ഇന്ത്യയില്‍ ഇന്ന് ഫോണ്‍ ഉപയോഗിക്കാത്തവര്‍ അപൂര്‍വമാണ്. പണ്ടൊക്കെ ഒരു ലാന്റ്‌ഫോണ്‍ കണക്ഷന്‍ കിട്ടണമെങ്കില്‍ വര്‍ഷങ്ങള്‍ കാത്തിരുന്ന് കാല് പിടിക്കണമായിരുന്നു. മുകേഷ് അംബാനിയുടെ റിലയന്‍സിന്റെ വരവോടെയാണ് ഇന്ത്യയില്‍ മൊബൈല്‍ വിപ്ലവം സൃഷ്ടിച്ചത്. വെറും 500 രൂപയ്ക്ക് മൊബൈല്‍ നല്‍കി ചരിത്രം സൃഷ്ടിച്ചു. പിന്നെ വമ്പന്‍ കമ്പനികളുടെ വരവായിരുന്നു. തുടര്‍ന്നാണ് റിലയന്‍സിന്റെ ജിയോയുമായി മുകേഷ് അംബാനി എത്തിയത്. ഒന്ന് ഫോണ്‍ വിളിച്ചാല്‍ പണം കാലിയാകുന്ന സമയത്ത് ജിയോ ആവിഷ്‌ക്കരിച്ച ഫ്രീ കോളും ഫ്രീ നെറ്റും ചരിത്രം തന്നെ സൃഷ്ടിച്ചു. എല്ലാവരും കോള്‍ റേറ്റ് വലുതായി കുറച്ചു. ആ കുറവ് ഇപ്പോഴും തുടരുന്നു. ഇന്റര്‍നെറ്റ് സാധാരണക്കാരന് പോലും പ്രിയമായി. ദിവസം മുഴുവന്‍ ഓണ്‍ ചെയ്താലും സാരമില്ല. എല്ലാത്തിനും കടപ്പാട് ജിയോയോടാണ്. അങ്ങനെ നമ്മള്‍ വളര്‍ത്തിയ ജിയോ ചൈനയെ മലര്‍ത്തിയടിച്ച് ലോകത്ത് ആറാം സ്ഥാനത്തെത്തിയിരിക്കുകയാണ്.

ലോകത്തെ ശതകോടീശ്വരന്മാരില്‍ ആദ്യ പത്തില്‍ ഇടം നേടിയിരിക്കുകയാണ് റിലയന്‍സ് മേധാവി മുകേഷ് അംബാനി. ധനകാര്യ ഏജന്‍സിയായ ബ്ലൂംബര്‍ഗിന്റെ കണക്കുകള്‍ പ്രകാരം ആറാം സ്ഥാനത്താണ് അംബാനി. ഗൂഗിള്‍ സ്ഥാപകന്‍ ലാറി പേജ്, ടെസ്‌ല തലവന്‍ ഇലോണ്‍ മസ്‌ക്, ഒറാക്കിള്‍ കോര്‍പ് മേധാവി ലാറി എറിസണ്‍, ലോകത്തിലെ ഏറ്റവും വലിയ ധനികയായ ഫ്രാന്‍സിന്റെ ഫ്രാങ്കോയിസ് ബെറ്റന്‍കോര്‍ട്ട് മേയേഴ്‌സ് എന്നിവരെയാണ് സമ്പത്തില്‍ അംബാനി പിന്തള്ളിയത്. മാത്രമല്ല , ആദ്യ പത്തിലെ ഒരേ ഒരു ഏഷ്യക്കാരനായും ഇതോടെ മുകേഷ് അംബാനി മാറി. ജിയോയില്‍ ഫേസ്ബുക്ക് അടക്കമുള്ള കമ്പനികളുടെ നിക്ഷേപം ഒഴുകിയെത്തിയതാണ് അംബാനിയുടെ ആസ്തി റോക്കറ്റ് പോലെ കുതിക്കാന്‍ പ്രധാന കാരണമായത്.

ആമസോണ്‍ സ്ഥാപകന്‍ ജെഫ് ബെസോസാണ് പട്ടികയിലെ ഒന്നാമന്‍. 184 ബില്യണ്‍ ഡോളറാണ് ബെസോസിന്റെ ആസ്തി. രണ്ടാം സ്ഥാനം മൈക്രോസോഫ്റ്റ് സ്ഥാപകന്‍ ബില്‍ ഗേറ്റ്‌സിനാണ് (115 ബില്യണ്‍ ഡോളര്‍). എല്‍വിഎംഎച്ച് ചെയര്‍മാനും സിഇഒയുമായ ബെര്‍ണാഡ് അര്‍നോള്‍ട്ട് (94.5 ബില്യണ്‍ ഡോളര്‍), ഫെയ്‌സ്ബുക്ക് സിഇഒ മാര്‍ക്ക് സക്കര്‍ബര്‍ഗ് (90.8 ബില്യണ്‍ ഡോളര്‍), സ്റ്റീവ് ബള്‍മര്‍ (74.6 ബില്യണ്‍ ഡോളര്‍) എന്നിവരാണ് മൂന്നും നാലും അഞ്ചും സ്ഥാനങ്ങളില്‍ ഉള്ളത്.

