സര്‍ക്കാര്‍ ധനസഹായമൊന്നും ലഭിക്കാത്ത ബിപിഎല്‍ -അന്ത്യോദയ കാര്‍ഡ് ഉടമകള്‍ക്കുള്ള 1000 രൂപ സഹായം 15 വരെ നല്‍കും. 14.7 ലക്ഷം പേരാണുള്ളത്. 11.19 ലക്ഷം പേര്‍ക്ക് സഹകരണ സംഘം ജീവനക്കാര്‍ തുക വീട്ടിലെത്തിച്ചു. മൂന്നുലക്ഷം പേര്‍ക്ക് തുക ലഭിക്കാനുണ്ടെന്ന് മന്ത്രി ടി എം തോമസ് ഐസക് വ്യക്തമാക്കി. മുഖ്യമന്ത്രിയുടെ ദുരിതാശ്വാസനിധിയില്‍നിന്നാണ് സഹായം.

അനര്‍ഹര്‍ സഹായം കൈപ്പറ്റിയെന്ന പരാതി ഗൗരവമായി പരിശോധിക്കുമെന്ന് ധനമന്ത്രി വ്യക്തമാക്കി. അനര്‍ഹര്‍ക്ക് ബിപിഎല്‍- അന്ത്യോദയ കാര്‍ഡ് ഉള്ളതാകാം സഹായം ലഭിക്കാന്‍ കാരണം. ഇവരുടെ റേഷന്‍ കാര്‍ഡ് പരിശോധിക്കും. അനര്‍ഹമാരാണെങ്കില്‍ തുക മടക്കിവാങ്ങും. അന്യായമായി വാങ്ങിയ റേഷന്റെ വിലയും ഈടാക്കും. ക്ഷേമനിധി സഹായമായി 1000 രൂപ ലഭിച്ചവരും ഈ സഹായം വാങ്ങിയെന്ന പരാതിയും പരിശോധിക്കും.

റേഷന്‍ കാര്‍ഡിലെ മേല്‍വിലാസത്തിലാണ് തുക എത്തിക്കുന്നത്. താമസം മാറിയവര്‍ റേഷന്‍കാര്‍ഡിലെ മേല്‍വിലാസത്തിലെ സ്ഥലത്തെ റേഷന്‍കട, തദ്ദേശ സ്ഥാപനം, സഹകരണ ബാങ്ക് എന്നിവയുമായി ബന്ധപ്പെട്ടാല്‍, പട്ടികയിലുണ്ടെങ്കില്‍ തുക ലഭിക്കും.

ചിലര്‍ക്ക് ഇതുവരെ ഒരു ആനുകൂല്യവും ലഭിച്ചിട്ടില്ലെന്ന പരാതിയും പരിശോധിക്കും. റേഷന്‍ കാര്‍ഡിന്റെ ആദ്യ പേജ്, ആധാര്‍ കാര്‍ഡിന്റെ പകര്‍പ്പ്, താമസിക്കുന്ന പഞ്ചായത്ത്/ കോര്‍പറേഷന്‍/ മുനിസിപ്പാലിറ്റിയുടെ പേര് എന്നിവ സഹിതം ധനമന്ത്രിയുടെ ഓഫീസിലേക്ക് പരാതി അയക്കണം. ഇ മെയില്‍ വഴിയും അയക്കാം. വിലാസം  min.fin@kerala.gov.in.


അതിനിടയില്‍ കോവിഡ് കാലത്തു തൊഴില്‍ നഷ്ടപ്പെട്ട കലക്ഷന്‍ ഏജന്റുമാര്‍ക്കു നല്‍കിയ ധനസഹായം തിരിച്ചു പിടിച്ച് സഹകരണ വകുപ്പ്. തൊഴില്‍ നഷ്ടപ്പെട്ടവര്‍ക്കു സര്‍ക്കാരിന്റെ കൈത്താങ്ങ് എന്ന രീതിയിലാണ് ഇരുപതിനായിരത്തോളം വരുന്ന ഏജന്റുമാര്‍ക്ക് 10,000 രൂപ വരെ ധനസഹായം നല്‍കാന്‍ സഹകരണ ഭരണ സമിതികള്‍ക്കു നിര്‍ദേശം നല്‍കിയത്. എന്നാല്‍ ഈ തുക തിരിച്ചു പിടിക്കാനാണ് ഇപ്പോള്‍ സഹകരണ റജിസ്ട്രാറുടെ ഉത്തരവ്.
സഹകരണ സ്ഥാപനങ്ങള്‍ക്കു വേണ്ടി കമ്മിഷന്‍ അടിസ്ഥാനത്തില്‍ നിക്ഷേപ, വായ്പ പിരിവ് നടത്തുകയാണ് ഏജന്റുമാരുടെ ജോലി. ലോക്ഡൗണ്‍ മൂലം പിരിവ് നിര്‍ത്തിയപ്പോഴാണു സഹായം പ്രഖ്യാപിച്ചത്. ലോക്ഡൗണില്‍ ഇളവു പ്രഖ്യാപിച്ചതോടെ പിരിവ് തുടരാന്‍ സഹകരണവകുപ്പ് ഉത്തരവ് ഇറക്കിയിരുന്നു. ഇതോടൊപ്പമാണു നേരത്തേ നല്‍കിയ ധനസഹായം 10 മാസത്തവണകളായി തിരിച്ചുപിടിക്കാനും നിര്‍ദേശിച്ചിരിക്കുന്നത്.

ധനസഹായം അനുവദിക്കുന്ന വേളയില്‍ ഇതു തിരിച്ചുപിടിക്കുന്ന വായ്പയാണെന്നു വ്യക്തമാക്കിയിരുന്നില്ലെന്നും സര്‍ക്കാര്‍ സഹായം ചെയ്യുന്നു എന്ന രീതിയിലാണു നല്‍കിയതെന്നുമാണു ഏജന്റുമാരുടെ പരാതി.