സൂരജ് തികഞ്ഞ ബുദ്ധിശാലി, പക്ഷെ തന്ത്രങ്ങൾ പാളിയത് അവിടെ; അഞ്ചലില്‍ യുവതി പാമ്പു കടിയേറ്റ് മരിച്ച സംഭവത്തിൽ കൂടുതൽ നിർണായക വിവരങ്ങൾ
അഞ്ചലില്‍ യുവതി പാമ്പു കടിയേറ്റ് മരിച്ച സംഭവത്തിൽ കൂടുതൽ നിർണായക വിവരങ്ങൾ. ഉത്രയെ ആദ്യ തവണ പാമ്ബ് കടിപ്പിച്ചപ്പോൾ ചികിത്സിച്ച ഡോക്ടര്മാരുടെ മൊഴി അന്വേഷണ സംഘം രേഖപ്പെടുത്തി. അണലിയുടെ കടിയേറ്റ് ഉത്ര ഒന്നരമാസത്തിലേറെ ചികിത്സയില്‍ കഴിഞ്ഞ തിരുവല്ല പുഷ്പഗിരി ആശുപത്രിയിലെ ഡോക്ടര്മാരില് നിന്നാണ് ചികിത്സാ വിവരങ്ങളും, ഉത്രയുടെ ശരീരത്തില്‍ കാണപ്പെട്ട മുറിവുകളും സംബന്ധിച്ച വിവരങ്ങള്‍ തേടിയത്. അണലിയുടെ കടിയേറ്റ് മണിക്കൂറുകള്‍ കഴിഞ്ഞാണ് ഉത്രയ്ക്ക് ചികിത്സ നല്‍കിയതെന്ന് ഡോക്ടര്മാര് അന്വേഷണ സംഘത്തോട് വെളിപ്പെടുത്തി. ചികിത്സ വൈകിപ്പിച്ചത് അപായപ്പെടുത്തണമെന്ന ഉദ്ദേശത്താലായിരിക്കാമെന്ന സംശയവും ഇവര്‍ ഉന്നയിച്ചു.
പാമ്ബ് കടിയെ തുട‌ര്‍ന്ന് ഉത്രയുടെ കാലില്‍ കാണപ്പെട്ട മുറിവുകളുടെ സ്ഥാനം സംശയം ജനിപ്പിച്ചിരുന്നുവെന്നും, എന്നാല്‍ വീട്ടുകാരാരും അത്തരം ഒരു സംശയം ഉന്നയിച്ചിരുന്നില്ല. പാമ്ബിനെ ഉപയോഗിച്ച്‌ ആളെ കൊല്ലാന്‍ ശ്രമിക്കുമെന്നും ചിന്തിച്ചില്ല. കണങ്കാലിന് മുകളിലും മുട്ടിന് താഴെയുമായുള്ള കടിയാണ് സംശയത്തിനിടയാക്കിയത്. വീടിന് പുറത്ത് വച്ച്‌ കടിയേറ്റതായാണ് ഉത്രയെ ആശുപത്രിയിലെത്തിച്ചവര്‍ പറഞ്ഞത്. നടന്നുപോകുന്ന ഒരാളെ അണലി കടിച്ചാല്‍ കാലില്‍ അത്രയും ഉയരത്തില്‍ കടിയേല്‍ക്കാറില്ല.
