വനാതിര്‍ത്തിയില്‍ കാട്ടുപോത്തിനെ കെണിയില്‍ വീഴ്ത്തിയ 2 പേരെ വനം വകുപ്പ് പിടികൂടി
പാമ്പാടുംചോല നാഷനല്‍ പാര്‍ക്കില്‍ കഴുത്തില്‍ കുരുക്കുമായി പരുക്കേറ്റ് അലയുന്ന കാട്ടുപോത്തിനെ കണ്ടതിനെ തുടര്‍ന്ന് അസിസ്റ്റന്റ് വൈല്‍ഡ് ലൈഫ് വാര്‍ഡന്‍ ഷെമീറിന്റെ നേതൃത്വത്തില്‍ നടത്തിയ അന്വേഷണത്തില്‍ ടോപ്പ് സ്റ്റേഷന്‍ സെന്റര്‍ സ്വദേശികളായ അരുണ്‍ പ്രകാശ് (36), മാശിലാമണി (39) എന്നിവര്‍ അറസ്റ്റിലായി. ഇരുവരും രാജകുമാരി സ്വദേശികളായ ജോണ്‍ പീറ്ററുടെയും അമ്പലക്കാവല്‍ സ്വദേശി മാത്യുവിന്റെയും സബര്‍ജില്ലി തോട്ടത്തിലെ കാവല്‍ക്കാരാണ്
പാമ്പാടുംചോല ദേശീയ ഉദ്യാനത്തിലും തമിഴ്‌നാട്ടിലെ ബോഡി റേഞ്ചിലും ഉള്‍പ്പെട്ട വനാതിര്‍ത്തിയില്‍ വനം വകുപ്പ് നടത്തിയ പരിശോധനയില്‍ സബര്‍ജില്ലി തോട്ടത്തിനു സമീപത്തുള്ള വനമേഖലയില്‍ 12 കെണികള്‍ കണ്ടെത്തി.
തോട്ടം ഉടമകള്‍ക്കെതിരെ അന്വേഷണം നടത്തുമെന്നും ഹാജരാകാന്‍ നിര്‍ദേശം നല്‍കിയതായും തമിഴ്‌നാട് വനംവകുപ്പ് ഉദ്യോഗസ്ഥര്‍ അറിയിച്ചു. കെണി ഒരുക്കിയ ഭാഗം തമിഴ്‌നാട് അതിര്‍ത്തിയിലായതിനാല്‍ പ്രതികളെ തമിഴ്‌നാട് വനം വകുപ്പ് ഉദ്യോഗസ്ഥര്‍ക്കു കൈമാറി.
പാമ്പാടുംചോല നാഷനല്‍ പാര്‍ക്കില്‍ വച്ച് ഇന്നലെ രാവിലെ 6-ന്, മൂന്നാര്‍ വൈല്‍ഡ് ലൈഫ് വെറ്ററിനറി ഡോക്ടര്‍ നിഷ റേച്ചലിന്റെയും കോന്നിയില്‍ നിന്ന് എത്തിയ ഡോ. ശ്യാമിന്റെയും നേതൃത്വത്തില്‍ കാട്ടുപോത്തിനെ മയക്കുവെടി വച്ചു വീഴ്ത്തി കുരുക്ക് നീക്കുകയും മുറിവിനു ചികിത്സ നല്‍കുകയും ചെയ്തു. 9 മണിയോടെ മയക്കം വിട്ടുണര്‍ന്ന കാട്ടുപോത്ത് ഉള്‍വനത്തിലേക്കു നീങ്ങി.
https://www.facebook.com/Malayalivartha
