കൈക്കൂലിക്കേസില്‍ അറസ്റ്റിലായ കോട്ടയം നഗരസഭ മുന്‍ അസി. എന്‍ജിനീയര്‍, അനുവാദമില്ലാതെ ശബ്ദസാമ്പിള്‍ ശേഖരിക്കുന്നതു നിയമവിരുദ്ധമാണെന്ന് ചൂണ്ടിക്കാട്ടി സമര്‍പ്പിച്ച ഹര്‍ജി തള്ളിക്കൊണ്ട് അഴിമതിക്കേസില്‍ ശബ്ദപരിശോധനാ ഫലം തെളിവായി സ്വീകരിക്കാമെന്ന് ഹൈക്കോടതി നിര്‍ണായക വിധി പുറപ്പെടുവിച്ചു. ജസ്റ്റിസ് സുനില്‍ തോമസാണ് ഉത്തരവിട്ടത്.

കോട്ടയം നഗരസഭ മുന്‍ അസി. എന്‍ജിനീയര്‍ എം.പി. ഡെയ്സി കൈക്കൂലിക്കേസില്‍ അറസ്റ്റിലായതുമായി ബന്ധപ്പെട്ടു സമര്‍പ്പിച്ച ഹര്‍ജിയാണ് തള്ളിയത്. വീട്ടിലേക്കുള്ള റോഡ് മണ്ണിട്ടുയര്‍ത്തിയെന്ന പരാതിയില്‍ അനുകൂല റിപ്പോര്‍ട്ട് നല്‍കുന്നതിനു 2,000 രൂപ കൈക്കൂലി ചോദിച്ചു വാങ്ങിയെന്നാണ് കേസ്. ഡെയ്സിയുടെ ശബ്ദപരിശോധന ആവശ്യപ്പെട്ടുള്ള വിജിലന്‍സിന്റെ അപേക്ഷ അനുവദിച്ച കോട്ടയം വിജിലന്‍സ് കോടതി ശബ്ദപരിശോധനയ്ക്കായി ജനുവരി 21-ന് തൃക്കാക്കര ചിത്രാഞ്ജലി സ്റ്റുഡിയോയില്‍ ഹാജരാവാന്‍ നിര്‍ദേശിച്ചിരുന്നു.

ഏതു വ്യക്തിയുടെയും മാനസിക പരിശോധന നടത്താന്‍ അയാളുടെ അനുമതി വേണമെന്നു നിയമമുണ്ടെന്നിരിക്കേ, ശബ്ദ പരിശോധനയും ഇതില്‍പെടുമെന്നായിരുന്നു നടപടി ചോദ്യംചെയ്തുകൊണ്ട് ഡെയ്സിയുടെ വാദം. മാനസിക പരിശോധനയ്ക്കു പ്രതിയുടെ അനുവാദം വേണമെന്നും ശാസ്ത്രീയ പരിശോധനകള്‍ക്കു വേണ്ടെന്നും 2010-ല്‍ സുപ്രീം കോടതി വിധിച്ചിരുന്നു.

ശബ്ദപരിശോധനക്കു വിജിലന്‍സ് കോടതി നിര്‍ദേശം നല്‍കിയത്, ശബ്ദപരിശോധനാ ഫലം ശാസ്ത്രീയ തെളിവായി സ്വീകരിക്കാമെന്ന 2019-ലെ സുപ്രീംകോടതി വിധി ചൂണ്ടിക്കാട്ടിയാണ്്. 2010-ലെ വിധിയില്‍ ശബ്ദ സാമ്പിള്‍ പരിശോധനയെപ്പറ്റി പറയുന്നില്ലെന്നും ഒടുവിലത്തെ സുപ്രീംകോടതി ഉത്തരവാണു നിലനില്‍ക്കുകയെന്നും വിജിലന്‍സിനുവേണ്ടി സ്പെഷല്‍ ഗവ. പ്ലീഡര്‍ എ. രാജേഷ് വാദിച്ചു.

നാര്‍ക്കോ അനാലിസിസ്, പോളിഗ്രാഫ്, ബ്രെയിന്‍മാപ്പിങ് തുടങ്ങിയ മാനസിക പരിശോധനയിലും ശാസ്ത്രീയ പരിശോധനയിലും മാനസിക പരിശോധനയിലും ശബ്ദ പരിശോധന പെടില്ല. ശബ്ദപരിശോധനയ്ക്കു രാജ്യത്തു നിയമവുമില്ല. ഈ സാഹചര്യത്തില്‍ വഴിമുട്ടിയ കേസന്വേഷണത്തില്‍ ഹൈക്കോടതി വിധി നിര്‍ണായക വഴിത്തിരിവാകും.

പലപ്പോഴും വോയ്സ് മെസേജ് വഴിയോ ഫോണ്‍ വിളി വഴിയോ ആയിരിക്കും കൈക്കൂലി ആവശ്യപ്പെടുക. കൈക്കൂലി ചോദിച്ചതും വാങ്ങിയതും തെളിയിക്കേണ്ടതിനാല്‍ ശബ്ദ പരിശോധന അനിവാര്യമാണ്.

എന്നാല്‍ ശബ്ദപരിശോധനയ്ക്ക് പ്രതിയുടെ സമ്മതം ആവശ്യമാണെന്ന കാരണത്താല്‍ ശബ്ദ പരിശോധന നടത്താന്‍ കഴിഞ്ഞിരുന്നില്ല. ഒരു പ്രതി അയാള്‍ക്കെതിരേ തെളിവു നല്‍കുന്നത് ഭരണഘടന അനുച്ഛേദം 20(3) വിലക്കുന്നുണ്ട്. ഇതിന്റെ മറവിലാണു പ്രതികള്‍ ശബ്ദ പരിശോധന ഒഴിവാക്കിയിരുന്നത്.

രാജ്യത്ത് വിവിധ കോടതികളില്‍ ശബ്ദപരിശോധന ആവശ്യപ്പെട്ട് അന്വേഷണ ഏജന്‍സികളും പ്രതികളും നല്‍കിയ ഹര്‍ജികള്‍ കെട്ടിക്കിടക്കുകയാണ്. മാവോയിസ്റ്റ് രൂപേഷിന്റെ കേസിലും ശബ്ദപരിശോധന ആവശ്യപ്പെട്ടെങ്കിലും അദ്ദേഹം സമ്മതിച്ചിരുന്നില്ല.