എനിക്ക് ശ്വാസം കിട്ടുന്നില്ല എന്നെ ഇവിടെ നിന്നും കൊണ്ടു പോകണം എന്നു പറഞ്ഞ് കരയുന്ന എക്സൈസ് ഡ്രൈവർ കെ പി സുനിൽ സഹോദരന് അവസാനമായി ഫോൺ ചെയ്തതിന്‍റെ ശബ്ദ സന്ദേശം പുറത്തുവന്നു. ഇതോടെ കൊവിഡ് ബാധിച്ച് മരിച്ച എക്‌സൈസ് ഉദ്യോഗസ്ഥന് കണ്ണൂർ ഗവ.മെഡിക്കൽ കോളേജിൽ നിന്നും മതിയായ ചികിത്സയും പരിചരണവും കിട്ടിയിട്ടില്ലെന്ന പരാതിയുമായി കുടുംബംരംഗത്തെത്തി.

കൊവിഡ് വ്യാപനത്തെ തുടര്‍ന്ന് അതീവ ജാഗ്രതയും കര്‍ശന നിയന്ത്രണങ്ങളും നിലവിലുള്ള കണ്ണൂരില്‍ കൊവിഡ് രോഗികളുടെ പരിചരണത്തിനെതിരെയും പരാതി ഉയര്‍ന്നിരിക്കുകയാണ്.
എക്സൈസ് ഓഫിസറായ 28കാരന്റെ ഈ വാക്കുകൾ പങ്കുവച്ച് പി.സി വിഷ്ണുനാഥ്. ഇതിൽ നിന്നും കേരളത്തിന്റെ ശ്രദ്ധ തിരിക്കാനാണ് മുഖ്യമന്ത്രി മുല്ലപ്പള്ളിക്കെതിരെ രംഗത്തെത്തിയതെന്ന് അദ്ദേഹം വിമര്‍ശിക്കുന്നു.

‘യഥാർത്ഥ വസ്തുത മറച്ചുവെച്ചുള്ള പി ആർ ഏജൻസികളുടെ ആഘോഷങ്ങൾക്കിടയിലാണ് മുഖ്യമന്ത്രിയുടെയും ആരോഗ്യമന്ത്രിയുടെയും സ്വന്തം ജില്ലയിൽ ഇത്തരമൊരു മരണം ഉണ്ടായത്. മതിയായ ചികിത്സ കിട്ടുന്നില്ലെന്ന് രോഗി തന്നെ പറഞ്ഞ വാക്കുകൾ, ഈ കൊട്ടിഘോഷങ്ങൾക്കെല്ലാമുള്ള മറുപടിയാണ്. ആ യുവാവിന്റെ മരണത്തിന് സർക്കാർ മറുപടി പറഞ്ഞേ പറ്റു.’ അദ്ദേഹം കുറിച്ചു.

കൊവിഡ് സ്ഥിരീകരിച്ച് രണ്ടുദിവത്തിനകം മരിച്ച എക്‌സൈസ് ഡ്രൈവര്‍ക്ക് നല്‍കിയ ചികിത്സയെക്കുറിച്ച് അന്വേഷണം നടക്കുന്നതിനിടെയാണ് പരാതിയുമായി സുനിലിന്‍റെ കുടുംബം രംഗത്ത് എത്തിയതത്. ചികിത്സ കിട്ടുന്നില്ലെന്ന് ആശുപത്രിയില്‍ നിന്നും സഹോദരനോട് സുനില്‍ പറയുന്ന ഫോണ്‍ ശബ്ദ സന്ദേശമാണ് കുടുംബം പുറത്തുവിട്ടത്. കഴിഞ്ഞ ഞായറാഴ്ചയാണ് കടുത്ത പനി ബാധിച്ച് മട്ടന്നൂരിലെ എക്‌സൈസ് ഡ്രൈവര്‍ സുനിലിനെ കണ്ണൂര്‍ ഗവ. മെഡിക്കല്‍ കോളേജിലേക്ക് എത്തിച്ചത്. തിങ്കളാഴ്ച ഐസിയുവില്‍ നിന്നും ബന്ധുവിന് സുനില്‍ അയച്ച ഓഡിയോ സന്ദേശമാണ് പുറത്തുവന്നിട്ടുള്ളത്. പക്ഷെ ആരോപണം പരിയാരം മെഡിക്കല്‍ കോളേജ് അധികൃതര്‍ നിഷേധിക്കുകയാണ്.

ഞായറാഴ്ച ആശുപത്രിയിലെത്തിക്കുമ്പോള്‍ തന്നെ കടുത്ത ന്യൂമോണിയ ബാധിച്ച് ശ്വാസകോശത്തിന്‍റെ പ്രവര്‍ത്തനത്തെ സാരമായി ബാധിച്ചിരുന്നു എന്ന് മെഡിക്കല്‍ കോളേജ് പ്രിന്‍സിപ്പല്‍ വിശദീകരിക്കുന്നു. ജീവന്‍ രക്ഷിക്കാനുള്ള ശ്രമത്തിനിടെ വ്യാഴാഴ്ചയാണ് സുനില്‍ മരണത്തിന് കീഴടങ്ങിയത്. ചൊവ്വാഴ്ച രോഗം സ്ഥിരീകരിച്ച് രണ്ട് ദിവസത്തിനകം മറ്റ് രോഗങ്ങളൊന്നും ഇല്ലാതിരുന്ന 28 കാരന്‍ മരിച്ചതില്‍ ആരോഗ്യവകുപ്പ് വിശദമായ അന്വേഷണം നടത്തുകയാണ്. അതേസമയം സുനിലിനും കണ്ണൂര്‍ ടൗണിലെ ഫ്‌ളാറ്റില്‍ കഴിഞ്ഞിരുന്ന 14 കാരനും രോഗബാധയുണ്ടായത് സംബന്ധിച്ച് ഒരു സൂചനയുമില്ലെന്നാണ് ജില്ലാ കലക്ടര്‍ പറയുന്നത്. കൊ വിഡ് വൈറസ് രോഗംബാധിച്ചവര്‍ വിശദാംശങ്ങള്‍ പുറത്ത് പറയാത്തത് ജില്ലയില്‍ പ്രതിസന്ധിക്ക് ഇടയാക്കിയിട്ടുണ്ടെന്നും കലക്ടര്‍ ടിവി സുഭാഷ് വ്യക്തമാക്കി.