സ്വര്‍ണക്കടത്ത് കേസ് നിര്‍ണായകമായ വഴികളിലൂടെയാണ് കടന്ന് പോകുന്നത്. എന്‍ഐഎ കേസ് അന്വേഷിച്ച് 24 മണിക്കൂറിന് മുമ്പ് ഒളിവിലായിരുന്ന പ്രതികളായ സ്വപ്ന സുരേഷിനേയും സന്ദീപ് നായരേയും പൊക്കാനായത് വലിയ നേട്ടമാണ്. ഇവര്‍ വിദേശത്ത് കടന്നിരുന്നെങ്കില്‍ ഏറെ പേരുദോഷം കേട്ടേനെ. ഇപ്പോള്‍ ഇവരെ കസ്റ്റഡിയില്‍ വാങ്ങി ചോദ്യം ചെയ്ത് കണ്ണികളെ കൂട്ടിമുട്ടിക്കുകയാണ്. ഇതിന് നിര്‍ണായക പങ്ക് വഹിച്ചത് കേരള പോലീസിലെ ചുണക്കുട്ടിയും മലയാളിയുമായ എന്‍.ഐ.എ അഡി. എസ്.പി എ.പി ഷൗക്കത്തലിയാണ്. സ്വപ്നയെയും സന്ദീപിനെയും ഒളിത്താവളം കണ്ടെത്തി കുടുക്കിയ ഷൗക്കത്തലിക്ക് വലിയ അഭിനന്ദന പ്രവാഹമാണ് ലഭിക്കുന്നത്. അങ്ങനെ മലയാളികളുടെ മനസില്‍ മറ്റൊരു യുവ പോലീസ് ഉദ്യോഗസ്ഥന്‍ കൂടി കയറിപ്പറ്റുകയാണ്.

ടി.പി ചന്ദ്രശേഖരന്‍ വധക്കേസിലെ പ്രതികളായ കൊടിസുനി അടക്കമുള്ള കൊടും ക്രിമിനലുകളെ ശക്തമായ രാഷ്ട്രീയ എതിര്‍പ്പ് വകവയ്ക്കാതെ പിടികൂടിയ അതേ ഷൗക്കത്തലിയാണ് ഇതെന്നോര്‍ക്കുക. കണ്ണൂരിലെ മുടക്കോഴി മലയില്‍ ഒളിച്ചിരുന്ന പ്രതികളെ അര്‍ദ്ധരാത്രിയില്‍ വേഷപ്രച്ഛന്നരായി നടന്നെത്തി സാഹസികമായ ഏറ്റുമുട്ടലിലൂടെയാണ് ഷൗക്കത്തലിയും സംഘവും അന്ന് പിടികൂടിയത്.

