സ്വപ്ന സുരേഷിനെയും സന്ദീപിനെയും ബാംഗ്ലൂര്‍ വരെ പിന്തുടർന്ന അജ്ഞാതർ കൊച്ചിയിലെ ഗുണ്ടാസംഘം? കേസില്‍ മനസ്സുമാറി സ്വപ്ന കീഴടങ്ങാന്‍ ഒരുങ്ങിയാല്‍ അപായപ്പെടുത്തനാണോ അതോ ഇവര്‍ക്ക് ബംഗളൂരു വരെ സുരക്ഷ ഒരുക്കാനാണോ? അന്വേഷണം കടുപ്പിച്ച് എന്‍ഐഎ
യുഎഇ കോണ്‍സുലേറ്റ് ബാഗ് സ്വര്‍ണക്കടത്ത് കേസ് പ്രതി സ്വപ്ന സുരേഷിനെയും സന്ദീപിനെയും ബാംഗ്ലൂര്‍ വരെ അജ്ഞാത വാഹനത്തില്‍ പിന്തുടര്‍ന്നത് കൊച്ചിയിലെ ഗുണ്ടാ സംഘമായിരുന്നുവെന്ന് റിപ്പോര്‍ട്ട്.
സന്ദീപിന് തിരുവനന്തപുരത്തും കൊച്ചിയിലും ഗുണ്ടാ സംഘങ്ങളുണ്ടെന്നാണ് റിപ്പോര്‍ട്ട്. കേസില്‍ മനസ്സുമാറി സ്വപ്ന കീഴടങ്ങാന്‍ ഒരുങ്ങിയാല്‍ അപായപ്പെടുത്തനാണോ അതോ ഇവര്‍ക്ക് ബംഗളൂരു വരെ സുരക്ഷ ഒരുക്കാനാണോ ഗുണ്ടാ സംഘം ഇവരെ പിന്തുടര്‍ന്നതെന്ന് വ്യക്തമല്ല.
സ്വപ്ന സുരേഷിനെയും കുടുംബത്തെയും പിന്തുടര്‍ന്നതു കൊച്ചിയിലെ ഗുണ്ടാസംഘമാണെന്ന വിവരം കേരള പൊലീസിന്റെ സ്പെഷല്‍ ബ്രാഞ്ച് എന്‍ഐഎക്കു കൈമാറി.
കോടതിയില്‍ കീഴടങ്ങാന്‍ ഒരുങ്ങിയ സ്വപ്ന സ്വര്‍ണക്കടത്തു സംഘത്തിന്റെ നിര്‍ദേശപ്രകാരമാണു ഹൈക്കോടതിയില്‍ മുന്‍കൂര്‍ ജാമ്യാപേക്ഷ സമര്‍പ്പിച്ചത്. കേസില്‍ യുഎപിഎ ചുമത്തിയതോടെയാണു സംസ്ഥാനം വിടാന്‍ നിര്‍ദേശം ലഭിച്ചത്.
ഇതിനിടയിലാണു സ്വപ്ന കുടുംബത്തോടൊപ്പം സഞ്ചരിച്ച വാഹനത്തെ അജ്ഞാതര്‍ പിന്തുടര്‍ന്നത്. ആരുടെ നിര്‍ദേശ പ്രകാരമാണിതെന്നു കണ്ടെത്തേണ്ടത് അന്വേഷണത്തില്‍ നിര്‍ണായകമാണ്.
https://www.facebook.com/Malayalivartha
