ഭര്‍ത്താവിനെ വ്യാജമദ്യ കേസില്‍ കുടുക്കാന്‍ ശ്രമിച്ച ഭാര്യയും മകനും പിടിയില്‍
വര്‍ക്കല അയിരൂര്‍ ചാവര്‍ക്കോട് മലവിള സജിന വീട്ടില്‍ വിജയന്റെ(72) പേരിലുള്ള സ്വത്തിന്റെ പേരില്‍ വര്‍ഷങ്ങളായി നിലനില്‍ക്കുന്ന തര്‍ക്കത്തെ തുടര്‍ന്നുള്ള വൈരാഗ്യത്തില്‍ ഭര്‍ത്താവിനെ വ്യാജമദ്യ കേസില്‍ കുടുക്കാന്‍ ഭാര്യയും മകനും ശ്രമം നടത്തി.
വീട്ടില്‍നിന്നു മാറിത്താമസിക്കുന്ന ഭാര്യ പ്രസന്നയും(70) മകന്‍ സജിനും(34) നടത്തിയ ഗൂഢാലോചന വര്‍ക്കല എക്‌സൈസ് ഇന്‍സ്‌പെക്ടര്‍ മഹേഷിന്റെ അവസരോചിതമായ ഇടപെടല്‍ കാരണം പൊളിഞ്ഞു.
അഞ്ച് ലീറ്റര്‍ വാറ്റുചാരായവും, നാലു ലീറ്റര്‍ വിദേശ മദ്യവും മിനറല്‍ വെള്ളവും കുപ്പികളിലാക്കി ആകെ 9 ലീറ്റര്‍ വ്യാജ മദ്യം വിജയന്റെ വീടിനു പുറകിലെ തൊഴുത്തില്‍ ഒളിപ്പിച്ചു വച്ചതിനുശേഷം മകന്‍ സജിന്‍ എക്‌സൈസിനെ വിളിച്ചു വിവരമറിയിക്കുകയായിരുന്നു. തുടര്‍ന്നു ഇന്‍സ്‌പെക്ടര്‍ മഹേഷിന്റെ നേതൃത്വത്തില്‍ കഴിഞ്ഞ ദിവസം സ്ഥലത്തെത്തി മദ്യം പിടികൂടി വിജയനെ ചോദ്യം ചെയ്‌തെങ്കിലും തെളിവുകളുടെ അഭാവത്തില്‍ വിട്ടയച്ചു.
എന്നാല്‍ മദ്യം ഇരിക്കുന്ന സ്ഥലത്തിന്റെ ഫോട്ടോ എക്‌സൈസ് ഇന്‍സ്‌പെക്ടറുടെ മൊബൈലിലേക്ക് വിദേശത്തുള്ള ഒരാള്‍ അയച്ചുകൊടുത്തത് സംശയത്തിന് ഇടയാക്കി. ഫോട്ടോ പരിശോധിച്ചതില്‍, ചിത്രം എടുക്കാന്‍ വീട്ടില്‍ നിന്ന് ഒരാള്‍ സഹായിച്ചെന്നു മനസ്സിലായതോടെ സിസിടിവി ദൃശ്യങ്ങള്‍ പരിശോധിച്ചു. ഇതില്‍ പ്രസന്നയും സജിനും 17-ാം തീയതി മദ്യം കണ്ടെടുത്ത സ്ഥലത്ത് നില്‍ക്കുന്നതായി കണ്ടു.
ഇരുവര്‍ക്കുമെതിരെ ജാമ്യമില്ലാ വകുപ്പ് പ്രകാരമാണു കേസ്. പ്രബേഷനറി ഓഫിസര്‍ ദേവലാല്‍, സിഇഒമാരായ പ്രിന്‍സ്, മഞ്ചുനാഥ്, മുഹമ്മദ് ഷെരീഫ്, ശ്രീജിത്ത് മിറാന്‍ഡ എന്നിവരുള്‍പ്പെട്ട സംഘമാണ് കേസ് അന്വേഷിച്ചത്.
https://www.facebook.com/Malayalivartha
