സര്‍ക്കാര്‍ ജീവനക്കാര്‍ക്ക് സിവില്‍ സര്‍വീസിലേക്കു തെരഞ്ഞെടു ക്കപ്പെടുന്നതിനുള്ള മാനദണ്ഡങ്ങള്‍ സര്‍ക്കാര്‍ പുതുക്കി നിശ്ചയിച്ചു
സിവില്‍ സര്‍വീസിലേക്കു തെരഞ്ഞെടുക്കപ്പെടാന്‍ ആഗ്രഹിക്കുന്ന സര്‍ക്കാര്‍ ജീവനക്കാര്‍ക്കുള്ള മാനദണ്ഡങ്ങള്‍ സര്‍ക്കാര്‍ പുതുക്കി നിശ്ചയിച്ചു. ഒരിക്കല്‍ ശിപാര്‍ശ ചെയ്യപ്പെട്ട ആള്‍ക്കു രണ്ടാം തവണ അവസരമുണ്ടാകില്ല എന്നതാണ് പുതിയ മാനദണ്ഡങ്ങളില്‍ പ്രധാനം. ചീഫ് സെക്രട്ടറി ഇതു സംബന്ധിച്ച് ഉത്തരവ് പുറത്തിറക്കി. രാഷ്ട്രീയ പിന്തുണയോടെ ഐ.എ.എസ്. 'തട്ടിയെടുക്കുന്ന' രീതിക്ക് ഇതോടെ വിരാമമാകുമെന്നാണ് പ്രതീക്ഷ.
സര്‍ക്കാര്‍ ജീവനക്കാര്‍ ജൂണ്‍ പതിനഞ്ചിനകം അപേക്ഷിക്കണമെന്നാണ് പുതിയ ഉത്തരവ്. ഡെപ്യൂട്ടി കലക്ടര്‍ക്കു തുല്യമായ തസ്തികയില്‍ തുടങ്ങി എട്ടു വര്‍ഷത്തെ തുടര്‍ച്ചയായ പ്രവൃത്തിപരിചയമുള്ളവരെ സര്‍ക്കാരിനു ശിപാര്‍ശ ചെയ്യാം. ഗസറ്റഡ് തസ്തികയിലായിരിക്കണം ജോലി. 2019 ജനുവരി ഒന്നിന് 56 വയസ് തികയാന്‍ പാടില്ല.
ഐ.എ.എസിലേക്കു തെരഞ്ഞെടുക്കപ്പെടാന്‍ ഒരിക്കല്‍ ശിപാര്‍ശ ചെയ്യപ്പെട്ട ഉദ്യോഗസ്ഥനു പിന്നീട് ഇതേ തെരഞ്ഞെടുപ്പിന് അര്‍ഹതയുണ്ടായിരിക്കില്ല. എന്തെങ്കിലും തരത്തിലുള്ള വകുപ്പുതല അന്വേഷണം നേരിടുന്ന ഉദ്യോഗസ്ഥനോ ജോലിയോടുള്ള ആത്മാര്‍ഥതയില്‍ സംശയം പ്രകടിപ്പിക്കപ്പെട്ട ആളോ ആകരുത്.
സെക്രട്ടറിമാര്‍ക്കോ പ്രിന്‍സിപ്പല്‍ സെക്രട്ടറിമാര്‍ക്കോ അഡീഷനല്‍ ചീഫ് സെക്രട്ടറിമാര്‍ക്കോ ഇത്തരം ഉദ്യോഗസ്ഥരെ ശിപാര്‍ശ ചെയ്യാന്‍ അധികാരമുണ്ടായിരിക്കും. പ്രിന്‍സിപ്പല്‍ സെക്രട്ടറിമാരോ അതിനു മുകളിലുള്ളവരോ വഴി ആയിരിക്കണം അപേക്ഷ നല്‍കേണ്ടത്.
https://www.facebook.com/Malayalivartha
