സംസ്ഥാനത്ത് കോവിഡ് പശ്ചാത്തലത്തിൽ ക്ലാസുകൾ എല്ലാം തന്നെ ഇപ്പോൾ ഓൺലൈൻ ആയി മാറിയിരിക്കുകയാണ് . എന്നാൽ പലർക്കും അത്ര കൃത്യമായി രീതിയിൽ ക്ലാസ് അറ്റൻഡ് ചെയ്യാൻ സാധിക്കുന്നില്ല എന്നതും ഒരു യാഥാർഥ്യമാണ്. പല സാങ്കേതിക കരണങ്ങൾ അതിനു പിന്നിലുണ്ട്. പലർക്കും സ്മാർട്ട് ഫോണോ ടിവിയോ ഇല്ലാത്തത് ഒരു വലിയ വെല്ലുവിളിയായിരുന്നു .അത് ഏറെ കുറെ പരിഹരിക്കാൻ ഇപ്പോൾ സന്നദ്ധപ്രവർത്തകർ ഉൾപ്പെടെയുള്ള പലരും ശ്രമിക്കുന്നുമുണ്ട്. എന്നാൽ മറ്റൊരു പ്രധാന വെല്ലുവിളി എന്നത് നെറ്റ്‌വർക്ക് കവറേജ് ആണ്. പരിമിതമായ നെറ്റ്‌വർക്ക് കവറേജ് കാരണം പലർക്കും ക്ലാസുകൾ വേണ്ട വിധത്തിൽ അറ്റൻഡ് ചെയ്യാൻ സാധിക്കാറില്ല . അത്തരമൊരു വാർത്തയാണ് തൊടുപുഴയിൽ നിന്നും കേൾക്കുന്നത്

കൊക്കയാർ മുക്കുളത്തെ ട്രീസ ഓൺലൈൻ ക്ലാസിലിരിക്കാൻ ആശ്രയിക്കുന്നത് വീട്ടിനു മുന്നിലെ പ്ലാവിനെയാണ്. , അൽപം റേഞ്ച് കിട്ടാനുള്ള പെടാപ്പാടാണു ഈ പ്ലാവിൻ ചുവട്ടിൽ അരങ്ങേറുന്നത് . ചെറിയ അധ്വാനമൊന്നുമല്ല അതിനായി ഇവർ ചെയ്യുന്നത് .ഓൺലൈൻ ക്ലാസ് വിഡിയോസ് ഡൗൺലോഡ് ചെയ്യാനിട്ട് മൊബൈൽ ഫോൺ കയറിൽ കെട്ടി പ്ലാവിൻ മുകളിലേക്ക് വലിച്ചു കയറ്റും. അരമണിക്കൂറിനു ശേഷം തിരികെയിറക്കുന്ന മൊബൈൽ ഫോണിൽ ഡൗൺലോഡായി വിഡിയോസ് നോക്കിയാണ് പിന്നീട് പഠനം

ഡൗൺലോഡ് ചെയ്യാനുള്ള പ്രശ്നം പരിഹരിക്കാനായി ട്രീസയുടെ അച്ഛൻ വക്കച്ചൻ കണ്ടുപിടിച്ച ആശയമാണ് ഈ വിദ്യ. ബിഎസ്എൻഎൽ അടക്കമുള്ള മൊബൈൽ സേവന ദാതാക്കളോടു പല തവണ പരാതി പറഞ്ഞു മടുത്തിരിക്കുകയാണ് ഇവിടത്തുകാർ. റേഞ്ച് തീരെയില്ലാത്തതു ഇവിടത്തെ കുട്ടികളുടെ ഓൺലൈൻ പഠനം അവതാളത്തിലാക്കി. ഈ ദൃശ്യങ്ങൾ ചിത്രീകരിച്ചു വക്കച്ചൻ സമൂഹ മാധ്യമത്തിൽ പോസ്റ്റ് ചെയ്ത വിഡിയോ വൈറലായിരിക്കുകയാണ്.

പഠനത്തിനായി ഇന്റർനെറ്റ് കവറേജ് ഇല്ലാത്തതിനാൽ പുരപ്പുറത്തിരുന്ന് പഠിക്കുന്ന ഒരു പെൺകുട്ടിയുടെ ചിത്രം കഴിഞ്ഞ ദിവസങ്ങളിൽ സോഷ്യൽ മീഡിയയിൽ വൈറലായിരുന്നു. വീടിനുള്ളിൽ ഇന്റർനെറ്റ് സൗകര്യമില്ലാത്തതാണ് കോട്ടക്കൽ സ്വദേശി നമിത നാരായണനെ പുരപ്പുറത്തെത്തിച്ചത്. വാർത്ത കണ്ട് പല ഇന്റർനെറ്റ് സേവനദാതാക്കളും നമിതയെ വിളിക്കുകയും ഒടുവിൽ . ജിയോ മൂന്ന് മാസത്തെ സൗജന്യ അതിവേഗ കണക്ഷൻ അനുവദിക്കുകയുമായിരുന്നു .നിരവധി വിദ്യാർഥികൾ ഇത്തരത്തിൽ ഇന്റർനെറ്റ് സേവനം ലഭ്യമല്ലാതെ പഠനം മുടങ്ങുന്ന സാഹചര്യം അനുഭവിക്കുന്നുണ്ട്. ട്രീസയും നമിതയും ചില ഉദാഹരണങ്ങൾ മാത്രം..