ഒപ്പമുണ്ടെന്ന വെറും വാക്ക് പറയുക ആയിരുന്നില്ല; ജനം നേരിടുന്നത് ഇങ്ങനെ ...
നിപ രാജകുമാരിയെന്നും, കോവിഡ് റാണിയെന്നുമുള്ള കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്റെ പരാമര്‍ശനത്തിനെതിരേയുള്ള പ്രസ്താവനയായിരുന്നു സജീഷിന്റെ പോസ്റ്റ്. ഒപ്പമുണ്ടെന്ന വെറുംവാക്ക് പറയുക ആയിരുന്നില്ല ആരോഗ്യമന്ത്രി ശൈലജ ടീച്ചറെന്ന് നിപ ബാധിച്ച് മരിച്ച ലിനിയുടെ ഭര്‍ത്താവ് സജീഷ് പുത്തൂര്‍. ദുരിത സമയത്ത് ഒരു ഗസ്റ്റ് റോളില്‍ പോലും ആശ്വാസ വാക്കുമായി ഞങ്ങളുടെ എം.പി മുല്ലപ്പള്ളി രാമചന്ദ്രന്‍ ഉണ്ടായിരുന്നില്ല. നേരിട്ടോ ടെലിഫോണ്‍ വഴിയോ ഒരു ആശ്വാസവാക്ക് അദ്ദേഹത്തിന്റെ ഭാഗത്ത് നിന്ന് ഒരു എം പി എന്ന നിലയില്‍ ഉണ്ടായിട്ടില്ലെന്നും സജീഷ് തന്റെ ഫെയ്സ്ബുക്ക് പോസ്റ്റില്‍ കുറിച്ചു. ആരോഗ്യ മന്ത്രിക്കെതിരെ നിപ രാജകുമാരിയെന്നും, കോവിഡ് റാണിയെന്നുമുള്ള കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്റെ പരാമര്‍ശനത്തിനെതിരേയുള്ള പ്രസ്താവനയായിരുന്നു സജീഷിന്റെ പോസ്റ്റ്.
ആരോഗ്യമന്ത്രി കെ കെ ശൈലജക്കെതിരായ പരാമര്‍ശം പിന്‍വലിക്കില്ലെന്ന മുല്ലപ്പളളി രാമചന്ദ്രന്റെ നിലപാടിനെതിരെ പ്രതിഷേധം കടുക്കുന്നു. കോണ്‍ഗ്രസിലെ വനിതാനേതാക്കളൊന്നും പ്രസ്താവനയില്‍ പ്രതികരിക്കാന്‍ തയ്യാറായിട്ടില്ല. സംഭവത്തെ കുറിച്ച് ഇതുവരെ കെ കെ ശൈലജയും പ്രതികരിച്ചിട്ടില്ല. വനിതാകമ്മീഷനില്‍ ഇതുവരെ ഇതുമായി ബന്ധപ്പെട്ട പരാതികളൊന്നും കിട്ടിയിട്ടില്ല.
നിപാ രാജകുമാരി പട്ടം തട്ടിയെടുത്ത ആരോഗ്യമന്ത്രി ഇപ്പോള്‍ കോവിഡ് റാണി പട്ടം കൂടി നേടാനുള്ള ശ്രമമാണെന്നായിരുന്നു മന്ത്രിക്കെതിരായ മുല്ലപ്പള്ളി രാമചന്ദ്രന്റെ പരിഹാസം. സമൂഹമാധ്യമങ്ങളിലടക്കം വലിയ പ്രതിഷേധം ഉയര്‍ന്നിട്ടും തിരുത്താനില്ലെന്ന നിലപാടില്‍ ഉറച്ച് നില്‍ക്കുകയാണ് മുല്ലപ്പളളി.
മുല്ലപ്പള്ളിയുടെ പരാമര്‍ശത്തില്‍ കോണ്‍ഗ്രസും രണ്ട് ചേരിയിലാണ്. എന്നാല്‍ പരസ്യമായ പ്രതികരണങ്ങളൊന്നും പാര്‍ട്ടിക്കുളളില്‍ നിന്ന് ഇതുവരെ ഉണ്ടായിട്ടില്ല. ഇതിനെ കുറിച്ച് കോണ്‍ഗ്രസിലെ വനിതാനേതാക്കളൊന്നും പ്രതികരിക്കാന്‍ തയ്യാറുമല്ല. ആരോഗ്യമന്ത്രിക്കെതിരെ നേരത്തെ പ്രതിപക്ഷ നേതാവ് മീഡിയാ മാനിയ പരമാര്‍ശം നടത്തിയിരുന്നു. അന്നും സമാനമായ പ്രതിഷേധമുയര്‍ന്നു. അതേ രീതിയില്‍ തിരിച്ചടിയുണ്ടാക്കുന്ന പരാമര്‍ശമാണിതെന്നാണ് ആരോപണം. വ്യക്തിപരമായ വിമര്‍ശനങ്ങള്‍ ഒഴിവാക്കി വിഷയങ്ങളിലൂന്നി സര്‍ക്കാരിനെ നേരിടണമെന്നായിരുന്നു അതേ തുടര്‍ന്ന് കോണ്‍ഗ്രസ് തീരുമാനിച്ചത്. എന്നാല്‍ പാര്‍ട്ടി അധ്യക്ഷന്‍ തന്നെ വീണ്ടും അതേ പാത പിന്തുടര്‍ന്നത് പ്രതിപക്ഷത്തെയാകെ പ്രതിരോധത്തിലാക്കി. മറുപക്ഷത്ത് കെ കെ ശൈലജയെ പിന്തുണച്ചു കൊണ്ടും മുല്ലപ്പളളിയുടെ മാപ്പ് ആവശ്യപ്പെട്ടുകൊണ്ടും ഇടതുചേരിയിലുളളവര്‍ കൂട്ടമായി രംഗത്തിറങ്ങുകയും ചെയ്തിട്ടുണ്ട്.
https://www.facebook.com/Malayalivartha
