഈ പശ്ചാത്തലത്തിലാണ് കൊവിഡ് വ്യാപനം ഉണ്ടാകാതിരിക്കാനുള്ള മുന്‍കരുതലെന്ന നിലയില്‍ പരിശോധനാഫലം കൂടി അപ്ലോഡ് ചെയ്യണമെന്ന നിബന്ധന വെച്ചത്. മറ്റു സംസ്ഥാനങ്ങളില്‍ നിന്ന് വരുന്നവര്‍ രണ്ടുദിവസത്തിന് മുമ്പ് കൊവിഡ് പരിശോധന നടത്തി നെഗറ്റീവ് ആണെന്ന് കാണിക്കുന്ന പരിശോധനാഫലം അപ്ലോഡ് ചെയ്താല്‍ മാത്രമേ ക്ഷേത്രത്തില്‍ പ്രവേശിക്കാനുള്ള പാസ് കൊടുക്കുകയുളളൂ എന്നായിരുന്നു നിബന്ധന. ആള്‍ക്കൂട്ടം ഒഴിവാക്കണമെന്നതാണ് സര്‍ക്കാരിന്റെ നിലപാട്. അതുകൊണ്ടാണ് കര്‍ശന നിയന്ത്രണങ്ങളോടെ ആരാധന നടത്താന്‍ അനുവദിച്ചിട്ടുള്ളത്.ശബരിമലയില്‍ ഭക്തരെ പ്രവേശിപ്പിക്കുന്നതില്‍ തന്ത്രിമാര്‍ എതിര്‍പ്പറിയിച്ചാല്‍ സര്‍ക്കാര്‍ അതുമായി മുന്നോട്ടു പോകാനിടയില്ല.

അതേസമയം ശബരിമലയില്‍ ഭക്തരെ പ്രവേശിപ്പിക്കാനായുള്ള വിര്‍ച്വല്‍ ക്യൂ സംവിധാനത്തിനുള്ള ബുക്കിംഗ് തുടങ്ങിയില്ല. ദേവസ്വം ബോര്‍ഡ് ഭാരവാഹികളുമായും തന്ത്രിമാരുമായും സര്‍ക്കാര്‍ നടത്തുന്ന ചര്‍ച്ചയ്ക്ക് ശേഷമേ ഭക്തരുടെ പ്രവേശനം ഈ തീര്‍ത്ഥാടനകാലത്ത് വേണോ എന്ന് തീരുമാനിക്കൂ. ബുധനാഴ്ച (100620) വൈകിട്ട് ആറ് മണിക്ക് വിര്‍ച്വല്‍ ക്യൂ ബുക്കിംഗ് സംവിധാനം തുടങ്ങാനിരുന്നതാണ്. മാസപൂജക്ക് ഭക്തരെ പ്രവേശിപ്പിക്കരുതെന്നും ഉത്സവം മാറ്റിവെക്കണമെന്നുമാണ് ദേവസ്വം ബോര്‍ഡിനോട് തന്ത്രി ആവശ്യപ്പെട്ടത്. തന്ത്രിയുടേത് നിലപാട് മാറ്റമെന്ന് പറഞ്ഞ് ദേവസ്വം ബോര്‍ഡ് വിമര്‍ശിച്ചപ്പോള്‍ ബിജെപി തന്ത്രിയെ പിന്തുണച്ച് രംഗത്തെത്തി.

മിഥുന മാസപൂജകള്‍ക്കായി ഈ മാസം 14-ാം തീയതി ശബരിമല നട തുറക്കാനിരിക്കെയാണ് തന്ത്രി കണ്ഠര് മഹേഷ് മോഹനര് ദേവസ്വം കമ്മീഷണര്‍ക്ക് കത്ത് നല്‍കിയത്. കൊവിഡ് വ്യാപനം കണക്കിലെടുത്താണ് ഭക്തരെ ഉടന്‍ പ്രവേശിപ്പിക്കരുതെന്ന ആവശ്യം ഉന്നയിച്ചത്. തീരുമാനമെടുത്തത് തന്ത്രി കുടുംബവുമായി ആലോചിച്ചാണെന്ന് പറഞ്ഞ ദേവസ്വം ബോര്‍ഡ് തന്ത്രിയുടെ ആവശ്യം തള്ളി. പക്ഷേ, തന്ത്രിയുടെ അഭിപ്രായം മാനിക്കണമെന്നാവശ്യപ്പെട്ട് ബിജെപി പ്രസിഡന്റ് കെ സുരേന്ദ്രന്‍ രംഗത്തെത്തിയതോടെ രാഷ്ട്രീയ വിവാദം ശക്തമായി. ഇതോടെ ഏറ്റുമുട്ടല്‍ ഒഴിവാക്കി സര്‍ക്കാര്‍ അയഞ്ഞു. തന്ത്രിമാരെയും ദേവസ്വംബോര്‍ഡിനെയും ഒന്നിച്ചിരുത്തി ചര്‍ച്ചയ്ക്ക് വിളിച്ചു.

''തന്ത്രിമാരുടെ അഭിപ്രായം എന്തെന്ന് അറിയേണ്ടതുണ്ട്. ദേവസ്വം ബോര്‍ഡ് ഭാരവാഹികളെയും തന്ത്രിമാരെയും ഇക്കാര്യത്തില്‍ കൂടിയാലോചനയ്ക്ക് സര്‍ക്കാര്‍ ക്ഷണിച്ചിട്ടുണ്ട്'', എന്നാണ് ദേവസ്വം മന്ത്രി കടകംപള്ളി സുരേന്ദ്രന്‍ വ്യക്തമാക്കിയത്.

ക്ഷേത്രങ്ങള്‍ തുറക്കാന്‍ കേന്ദ്രം തീരുമാനമെടുത്തതിന് പിന്നാലെ വിമര്‍ശനങ്ങള്‍ ഒഴിവാക്കാന്‍ വേഗം നടപടികള്‍ സ്വീകരിച്ച സര്‍ക്കാരിനെതിരെ ബിജെപിയും ഹിന്ദു സംഘടനകളും കോണ്‍ഗ്രസ്സും എന്‍എസ്എസ്സും പന്തളം രാജകുടുംബവുമെല്ലാം രംഗത്തെത്തിയിരുന്നു. വിവാദം ശബരിമലയെ ചൊല്ലിയും മുറുകുന്നത് സര്‍ക്കാറിനെ അമ്പരപ്പിലാക്കി. ശബരിമല യുവതീപ്രവേശനത്തില്‍ കൈപൊള്ളിയ സര്‍ക്കാര്‍ അത് കൊണ്ടാണ് കൊവിഡ് കാലത്തെ ഭക്തരുടെ പ്രവേശനത്തില്‍ സമവായലൈനിലേക്ക് മാറിയത്. തന്ത്രികുടുംബം ഭക്തരെ പ്രവേശിപ്പിക്കേണ്ടെന്ന് ചര്‍ച്ചയില്‍ ആവശ്യപ്പെട്ടാല്‍ സര്‍ക്കാരും പിന്നോട്ട് പോകാനിടയുണ്ട്.