അടിമാലിയില്‍ 17കാരി തൂങ്ങിമരിച്ച സംഭവത്തില്‍ കൂടുതൽ നിർണായക വിവരങ്ങൾ. സംഭവവുമായി ബന്ധപ്പെട്ട് മൂന്ന് യുവാക്കള്‍ നിരീക്ഷണത്തില്‍. തൊടുപുഴ, ഉപ്പുതറ, മാങ്കുളം സ്വദേശികളാണ് നിരീക്ഷണത്തിലുള്ളത്. ഇവരെ അടിമാലി പൊലീസ് കസ്റ്റഡിയിലെടുത്ത് ചോദ്യം ചെയ്യും. 17 കാരിക്കൊപ്പം വീട്ടില്‍നിന്നും ഒളിച്ചുകടന്ന 21കാരിയെ ചോദ്യം ചെയ്തതോടെയാണ് നിർണായക വിവരം പൊലീസിന് ലഭിച്ചത്.

വിഷം കഴിച്ച്‌ ആത്മഹത്യക്ക് ശ്രമിച്ച യുവതി ഇപ്പോൾ എറണാകുളത്തെ ഒരു ആശുപത്രിയില്‍ ചികിത്സയിലാണ്. 17 കാരിയുടെ മൊബൈല്‍ഫോണ്‍ കണ്ടെത്തിയതായും സൂചനയുണ്ട്. നിരീക്ഷണത്തിലുള്ള ഒരു യുവാവാണ് 17കാരിക്ക് മൊബൈല്‍ ഫോണ്‍ നല്‍കിയത്. രാത്രിയും പകലും മകളെ ആരോ മൊബൈലില്‍ വിളിച്ച്‌ സംസാരിച്ചിരുന്നതായി 17കാരിയുടെ അമ്മ പൊലീസിനോട് വ്യക്തമാക്കിയിരുന്നു.

ഒരു വര്‍ഷം മുമ്ബ് പനി ബാധിച്ചതിനെ തുടര്‍ന്ന് അടിമാലി അശുപത്രിയില്‍ എത്തിയപ്പോഴാണ് യുവാവും 17കാരിയും തമ്മിൽ പരിചയത്തിലാകുന്നത്. പരിജയം പ്രണയത്തിലേക്ക് വഴിമാറുകയായിരുന്നു. തുടര്‍ന്നാണ് ഈ യുവാവ് പെണ്‍കുട്ടിക്ക് മൊബൈല്‍ഫോണ്‍ സമ്മാനിച്ചത്. 17കാരിയുടെ അടുത്ത കൂട്ടുകാരിയായിരുന്നു 21കാരി.

പ്രണയം വളർന്നതോടെ ജീവനൊടുക്കിയ പെണ്‍കുട്ടിയുടെ മാതാവ് പെണ്‍കുട്ടിയെ ശകാരിച്ചു. പ്രണയത്തില്‍ നിന്നും പിന്തിരിയണമെന്ന് ആവശ്യപ്പെടുകയും ചെയ്തു. എന്നാല്‍, പെണ്‍കുട്ടി കൂട്ടുകാരിയെ വിളിച്ച്‌ കാമുകനോടൊപ്പം പോവുകയാണെന്ന് പറയുകയായിരുന്നു. കൂട്ടുകാരിയാവട്ടെ ഞാനും വരുന്നുവെന്ന് പറഞ്ഞ് വീടുവിട്ടു. തങ്ങളെ കൂട്ടിക്കൊണ്ടു പോവാന്‍ എത്തണമെന്ന് 17കാരി പറഞ്ഞെങ്കിലും അവര്‍ എത്തിയില്ല. തുടര്‍ന്ന് വീടിനു സമീപമുള്ള വലിയ ഒരു മരത്തിന്റെ പൊത്തില്‍ ഇവര്‍ ഒളിക്കുകയായിരുന്നു.

പാതിരാത്രി ആയിട്ടും കാമുകന്‍ എത്തില്ലെന്ന് മനസിലായതോടെ ബന്ധുവായ പഞ്ചായത്ത് പ്രസിഡന്റിന്റെ വീട്ടില്‍ ഇരുവരും അഭയം തേടി. ഇരുവരെയും അനുനയിപ്പിച്ച്‌ പ്രസിഡന്റ് രാവിലെതന്നെ വീട്ടിലേക്ക് പറഞ്ഞയച്ചു. ഇതിനിടയില്‍ ഇവരെ കാണാതായതോടെ മാതാപിതാക്കള്‍ അടിമാലി പൊലീസില്‍ പരാതി നല്‍കിയിരുന്നു.

വീട്ടിലെത്തിയ ഇരുവരെയും മാതാപിതാക്കള്‍ ശാസിച്ചു. കേസ് പിന്‍വലിക്കാന്‍ മാതാവ് സ്റ്റേഷനിലേക്ക് പോയപ്പോഴാണ് 17 കാരി രാത്രിയില്‍ ഒളിവില്‍ പാര്‍ത്ത മരത്തില്‍ തൂങ്ങിയത്. 21കാരിയാവട്ടെ വിഷം കഴിച്ച്‌ ആത്മഹത്യയ്ക്ക് ശ്രമിച്ച്‌ ആശുപത്രിയിലായി.

അടിമാലി സി.ഐ അനില്‍ ജോര്‍‌ജിന്റെ നേതൃത്വത്തിലുള്ള സംഘമാണ് കേസ് അന്വേഷിക്കുന്നത്. കഴിഞ്ഞ 11നാണ് ഇരുവരും വീടുകളില്‍നിന്നും ഇറങ്ങിപ്പോയത്. 17കാരി തൂങ്ങിമരിച്ചതാണെന്നാണ് പോസ്റ്റുമോര്‍ട്ടം റിപ്പോര്‍ട്ട്. കൈകളില്‍ മൂന്നിടത്ത് ഉരഞ്ഞ പാടുകളുണ്ട്.