പുല്‍പള്ളി സഹകരണ ബാങ്കിലെ വായ്പാ വിതരണത്തില്‍ വന്ന പാളിച്ച മൂലം ബാങ്കിനു നഷ്ടമായ 7.26 കോടി രൂപ ഉത്തരവാദികളില്‍നിന്ന് ഈടാക്കാന്‍ ഉത്തരവ്. സഹകരണ നിയമപ്രകാരം മുന്‍ പ്രസിഡന്റ് കെ.കെ.ഏബ്രഹാം, ഭരണസമിതി അംഗങ്ങള്‍, മുന്‍ സെക്രട്ടറി കെ.ടി.രമാദേവി, മുന്‍ ഇന്റേണല്‍ ഓഡിറ്റര്‍ പി.യു.തോമസ് എന്നിവരില്‍ നിന്ന് സര്‍ചാര്‍ജ് ചെയ്യാനാണ് സഹകരണ വകുപ്പ് ജോയിന്റ് റജിസ്ട്രാറുടെ ഉത്തരവ്. 2 മാസത്തിനകം തുക അടയ്ക്കാത്ത പക്ഷം റവന്യു റിക്കവറിയിലൂടെ സ്വത്തുക്കളില്‍നിന്ന് ഈടാക്കും.

സഹകരണ വകുപ്പ് സ്വീകരിച്ച എല്ലാ നടപടികളും ഹൈക്കോടതി ശരിവെച്ചതിനാലാണു തുടര്‍നടപടിയെന്ന് ഉത്തരവില്‍ പറയുന്നു. കൃത്യമായ സ്ഥലപരിശോധന നടത്താതെ ഭരണസമിതി വഴിവിട്ട് വായ്പ നല്‍കുകയും ഇതു ബാങ്കിന് വന്‍ ബാധ്യത വരുത്തിയെന്നും പരിശോധനയില്‍ കണ്ടെത്തി.
ക്രമക്കേടിനെ തുടര്‍ന്ന് 2018 ഡിസംബറില്‍ അന്നത്തെ ഭരണസമിതിയെ പിരിച്ചുവിടുകയും പി.കെ.വിജയന്‍ അഡ്മിനിസ്‌ട്രേറ്ററായി ഭരണം ഏറ്റെടുക്കുകയും ചെയ്തു.

ഭരണസമിതിയുടെ അറിവോടെ കൊല്ലപ്പള്ളില്‍ സജീവന്‍ എന്ന അംഗത്തിന്റെ അക്കൗണ്ടിലൂടെ 1.64 കോടി രൂപ പിന്‍വലിച്ചതായും വില കുറഞ്ഞ സ്ഥലത്തിന് കൂടിയ വായ്പ അനുവദിക്കുകയും മുക്ത്യാര്‍ ഉപോഗിച്ച് ബാങ്ക് പരിധിക്ക് പുറത്തുള്ളവര്‍ക്കും ക്രമവിരുദ്ധമായി വായ്പ അനുവദിച്ചുവെന്നും വ്യക്തമായി. സജീവന്റെ അക്കൗണ്ടിലൂടെ 1.64 കോടി രൂപ പിന്‍വലിച്ചത് സംബന്ധിച്ച് വിജിലന്‍സ് കേസും നിലവിലുണ്ട്.

അതേസമയം, തികച്ചും രാഷ്ട്രീയ ഗൂഡാലേചനയുടെ ഫലമാണ് പുതിയ ഉത്തരവെന്ന് മുന്‍ പ്രസിഡന്റും കെപിസിസി സെക്രട്ടറിയുമായ കെ.കെ.ഏബ്രഹാം പറഞ്ഞു. ബാങ്ക് നല്‍കിയ വായ്പയെല്ലാം നിയമാനുസൃതമാണ്.ആവശ്യമായ വസ്തു ഈടിന്മേല്‍ നിയമപരമായ നടപടികള്‍ പൂര്‍ത്തീകരിച്ചാണു വായ്പ നല്‍കിയത്. വായ്പക്കാരന്റെ പണയ വസ്തുവില്‍നിന്നാണു തുക ഈടാക്കേണ്ടത്.

വായ്പക്കാര്‍ വായ്പ തിരിച്ചടയ്ക്കാന്‍ അവസരവും സാവകാശവും ആവശ്യപ്പെട്ട് ഹൈക്കോടതിയെ സമീപിച്ചു. അനുകൂല വിധിയും കോടതിയില്‍ നിന്നുണ്ടായി. ഈ സാഹചര്യത്തില്‍ സഹകരണ വകുപ്പിലെ ബന്ധപ്പെട്ട ഉദ്യോഗസ്ഥര്‍ വ്യക്തിവിരോധം തീര്‍ക്കാനുള്ള ശ്രമമാണ് നടത്തുന്നതെന്നും ഹൈക്കോടതിയില്‍ കേസ് നല്‍കുകയെന്നത് തെറ്റായ കാര്യമാണെന്നും അതു നിയമപരമായി പരിശോധിക്കാവുന്നതാണെന്നും മുന്‍ പ്രസിഡന്റ് പറഞ്ഞു.