ചെലവുചുരുക്കലിനെക്കുറിച്ചു പഠിക്കാന്‍ നിയോഗിച്ച സമിതിയില്‍ നിന്നും, ലീവ് സറണ്ടര്‍ നിര്‍ത്തലാക്കണമെന്ന നിര്‍ദേശം സര്‍ക്കാര്‍ എഴുതിവാങ്ങിയതായി റിപ്പോര്‍ട്ട്. ചെലവു ചുരുക്കലിന്റെ ഭാഗമായി ജീവനക്കാരുടെ ആനുകൂല്യങ്ങള്‍ വെട്ടിക്കുറയ്ക്കാന്‍ സംസ്ഥാന സര്‍ക്കാര്‍ നടപടി തുടങ്ങി. 

സിഡിഎസ് ഡയറക്ടര്‍ പ്രഫ.സുനില്‍ മാണി സമര്‍പ്പിച്ച ഇടക്കാല റിപ്പോര്‍ട്ടിലെ ശുപാര്‍ശ, എല്ലാ വര്‍ഷവും ലീവ് സറണ്ടറിന് അവസരം നല്‍കാതെ 300 അവധി വരെ കൂട്ടിവച്ച്, വിരമിക്കുമ്പോള്‍ പണം നല്‍കണമെന്നാണ്.

മന്ത്രിമാരുടെ പഴ്‌സനല്‍ സ്റ്റാഫിന്റെ എണ്ണം വെട്ടിക്കുറയ്ക്കണമെന്ന നിര്‍ദേശം സമിതി യോഗങ്ങളില്‍ ഉയര്‍ന്നെങ്കിലും റിപ്പോര്‍ട്ടിലില്ല. സര്‍ക്കാര്‍ ഇടപെട്ട് ഈ നിര്‍ദേശം ഒഴിവാക്കിയെന്നാണു സൂചന. 20 മന്ത്രിമാര്‍ക്കായി 480 പഴ്‌സനല്‍ സ്റ്റാഫാണ് ഇപ്പോഴുള്ളത്. ഇവര്‍ക്കു ശമ്പളത്തിനായി പ്രതിമാസം ചെലവ് 2 കോടി രൂപയിലേറെ. പെന്‍ഷന്‍ പ്രായം 58 ആക്കി ഉയര്‍ത്തണമെന്നു ശുപാര്‍ശയുണ്ടെങ്കിലും ഇതു സര്‍ക്കാര്‍ അംഗീകരിക്കില്ല.

മറ്റ് പ്രധാന ശുപാര്‍ശകള്‍ ഇപ്രകാരമാണ്.

2 വര്‍ഷത്തേക്കു സര്‍ക്കാര്‍, എയ്ഡഡ് സ്ഥാപനങ്ങളില്‍ പുതിയ തസ്തിക അരുത്. താല്‍ക്കാലിക തസ്തികകള്‍ ഇപ്പോള്‍ പാടില്ല. സ്‌കൂളുകളിലെ ദിവസവേതനക്കാര്‍ക്ക് അവധിക്കാല ശമ്പളം വേണ്ട. എയ്ഡഡ് മേഖലയിലെ ലീവ് വേക്കന്‍സി അവസാനിപ്പിക്കണം.

വിദേശപര്യടനം, മേളകള്‍, പ്രദര്‍ശനങ്ങള്‍ തുടങ്ങിയവ ഇപ്പോള്‍ വേണ്ട. ഓഫിസുകള്‍ കംപ്യൂട്ടര്‍വല്‍ക്കരിച്ചതിനാല്‍ ജീവനക്കാരുടെ വിന്യാസം പുനര്‍നിര്‍ണയിക്കണം. ശമ്പളമില്ലാത്ത അവധി പരമാവധി 5 വര്‍ഷം.

സര്‍ക്കാര്‍ ഓഫിസുകള്‍ ആഴ്ചയില്‍ 5 ദിവസം മതി. ശനിയാഴ്ച വര്‍ക് ഫ്രം ഹോം. ഫര്‍ണിച്ചര്‍, വാഹനം വാങ്ങല്‍ എന്നിവ ഒരു വര്‍ഷത്തേക്കു വേണ്ട.
ലഘുലേഖകളുടെയും പ്രസിദ്ധീകരണങ്ങളുടെയും അച്ചടി ഒഴിവാക്കണം.

വിദ്യാര്‍ഥികളുടെ 30% മാര്‍ക്ക് ഓണ്‍ലൈന്‍ പഠനത്തിനായി മാറ്റിവയ്ക്കണം. വിദ്യാര്‍ഥികള്‍ക്കുള്ള സ്‌കോളര്‍ഷിപ്പുകള്‍ കേന്ദ്ര മാനദണ്ഡം അനുസരിച്ചു മതി. 2 വര്‍ഷത്തിലേറെയായി പ്രവര്‍ത്തിക്കുന്ന അന്വേഷണ കമ്മിഷനുകളുടെ കാലാവധി 2 മാസത്തിനുള്ളില്‍ അവസാനിപ്പിക്കണം. സര്‍ക്കാര്‍ കെട്ടിടങ്ങളും വാഹനങ്ങളും കഴിയുമെങ്കില്‍ വാടകയ്ക്കു നല്‍കണം.

ഒരേ പ്രവൃത്തി ചെയ്യുന്ന പൊതുമേഖലാ സ്ഥാപനങ്ങളെ ലയിപ്പിക്കണം. 3 - 5 കിലോമീറ്റര്‍ പരിധിയിലെ കുട്ടികളില്ലാത്ത സ്‌കൂളുകള്‍ ലയിപ്പിക്കണം.
ആഴ്ചയില്‍ 16 മണിക്കൂര്‍ ജോലിയുണ്ടെങ്കിലേ എയ്ഡഡ്, ഗവ. കോളജുകളില്‍ പുതിയ തസ്തിക സൃഷ്ടിക്കാവൂ.