സ്വാഭാവികമായി അണലി കാലിനു മുകളിലേക്കു കയറി കടിക്കില്ല. എന്നാല്‍ ഉത്രയുടെ കാലിന്റെ ചിരട്ടഭാഗത്തിന് മുകളിലും, മുട്ടിന് താഴെയുമാണ് കടിയേറ്റത്. ഇതു സംശയം ജനിപ്പിക്കുന്നതാണ്. സൂരജ് അണലിയെക്കൊണ്ട് ഉത്രയെ കടിപ്പിച്ചുവെന്നതിനു നിര്‍ണായക തെളിവാണ് ഡോക്ടര്മാരുടെ മൊഴി. നാലു ഡോക്ടര്‍മാരുടെയും മൊഴി പ്രത്യേകം പ്രത്യേകമായാണ് രേഖപ്പെടുത്തിയത്. അത്യാഹിത വിഭാഗത്തില്‍ ഉത്രയെ പ്രവേശിപ്പിച്ചപ്പോള്‍ പരിശോധിച്ച ഡോക്ട‌ര്‍, അഡ്മിറ്റ് ചെയ്ത ഡോക്ട‌ര്‍, പാമ്ബിന്‍ വിഷം തിരിച്ചറിഞ്ഞ് ചികിത്സിച്ച ഡോക്ടര്മാര് എന്നിവരുടെ മൊഴികള്‍ കേസില്‍ നിര്ണായകമാണ്.
ഉത്രയ്ക്ക് നല്‍കിയ മരുന്നുകളും, ചികിത്സയുടെ വിശദാംശങ്ങളും, ആശുപത്രിയിലെ ചികിത്സാ രേഖകളുടെ വിശദാംശങ്ങളും അന്വേഷണ സംഘം ശേഖരിച്ചു. ഉത്ര ചികിത്സയില്‍ കഴിഞ്ഞ ദിവസങ്ങളില്‍ സൂരജിന്റെയും കുടുംബത്തിന്റെയും നീക്കങ്ങള്‍ നിരീക്ഷിക്കാനായി ആശുപത്രിയിലെ സിസി.ടിവി ക്യാമറകളുടെ ദൃശ്യങ്ങളും അന്വേഷണ സംഘം ആവശ്യപ്പെട്ടിട്ടുണ്ട്. വരും ദിവസങ്ങളില്‍ ദൃശ്യങ്ങള്‍ ക്യാമറയില്‍ നിന്ന് ശേഖരിക്കും.
കൂടാതെ തിരുവല്ലയിലെ ഡോക്ടര്‍മാര്‍ക്ക് പുറമേ പാമ്ബ് കടിയേറ്റ ഉത്രയെ ആദ്യം പ്രവേശിപ്പിച്ച അടൂര്‍ ഗവ.ആശുപത്രി ഡോക്ടര്മാരില് നിന്നുള്ള വിവരങ്ങളും അന്വേഷണ സംഘം ശേഖരിക്കും. ഇവിടെ ഉത്രയെ പ്രവേശിപ്പിച്ച സമയം കേസില്‍ നിര്ണായകമാണ്. പാമ്ബ് കടിയേറ്റ് എത്രസമയം കഴിഞ്ഞാണ് ചികിത്സ നല്‍കിയതെന്ന് തെളിയിക്കാന്‍ ഇത് മതിയാകും എന്നാണ് അന്വേഷണ സംഘത്തിന്റെ കണക്കുകൂട്ടൽ.. ഉത്രയുടെ സ്വര്‍ണം സൂക്ഷിച്ച അടൂരിലെ ബാങ്ക് ശാഖയിലും തെളിവെടുപ്പു നടത്തി. ലോക്കറില്‍ നിന്ന് സൂരജ് സ്വര്‍ണം പുറത്തെടുക്കുന്ന സിസിടിവി ദൃശ്യങ്ങളും, രേഖകളും ശേഖരിച്ച അന്വേഷണ സംഘം ഇടപാടുകളുമായി ബന്ധപ്പെട്ട് ബാങ്ക് മാനേജരുടെയും ലോക്കറിന്റെ ചുമതല വഹിച്ചിരുന്നവരുടെയും മൊഴികള്‍ രേഖപ്പെടുത്തി. ഉത്രയുടെ മരണവുമായി ബന്ധപ്പെട്ട് ഭര്‍ത്താവ് സൂരജിനെയും ഇയാള്‍ക്ക് പാമ്ബിനെ കൈമാറിയ സുഹൃത്ത് സുരേഷിനെയും കൊവിഡ് പരിശോധനാഫലം പുറത്തുവന്നാലുടന്‍ വനം വകുപ്പ് ഉദ്യോഗസ്ഥര്‍ കസ്റ്റഡിയില്‍ വാങ്ങും. കൊട്ടാരക്കര ജയിലില്‍ ഫോര്‍മല്‍ അറസ്റ്റിനുശേഷം നിരീക്ഷണത്തില്‍ തുടരുന്ന ഇവരെ വരുന്നയാഴ്ച കസ്റ്റഡിയില്‍ വിട്ടുകിട്ടുമെന്നാണ് വനം വകുപ്പ് ഉദ്യോഗസ്ഥരുടെ പ്രതീക്ഷ.
