പ്രളയ മുന്‍കരുതലായി അഴിമുഖത്ത് നിന്നും നീക്കം ചെയ്ത മണല്‍ വീണ്ടും അതേ സ്ഥലത്തു തന്നെ അടിഞ്ഞുകൂടുന്നു. പദ്ധതിക്കായി പണം ചെലവഴിച്ചത് വെറുതെയായി. നീക്കം ചെയ്ത മണല്‍ അഴിമുഖത്തു തന്നെ കൂട്ടിയിട്ടതിനാലാണ് പണിപാളിയത്. പുഴയില്‍ വീതികൂട്ടിയ ഭാഗം ഇതോടെ വീണ്ടും ചുരുങ്ങി. വള്ളങ്ങള്‍ക്കു വരാനും പോകാനും കഴിയാത്ത അവസ്ഥയാണിപ്പോള്‍.

മഴക്കാലത്തിനു മുന്നോടിയായി നടപ്പാക്കിയ മുന്‍കരുതല്‍ ദിവസങ്ങള്‍ക്കൊണ്ടു തന്നെ പഴയപടിയായത് കൂടുതല്‍ ആശങ്ക ഉയര്‍ത്തുകയാണ്. കാഞ്ഞിരമുക്ക് പുഴ കടലിനോടു ചേരുന്ന പുതുപൊന്നാനി മുനമ്പം അഴിമുഖത്താണ് മണല്‍തിട്ട ഭീതി ഉയര്‍ത്തുന്നത്. ഇറിഗേഷന്‍ വകുപ്പിന്റെ നേതൃത്വത്തില്‍ മണ്ണുമാന്തി യന്ത്രം ഉപയോഗിച്ചാണ് മണല്‍തിട്ട നീക്കം ചെയ്യാന്‍ ശ്രമം നടന്നത്.

കടവനാട്, പുറങ്ങ്, വെളിയങ്കോട്, മാട്ടുമ്മല്‍ തുടങ്ങിയ പ്രദേശങ്ങളിലെ മഴവെള്ളം ഒഴുകി കടലിലെത്താനുള്ള പ്രധാന കവാടമാണിത്. ഈ ഭാഗത്ത് വീണ്ടും മണല്‍തിട്ട രൂപപ്പെട്ടു കഴിഞ്ഞാല്‍ തീരമേഖല വെള്ളത്തിനടിയിലാകും.

നീക്കം ചെയ്യുന്ന മണല്‍ അഴിമുഖത്തിനു പുറത്തേക്കു മാറ്റണമെന്ന് നാട്ടുകാര്‍ ആവശ്യപ്പെട്ടിരുന്നെങ്കിലും അധികൃതര്‍ വേണ്ട പരിഗണന നല്‍കിയില്ല. ഭാരതപ്പുഴയില്‍ പല ഭാഗങ്ങളിലും ഇത്തരത്തില്‍ മണല്‍ തിട്ടകള്‍ നീക്കം ചെയ്യാന്‍ നടപടി സ്വീകരിച്ചിട്ടുണ്ട്. പക്ഷേ, പ്രളയത്തെ ചെറുക്കാന്‍ താല്‍ക്കാലിക തട്ടിക്കൂട്ടല്‍ യാതൊരു തരത്തിലും പ്രയോജനപ്പെടില്ലെന്ന് പ്രദേശവാസികള്‍ ചൂണ്ടിക്കാട്ടുന്നു.