അമ്പുകുത്തി സ്‌കൂളിന് മികച്ച ജൈവ വൈവിധ്യ ഉദ്യാനത്തിനുള്ള സംസ്ഥാനതല പുരസ്‌കാരം
വയനാട് ജില്ലയിലെ അമ്പുകുത്തി ജിഎല്‍പി സ്‌കൂള്‍ നാടിന് അഭിമാനമായി. വിദ്യാര്‍ഥികളും അധ്യാപകരുമെല്ലാം ചേര്‍ന്നു 2018-മുതല്‍ ഒരുക്കി സംരക്ഷിക്കുന്ന ജൈവ വൈവിധ്യ ഉദ്യാനത്തിന് സംസ്ഥാനതല അംഗീകാരം ലഭിച്ചു. വിദ്യാഭ്യാസ വകുപ്പിന്റെ സംസ്ഥാനതല പുരസ്‌കാരമാണ് മികച്ച ജൈവവൈവിധ്യ ഉദ്യാനം തയാറാക്കിയതിന് അമ്പുകുത്തി ജിഎല്‍പി സ്‌കൂള്‍ നേടിയത്.
ലോക്ഡൗണില്‍ സ്‌കൂള്‍ അടച്ചപ്പോള്‍ പോലും 2 ഏക്കറിലുള്ള നക്ഷത്രവനം, ഔഷധത്തോട്ടം, പച്ചക്കറിക്കൃഷി, വൃക്ഷത്തൈ നടീല്‍ തുടങ്ങിയ പ്രവര്‍ത്തനങ്ങള്‍ കാര്യക്ഷമമായി നടപ്പാക്കുകയും അതിനു സംരക്ഷണം നല്‍കുവാന്‍ സ്‌കൂള്‍ അധികൃതര്‍ ശ്രദ്ധ ചെലുത്തുകയും ചെയ്തു. പച്ചക്കറിക്കൃഷിയും ശലഭോദ്യാനവും നക്ഷത്രവനവുമെല്ലാം അതേപടി സ്‌കൂളില്‍ ഇപ്പോഴും നിലനിര്‍ത്തിയിരിക്കുന്നു.
ഇതിനോട് ചേര്‍ന്ന് ചെറിയൊരു താമരക്കുളവുമുണ്ട്. തൊഴിലുറപ്പ് ജോലിക്കാരും ഇവിടെ ആവശ്യമായ ജോലി ചെയ്യുന്നു. പ്രധാനാധ്യാപിക വി.ജി. ഷീലയുടെ നേതൃത്വത്തിലുള്ള അധ്യാപകര്‍, പിടിഎ പ്രസിഡന്റ് ഷെരീഫ് അടക്കമുള്ള പിടിഎ അംഗങ്ങള്‍, സ്‌കൂളിലെ പ്യൂണ്‍ കെ.സി.പീറ്റര്‍, പഞ്ചായത്തംഗം യു.കെ. പ്രേമന്‍ എന്നിവരെല്ലാം ഈ പ്രവര്‍ത്തനങ്ങളുടെ പിന്നിലുണ്ട്.
https://www.facebook.com/Malayalivartha
