കടുവയെ ക്യാമറയില്‍ കിട്ടി; ഇനി കൂട്ടിലാക്കാന്‍ ശ്രമം
പുല്‍പള്ളി ചെതലയം വനമേഖലയിലൂടെ ഇന്നലെ പുലര്‍ച്ചെ കടുവ നടന്നു പോകുന്നതിന്റെ ദൃശ്യങ്ങള്‍ വനംവകുപ്പ് സ്ഥാപിച്ച ക്യാമറകളില്‍ പതിഞ്ഞു.
കതവക്കുന്നില്‍ ബശവന്‍കൊല്ലി ശിവകുമാറിനെ കൊന്നു ഭക്ഷിച്ച കടുവയെ കുടുക്കാന്‍ കൂട് സ്ഥാപിച്ചു. കതവക്കുന്ന് വനത്തില്‍ ഇന്നലെ വൈകുന്നേരത്തോടെയാണ് വനം ദ്രുതകര്‍മസേനയുടെ നേതൃത്വത്തില്‍ കൂട് സ്ഥാപിച്ചത്.
ശിവകുമാറിന്റെ മരണമുണ്ടായ ബുധനാഴ്ച തന്നെ ബത്തേരിയില്‍ നിന്നു കൂട് എത്തിച്ചെങ്കിലും ചീഫ് വൈല്‍ഡ് ലൈഫ് വാര്‍ഡന്റെ അനുമതി ആവശ്യമായി വന്നതോടെ കൂട് സ്ഥാപിക്കാന്‍ താമസമുണ്ടായി. ഈ കടുവ തന്നെയാണ് ശിവകുമാറിനെ കൊന്നതെന്ന അനുമാനത്തില്‍ കൂട് സ്ഥാപിക്കുന്നതിനുള്ള ശുപാര്‍ശ മുഖ്യവനപാലകന്‍ അംഗീകരിച്ച് ഉച്ചയോടെ അനുമതി നല്‍കി.
സൗത്ത് വയനാട് ഡിഎഫ്ഒ പി.രഞ്ജിത്കുമാര്‍, ചെതലയം റേഞ്ച് ഓഫിസര്‍ ടി.ശശികുമാര്‍, ഡപ്യൂട്ടി റേഞ്ച് ഓഫിസര്‍മാരായ ബി.പി.സുനില്‍കുമാര്‍, കെ.വി.അനന്ദന്‍ എന്നിവരുടെ നേതൃത്വത്തില്‍ വനപാലകര്‍ സ്ഥലത്ത് ക്യാംപ് ചെയ്യുന്നു. കൂട് സ്ഥാപിച്ച പ്രദേശത്തും വനാതിര്‍ത്തിയിലും വനപാലകര്‍ സുരക്ഷ ശക്തമാക്കി.
കടുവയുടെ ആക്രമണത്തില്‍ കൊല്ലപ്പെട്ട ബശവന്‍കൊല്ലി ശിവകുമാറിന്റെ കുടുംബത്തിനു സര്‍ക്കാര്‍ പ്രഖ്യാപിച്ച 10 ലക്ഷം രൂപ ധനസഹായത്തിന്റെ ആദ്യഗഡുവായി 5 ലക്ഷം രൂപയുടെ ചെക്ക് ഐ.സി.ബാലകൃഷ്ണന്‍ എംഎല്‍എ ശിവകുമാറിന്റെ മാതാപിതാക്കള്‍ക്ക് കൈമാറി. രണ്ടാം ഗഡു പിന്‍തുടര്‍ച്ചാവകാശ രേഖകള്‍ നല്‍കുന്ന മുറയ്ക്ക് കൈമാറും. ഡിഎഫ്ഒ പി.രഞ്ജിത്കുമാര്‍, റേഞ്ച് ഓഫിസര്‍ ടി.ശശികുമാര്‍, പഞ്ചായത്ത് അംഗം രമേശന്‍, കെ.ഡി.ഷാജിദാസ്, നന്ദകുമാര്‍ എന്നിവരും സംഘത്തിലുണ്ടായിരുന്നു
https://www.facebook.com/Malayalivartha
