വീടുകളില്‍ റെയ്ഡ് നടത്തി അനര്‍ഹമായി കൈവശം വച്ച റേഷന്‍ കാര്‍ഡുകള്‍ പിടിച്ചെടുത്തു
സിവില്‍ സപ്ലൈസ് വകുപ്പ് കോഴിക്കോട് താലൂക്കിലെ രാമനാട്ടുകര, പെരുമുഖം, ഫറോക്ക് തുടങ്ങിയ സ്ഥലങ്ങളിലെ വീടുകളില്‍ റെയ്ഡ് നടത്തുന്നു. അനര്‍ഹമായി കൈവശം വച്ചിരിക്കുന്ന റേഷന്‍ കാര്‍ഡുകള്‍ കണ്ടെത്താനാണ് നടപടി.
സര്‍ക്കാര്‍ മാനദണ്ഡപ്രകാരം 1,000 ചതുരശ്ര അടിയില്‍ കൂടുതല്‍ വിസ്തൃതിയുള്ള വീടുള്ളവര്‍, നാലുചക്ര വാഹനങ്ങള്‍ സ്വന്തമായുള്ളവര്‍, വിദേശത്ത് ഉയര്‍ന്ന വരുമാനം കൈപ്പറ്റുന്നവര്‍, ഉദ്യോഗസ്ഥര്‍ തുടങ്ങിയവര്‍ അംഗങ്ങളായ കാര്‍ഡുടമകള്‍ക്കു മുന്‍ഗണന വിഭാഗത്തിലുള്ള റേഷന്‍ കാര്‍ഡുകള്‍ കൈവശം വയ്ക്കാന്‍ അര്‍ഹതയില്ല.
റെയ്ഡില്‍ അനര്‍ഹമായി കൈവശം വച്ച മുന്‍ഗണന, സബ്‌സിഡി വിഭാഗം റേഷന്‍ കാര്‍ഡുകളാണ് താലൂക്ക് സപ്ലൈ ഓഫിസറുടെ നേതൃത്വത്തിലുള്ള പരിശോധനാ സ്‌ക്വാഡ് പിടിച്ചെടുത്തത്. ഇരുനില വീട്, വാഹനങ്ങള്‍, ഉദ്യോഗസ്ഥര്‍, സാമ്പത്തികമായി മുന്നാക്കം നില്‍ക്കുന്നവര്‍ തുടങ്ങിയവര്‍ ഉള്‍പ്പെട്ട കാര്‍ഡുകളാണ് പിടിച്ചെടുത്തത്.
പിടിച്ചെടുത്ത കാര്‍ഡുകള്‍ പൊതുവിഭാഗത്തിലേക്ക് മാറ്റുകയും അനര്‍ഹമായി കൈപ്പറ്റിയ റേഷന്‍ സാധനങ്ങളുടെ വിപണി വിലയും പിഴയും ഈടാക്കുന്നതിന് നടപടികളും ഭക്ഷ്യഭദ്രതാ നിയമപ്രകാരം നിയമ നടപടികളും സ്വീകരിക്കുകയും ചെയ്യും. വരും ദിവസങ്ങളിലും പരിശോധന ഉണ്ടാകും. പൊതുജനങ്ങള്‍ക്ക് പരാതികള്‍ അറിയിക്കാം. 0495 2374885.
പരിശോധനയില്‍ താലൂക്ക് സപ്ലൈ ഓഫിസര്‍ എന്‍.കെ.ശ്രീജ, റേഷനിങ് ഇന്‍സ്‌പെക്ടര്‍മാരായ ആര്‍.മോഹന്‍കുമാര്‍, കെ.ബാലകൃഷ്ണന്‍, പി.കെ.മൊയ്തീന്‍ കോയ എന്നിവര്‍ പങ്കെടുത്തു.
https://www.facebook.com/Malayalivartha