ഭയമില്ലാതെ ഏത് ദൗത്യവും പൂര്‍ത്തിയാക്കുമെന്നതാണ് ഷൗക്കത്തലിയുടെ പ്രത്യേകത. കൊടി സുനിയെയും സംഘത്തെയും തേടിയുള്ള റെയ്ഡ് വിവരം പലതവണ ചോര്‍ന്നതോടെ, രഹസ്യ ഓപ്പറേഷന്‍ പ്ലാന്‍ചെയ്തു. മുഴക്കുന്ന്, തില്ലങ്കേരി, മാലൂര്‍ പഞ്ചായത്തുകളിലൂടെയുള്ള എല്ലാ വഴികളും അടച്ചശേഷം പതിവു വാഹന പരിശോധനയ്‌ക്കെന്നു തോന്നിക്കുന്ന വിധത്തില്‍ പൊലീസ് നിലയുറപ്പിച്ചു. ഷൗക്കത്തലിയുടെ നേതൃത്വത്തില്‍ ഇരുപതിലധികം പേരടങ്ങുന്ന സംഘം വടകരയില്‍ നിന്നു ടിപ്പര്‍ ലോറിയില്‍ പുലര്‍ച്ചെ രണ്ടു മണിയോടെ മുഴക്കുന്നിലെത്തി. ലുങ്കി ധരിച്ച് തോര്‍ത്തും തലയില്‍ക്കെട്ടി ചെങ്കല്‍ തൊഴിലാളികളുടെ വേഷത്തിലായിരുന്നു ഷൗക്കത്തലിയും സംഘവും. കനത്തമഴയില്‍ മൊബൈല്‍ വെളിച്ചത്തിലായിരുന്നു കാട്ടിലൂടെയുള്ള മലകയറ്റം. പുലര്‍ച്ചെ നാലിന് സുനിയുടെ ഒളിസങ്കേതം കണ്ടെത്തി. പ്ലാസ്റ്റിക് ഷീറ്റു കൊണ്ട് കെട്ടിയ ടെന്റില്‍ നിലത്ത്കമ്പിളി വിരിച്ചാണ് സുനിയും സംഘവും കഴിഞ്ഞിരുന്നത്. കൂടാരം വളഞ്ഞു പൊലീസ് അകത്തു കടക്കുമ്പോള്‍ കൊടി സുനി, ഷാഫി, കിര്‍മാണി മനോജ് എന്നിവരും മൂന്നു സഹായികളും സുഖനിദ്രയില്‍. പൊലീസാണെന്ന് അറിയിച്ചപ്പോഴേക്കും തോക്കുചൂണ്ടി എതിരിടാനായി ശ്രമം. അര മണിക്കൂര്‍ നീണ്ട ബലപ്രയോഗത്തിലൂടെയാണ് സംഘത്തെ കീഴടക്കിയത്. പിന്നീട് സിപിഎം നേതാക്കളെ അറസ്റ്റു ചെയ്യാന്‍ മറ്റ് ഉദ്യോഗസ്ഥര്‍ മടിച്ചപ്പോള്‍, ആ ദൗത്യം ഏറ്റെടുത്തതും ഷൗക്കത്തലിയാണ്.

1995ല്‍ ഒന്നാംറാങ്കോടെ കേരള പൊലീസില്‍ എസ്.ഐയായ ഷൗക്കത്തലി തലശേരി ഡിവൈ.എസ്.പിയായിരിക്കെ 2014ലാണ് ഡെപ്യൂട്ടേഷനില്‍ എന്‍.ഐ.എയിലെത്തിയത്. ഐസിസ് റിക്രൂട്ട്‌മെന്റ്, കനകമല കേസ്, തമിഴ്‌നാട്ടിലെ തീവ്രവാദക്കേസുകള്‍ എന്നിങ്ങനെ സുപ്രധാന കേസുകളുടെ അന്വേഷണം ഷൗക്കത്തിനായിരുന്നു. 150ലേറെപ്പേര്‍ കൊല്ലപ്പെട്ട പാരിസ് ഭീകരാക്രമണക്കേസില്‍ ഫ്രഞ്ച് ഏജന്‍സികളുമായി ചേര്‍ന്നുള്ള അന്വേഷണത്തിലും ഷൗക്കത്തലിയുണ്ടായിരുന്നു.

സ്വര്‍ണക്കടത്ത് കേസിലെ അന്വേഷണ സംഘത്തലവന്‍ എന്‍.ഐ.എ ഡിവൈ.എസ്.പി രാധാകൃഷ്ണപിള്ളയും കൈയ്യടി നേടുകയാണ്. കൊല്ലം സ്വദേശിയായ ഇദ്ദേഹം സി.ആര്‍.പി.എഫില്‍ നിന്നാണ് ഡെപ്യൂട്ടേഷനില്‍ എന്‍.ഐ.എയിലെത്തിയത്. കേരളത്തില്‍ എന്‍.ഐ.എ അന്വേഷിച്ച ആദ്യ കേസായ കോഴിക്കോട് ഇരട്ട സ്‌ഫോടനം മുതല്‍ മിക്ക കേസുകളും അന്വേഷിച്ചത് രാധാകൃഷ്ണപിള്ളയുടെ സംഘമാണ്. എന്‍.ഐ.എയുടെ ആദ്യ കുറ്റപത്രം ഇരട്ട സ്‌ഫോടനക്കേസില്‍ നല്‍കിയതും അദ്ദേഹമാണ്. കേരള പൊലീസ് വിട്ടയച്ച പ്രതികളെപ്പോലും പിടികൂടിയും ചിലരെ മാപ്പുസാക്ഷിയാക്കിയും അദ്ദേഹം നടത്തിയ അന്വേഷണം ഏറെ പ്രശംസ നേടിയിരുന്നു.