മരണം നടക്കുന്ന സമയത്തും അതിനടുത്ത ദിനങ്ങളിലുമായി ഉത്രയുടെ അഞ്ചലിലെ വീടിനു സമീപവും സൂരജിന്റെ വീട്ടിലും എത്തിയവരുടെ ഫോണ്‍ വിവരങ്ങള്‍ ശേഖരിക്കാൻ ടവര്‍ വിവരങ്ങളെടുക്കും. കേസില്‍ പ്രതികളായ സൂരജിന്റെയും പാമ്ബു പിടുത്തക്കാരന്‍ സുരേഷിന്റെയും അടക്കം ഫോണുകള്‍ നിലവില്‍ പൊലീസിന്റെ കയ്യിലാണ്. മരണ ദിവസം ഉത്ര ധരിച്ചിരുന്ന വസ്ത്രത്തില്‍ പാമ്ബിന്റെ ശരീര അവശിഷ്ടങ്ങളുടെ സാന്നിധ്യം കണ്ടെത്താനായി വസ്ത്രങ്ങള്‍ തിരുവനന്തപുരം രാജീവ്ഗാന്ധി സെന്റര്‍ ഫോര്‍ ബയോടെക്‌നോളജിയിലേക്ക് അയച്ചു. കോടതിയുടെ അനുമതിയോടെ നൈറ്റിയും പാവാടയും കിടക്കവിരിയുമാണ് നല്‍കിയത്.
സൂരജ് പ്ലാസ്റ്റിക് ടിന്നില്‍ കൊണ്ടു വന്ന അതേ പാമ്ബാണ് ഉത്രയെ കടിച്ചതെന്നു ശാസ്ത്രീയ പരിശോധനയില്‍ തെളിഞ്ഞിരുന്നു. ഉത്രയുടെ വസ്ത്രങ്ങളിലും പാമ്ബിന്റെ ശരീര സാംപിളുകള്‍ ഉണ്ടെന്നാണു നിഗമനം. പ്ലാസ്റ്റിക് ടിന്നില്‍ നിന്ന് ഉത്രയുടെ ശരീരത്തിലേക്ക് സൂരജ് പാമ്ബിനെ വിടുകയായിരുന്നു. ശരീരത്തിലൂടെ ഇഴഞ്ഞ് ഇടതു കൈത്തണ്ടയില്‍ പാമ്ബ് കൊത്തി. നാല് മുറിവുകള്‍ ഉണ്ടായി. ഉറക്കഗുളിക നല്‍കി ബോധം കെടുത്തിയതിനാല്‍ പാമ്ബ് കടിച്ച വിവരം ഉത്ര അറിഞ്ഞില്ലെന്നാണ് സൂരജ് പൊലീസിനു നല്‍കിയ മൊഴി. കേസില്‍ രണ്ടാംഘട്ട അന്വേഷണവും തുടങ്ങി. ഇതിനിടെയാണ് പാമ്ബ് കടിത്തം ഉറപ്പിക്കാനുള്ള തെളിവുകള്‍ പൊലീസിന് പരമാവധി കിട്ടുന്നത്. ഗൂഢാലോചന അന്വേഷണത്തിലൂടെ കുടുംബാംഗങ്ങളുടെ ഇടപെടല്‍ കണ്ടെത്താനാകും ശ്രമിക്കുക.
https://www.facebook.com/Malayalivartha
