ഹാന്‍വീവ് ഓണ്‍ലൈന്‍ വില്‍പന സാധ്യത പരിശോധിക്കുന്നു
കോവിഡ് ലോക്ഡൗണ്‍ കാരണം കേരളത്തിലുടനീളം ഹാന്‍വീവ് ഷോറൂമുകള്‍ പ്രവര്‍ത്തിക്കാത്തതിനാല്‍ കൈത്തറി വസ്ത്രങ്ങള്‍ ഓണ്‍ലൈന്‍ വഴി വില്‍ക്കുന്നതിനു സാധ്യത തേടുന്നു. തപാല്‍ വകുപ്പുമായി സഹകരിച്ചു സ്ഥാപനം നേരിട്ടോ അല്ലെങ്കില്‍ ഇതര ഓണ്‍ലൈന്‍ വ്യാപാര സ്ഥാപനങ്ങളുമായി ചേര്‍ന്നോ ആയിരിക്കും വില്‍പന. നിലവില്‍ ആശയരൂപത്തിലാണ് ഇതുള്ളതെന്നും വ്യാപാര മാതൃക തയാറാക്കിയിട്ടില്ലെന്നും ഹാന്‍വീവ് ചെയര്‍മാന്‍ കെ.പി.സഹദേവന്‍ പറഞ്ഞു.
ലോക്ഡൗണ്‍ പ്രഖ്യാപിച്ചതിനു ശേഷം ഒരിടത്തും കച്ചവടം നടന്നിട്ടില്ല. ഇതോടെ തൊഴിലാളികള്‍ക്കും ജീവനക്കാര്‍ക്കും ശമ്പളം നല്‍കാന്‍ കഴിഞ്ഞിട്ടില്ല. ഏപ്രില്‍ 15 വരെയുള്ള ശമ്പളം മാത്രമേ നല്‍കിയിട്ടുള്ളു.
വിഷു വില്‍പനയും നഷ്ടമായി. വിദ്യാഭ്യാസ വകുപ്പിന്റെ നിര്‍ദേശപ്രകാരം നിര്‍മിച്ച യൂണിഫോം തുണിത്തരങ്ങള്‍ വിതരണം ചെയ്തിട്ടില്ല. ഇതിന്റെ തുകയും ലഭിച്ചില്ല. അതിനാല്‍ ശമ്പള വിഷയത്തിനു തീര്‍പ്പ് ഉണ്ടാക്കാന്‍ കഴിഞ്ഞ എട്ടിനു വിദ്യാഭ്യാസ വകുപ്പ് അധികൃതരും ഹാന്‍ഡ്ലൂം ഡയറക്ടറുമായി ചര്‍ച്ച നടക്കേണ്ടിയിരുന്നതാണ്. അതിനിടയിലാണ് തിരുവനന്തപുരത്തു ട്രിപ്പിള്‍ ലോക്ഡൗണ്‍ വന്നത്. ഈ പണം ലഭിക്കുന്ന മുറയ്ക്കു ശമ്പള പ്രശ്‌നത്തിനു പരിഹാരം കാണും.
വിവിധ സര്‍ക്കാര്‍ വകുപ്പുകളിലെ യൂണിഫോമുകളുടെയും ആശുപത്രികളിലെയും അതിഥി മന്ദിരങ്ങളിലെയും ഇതര തുണിത്തരങ്ങളുടെയും ഓര്‍ഡര്‍ ലഭ്യമാക്കിത്തരണമെന്ന് വകുപ്പു മന്ത്രിമാരോടും മുഖ്യമന്ത്രിയോടും അഭ്യര്‍ഥിച്ചിട്ടുണ്ടെന്നും ചെയര്‍മാന്‍ പറഞ്ഞു. കൈത്തറി വസ്ത്രങ്ങളുടെ വിപണിക്ക് ഉത്തേജനം പകരാന്‍ ഈ മാസം സര്‍ക്കാര്‍ റിബേറ്റ് പ്രഖ്യാപിച്ചെങ്കിലും ഏതാനും ലക്ഷങ്ങളുടെ വില്‍പന മാത്രമാണു നടന്നത്.
https://www.facebook.com/Malayalivartha