ചൈനീസ് കോടീശ്വരന്‍മാരായ ടെന്‍സെന്റ് മേധാവി പോണി മാ, ആലിബാബ മേധാവി ജാക്ക് മാ എന്നിവരെയും അംബാനി കീഴടക്കി.
ജൂലൈ 13 ന് അംബാനിയുടെ ആസ്തി 2.17 ബില്യണ്‍ ഡോളര്‍ ഉയര്‍ന്ന് 72.4 ബില്യണ്‍ ഡോളറിലെത്തി. വൈകാതെ തന്നെ മുകേഷ് അംബാനി ലോകത്തിലെ മികച്ച അഞ്ച് സമ്പന്നരുടെ ക്ലബില്‍ ചേരുമെന്ന് ഉറപ്പായി. വൈകാതെ തന്നെ ഗൂഗിളും ജിയോയില്‍ വന്‍ നിക്ഷേപം നടത്തുമെന്നാണ് അറിയുന്നത്.

ഇവിടെ ശ്രദ്ധേയമായ മറ്റൊരു കാര്യം, ഇന്ത്യയുടെ അടുത്ത അഞ്ച് ശതകോടീശ്വരന്മാരുടെ മൊത്തം ആസ്തിയായ 5.44 ലക്ഷം കോടി രൂപയേക്കാള്‍ കൂടുതലാണ് അംബാനിയുടെ ആസ്തി. റിലയന്‍സിന്റെ 42% ഓഹരി സ്വന്തമായുള്ള അംബാനിക്ക്, കമ്പനിയുടെ ഡിജിറ്റല്‍ വിഭാഗമായ ജിയോ പ്ലാറ്റ്‌ഫോംസിലേക്കുള്ള വിദേശ നിക്ഷേപങ്ങളാണ് നേട്ടമായത്. യുഎസ്, യുഎഇ രാജ്യങ്ങളിലെ നിരവധി കമ്പനികളാണ് ജിയോയില്‍ നിക്ഷേപം നടത്തിയിരിക്കുന്നത്. അടുത്തിടെ റിലയന്‍സ് ഇന്‍ഡസ്ട്രീസ് കടബാധ്യതയില്ലാത്ത കമ്പനിയായി മാറിയെന്ന് മുകേഷ് അംബാനി പ്രഖ്യാപിച്ചിരുന്നു. 2021 മാര്‍ച്ചിനുമുന്‍പ് ബാധ്യതകളെല്ലാം തീര്‍ക്കുമെന്നായിരുന്നു മുകേഷ് അംബാനി 2019 ഓഗസ്റ്റില്‍ ഓഹരിയുടമകള്‍ക്കു വാഗ്ദാനം നല്‍കിയിരുന്നത്.

അതേസമയം ജിയോ പ്ലാറ്റ്‌ഫോമുകളില്‍ നിക്ഷേപം ഗൂഗിള്‍ താത്പര്യം പ്രകടിപ്പിച്ചിട്ടുണ്ട്. റിപ്പോര്‍ട്ടുകള്‍ അനുസരിച്ച് റിലയന്‍സ് ജിയോയില്‍ 4 ബില്യണ്‍ ഡോളര്‍ നിക്ഷേപിക്കാന്‍ ഗൂഗിള്‍ നിലവില്‍ ചര്‍ച്ചകള്‍ നടത്തി വരികയാണെന്നാണ് അറിയുന്നത്. അടുത്ത അഞ്ച് മുതല്‍ ഏഴ് വര്‍ഷത്തിനുള്ളില്‍ ഇന്ത്യയില്‍ 10 ബില്യണ്‍ ഡോളര്‍ നിക്ഷേപിക്കുമെന്ന് ആല്‍ഫബെറ്റ് സിഇഒ സുന്ദര്‍ പിച്ചൈ ഗൂഗിള്‍ ഫോര്‍ ഇന്ത്യ ഓണ്‍ലൈന്‍ കോണ്‍ഫറന്‍സില്‍ വെളിപ്പെടുത്തിയതിന് തൊട്ടുപിന്നാലെയാണ് ഇത്. എന്തായാലും ഒരു ഇന്ത്യക്കാരന്‍ അതും ജിയോയിലൂടെ നമ്മള്‍ വളര്‍ത്തി വലുതാക്കിയയാള്‍ ലോകത്തിന്റെ നെറുകയില്‍ എത്തുന്നത് നമുക്കും അബിമാനിക്കാം.