അടുത്ത മാസം മുതല്‍ നല്‍കുന്ന വൈദ്യുതി ബില്ലില്‍ ഇളവുകള്‍
കെഎസ്ഇബി അടുത്ത മാസം ആദ്യ വാരം മുതല്‍ നല്‍കുന്ന വൈദ്യുതി ബില്ലുകളില്‍ മുഖ്യമന്ത്രി പ്രഖ്യാപിച്ച ഇളവുകള്‍ ഉള്‍പ്പെടുത്തും. ബില്‍ തുക ഇതിനകം അടച്ചവര്‍ക്കു തുടര്‍ന്നുള്ള ബില്ലുകളില്‍ സബ്‌സിഡി ക്രമപ്പെടുത്തി നല്‍കും. ഗാര്‍ഹിക ഉപയോക്താക്കള്‍ക്കാണ് ഇത് ബാധകം.
ഇതുവരെ ബില്‍ അടയ്ക്കാത്തവര്‍ക്ക് 5 ഗഡുക്കളായി അടയ്ക്കാനും അവസരമുണ്ട്. സെക്ഷന്‍ ഓഫിസിലോ കെഎസ്ഇബിയുടെ 1912 എന്ന കോള്‍ സെന്റര്‍ നമ്പറിലോ ബന്ധപ്പെട്ട് തവണകള്‍ ആക്കാം. സ്വമേധയാ ബില്‍ തുകയുടെ അഞ്ചിലൊന്ന് ഓണ്‍ലൈനായി അടച്ചും തവണകളായി മാറ്റാം. ഇതു സെക്ഷന്‍ ഓഫിസിലോ കോള്‍ സെന്റര്‍ നമ്പറിലോ അറിയിക്കണം. കഴിഞ്ഞ ഏപ്രില്‍ 20 മുതല്‍ ജൂണ്‍ 19 വരെ നല്‍കിയ ബില്ലുകള്‍ക്കാണ് ഇളവുകള്‍ പ്രഖ്യാപിച്ചിരിക്കുന്നത്.
ആദ്യമായി ഓണ്‍ലൈന്‍ മുഖേന പണമടയ്ക്കുന്നവര്‍ക്കു ബില്‍ തുകയുടെ 5 %, പരമാവധി 100 രൂപ വരെ കാഷ് ബാക്ക് ആയി നല്‍കുന്ന ആനുകൂല്യം ഡിസംബര്‍ 31-വരെ നീട്ടി.
തവണകള്‍ ആവശ്യമില്ലാത്തവര്‍ക്ക് നിലവില്‍ ലഭിച്ച ബില്‍ തുകയുടെ 70 % ഇപ്പോള്‍ അടച്ചാല്‍ മതി. ബാക്കി തുക തുടര്‍ന്നുള്ള ബില്ലുകളില്‍ ഇളവു നല്‍കും.
https://www.facebook.com/Malayalivartha
