വീട്ടമ്മയുടെ ജീവനെടുക്കാൻ കാരണമായത് അനീല്‍ഡ് ഗ്ലാസ്; വീട്ടിലോ സ്ഥാപനത്തിലോ ചില്ലിടുമ്പോൾ ശ്രദ്ധിക്കുക
പെരുമ്പാവൂരില്‍ ബാങ്കിന്റെ ചില്ല് തകര്‍ന്നുണ്ടായ അപകടത്തില്‍ യുവതി മരിച്ച സംഭവം ദുഃഖം ഉളവാക്കിയിരുന്നു . ചില്ലിന്റെ ഗുണ നിലവാര കുറവാണ് അപകട കാരണമെന്നാണ് ബന്ധുക്കൾ പറഞ്ഞിരുന്നു. ചില്ലുവാതിലില്‍ ഇടിച്ച് അപൂര്‍വങ്ങളില്‍ അപൂര്‍വമായ ഒരു അപകടത്തിലേക്കും പിന്നെ മരണത്തിലേക്കും ബീന എന്ന വീട്ടമ്മയെ നയിച്ചത്അ നീല്‍ഡ് ഗ്ലാസ് ആണ് . ചില്ലുവാതില്‍ നിര്‍മിക്കുമ്പോള്‍ ശ്രദ്ധിക്കാതെ പോകുന്ന ചില പിഴവുകള്‍ക്കു നല്‍കേണ്ടി വന്ന വലിയ വിലയാണ് ബീനയുടെ ജീവനെന്നും ഈ രംഗത്തെ വിദഗ്ദ്ധര്‍ ചൂണ്ടിക്കാട്ടുന്നു. ഗ്ലാസ് ചൂടാക്കി തണുപ്പിച്ച് ആന്തരിക സമ്മര്‍ദം കളഞ്ഞ് ദൃഢീകരിക്കുന്ന പ്രക്രിയയാണ് അനീലിങ് എന്ന് പറയുന്നത് . പൊട്ടുമ്പോള്‍ വലിയ ചില്ലുകഷണങ്ങളായാണ് അനീല്‍ഡ് ഗ്ലാസ് പതിക്കുക. ഇത് വലിയ അപകടങ്ങള്‍ക്കിടയാക്കും. പെരുമ്പാവൂരില്‍ സംഭവിച്ചതും ഇതായിരുന്നു . ടഫന്‍ഡ് ഗ്‌ളാസ് ആയിരുന്നെങ്കില്‍ അപകടം ഒഴിവാക്കാൻ സാധിക്കുമായിരുന്നു . . ഇതിന്റെ പശ്ചാത്തലത്തിൽ വീടായാലും സ്ഥാപനങ്ങളായാലും ചില്ല് എങ്ങനെ വേണമെന്ന് വിദഗ്ദ്ധര്‍ പറയുന്നു
വീടായാലും സ്ഥാപനങ്ങളായാലും നിര്‍മാണത്തില്‍ ഉപയോഗിക്കേണ്ട ഗ്ലാസിന്റെ സുരക്ഷയില്‍ അതീവ ശ്രദ്ധ വേണമെന്ന് ഈ രംഗത്ത് വിദഗ്ദ്ധർ പറയുന്നു. വാതിലില്‍ ഫ്രെയിമിന് അകത്ത് ഇടുന്ന ഗ്ലാസാണെങ്കില്‍ അതിനു കുറഞ്ഞത് പത്തു മുതല്‍ 12 എം.എം. വരെ കനമുണ്ടായിരിക്കണം. ഫ്രെയിം ഇല്ലാതെ ഉപയോഗിക്കുന്ന ടഫന്‍ഡ് ഗ്ലാസ് ആണെങ്കില്‍ അതിനും കുറഞ്ഞത് 12 എം.എം. കനമുണ്ടായിരിക്കണം. ഇതൊന്നും ശ്രദ്ധിക്കാതെ കുറഞ്ഞ കനത്തിലുള്ള ഗ്ലാസ് ഉപയോഗിക്കുന്നതാണ് പലപ്പോഴും അപകടങ്ങള്‍ക്കു കാരണമാകുന്നതെന്നും വിദഗ്ദ്ധർ ചൂണ്ടിക്കാണിക്കുന്നു.
സ്ഥാപനങ്ങളിലെ ചില്ലുവാതില്‍ ആകുമ്പോള്‍ ഒരുപാടുപേര്‍ വന്ന് തള്ളിത്തുറക്കാന്‍ സാധ്യതയുണ്ട്. അതിനാല്‍ ഇവിടങ്ങളില്‍ സേഫ്റ്റി ലാമിനേറ്റഡ് ഗ്ലാസുകളാണ് സുരക്ഷ ഉറപ്പാക്കാന്‍ വാതിലുകളില്‍ ഉപയോഗിക്കേണ്ടത്. ഇത്തരം ഗ്ലാസുകള്‍ ഇട്ട വാതിലുകള്‍ പെട്ടെന്ന് പൊട്ടില്ല. ഇനി ഏതെങ്കിലും കാരണവശാല്‍ പൊട്ടിയാല്‍ തന്നെ അതു ചിലന്തിവല പോലെ നിലനില്‍ക്കും. ഒരു കഷണം പോലും താഴെ വീഴുകയുമില്ല. ശക്തമായ ഇടിയില്‍ പൊട്ടി താഴെ വീണാല്‍ തന്നെ അത് പൊടി പൊടിയായി മാത്രമേ നിലത്തേക്ക് പതിക്കുകയുള്ളൂ. വാതിലുകളിലും മറ്റും ഗ്ലാസ് പിടിപ്പിക്കുമ്പോള്‍ അതീവ ശ്രദ്ധ വേണമെന്ന കാര്യം അടിവരയിടുന്നതാണ് പെരുമ്പാവൂരിലെ അപകടമെന്നും വിദഗ്ദ്ധര്‍ ചൂണ്ടിക്കാട്ടുന്നു. നിര്‍മാണ കരാര്‍ എടുത്തവര്‍ സുരക്ഷാ നിലവാരം കുറഞ്ഞ ഗ്ലാസ് ഉപയോഗിക്കുന്നത് സാമ്പത്തിക ലാഭം നോക്കിയാകാം. ഗ്ലാസിന്റെ സുരക്ഷാ കനത്തെക്കുറിച്ച് വേണ്ടത്ര അവബോധമില്ലാത്തതും മറ്റൊരു കാരണമാകാം. കൃത്യമായ സുരക്ഷാ കനത്തിലുള്ള ഗ്ലാസിന്റെ മുകളിലൂടെ മനുഷ്യര്‍ ചവിട്ടി നടന്നാല്‍ പോലും അപകടമുണ്ടാകില്ല. കേരളത്തിലെ ചില ഷോപ്പിങ് മാളുകളിലും ഹോട്ടലുകളിലും ഒക്കെ ഇട്ടിരിക്കുന്ന ഗ്ലാസുകള്‍ ഉദാഹരണമായി ചൂണ്ടിക്കാട്ടുന്നു.
https://www.facebook.com/Malayalivartha
