സ്വര്‍ണ കള്ളക്കടത്തില്‍ മന്ത്രിസഭയിലെ പലര്‍ക്കും പങ്കുള്ളതായി ബി.ജെ.പി സംസ്ഥാന അധ്യക്ഷന്‍ കെ.സുരേന്ദ്രന്‍. ശിവശങ്കരനെ ചാരി രക്ഷപ്പെടാമെന്ന് കരുതേണ്ട. മന്ത്രി ഇ.പി ജയരാജന്‍ അടക്കമുള്ളവരുടെ പങ്ക് അന്വേഷിക്കണമെന്നും സുരേന്ദ്രന്‍ ആവശ്യപ്പെട്ടു. കോഴിേക്കാട് ബി.ജെ.പിയുടെ പ്രതിഷേധ സമരം ഉദ്ഘാടനം ചെയ്തു സംസാരിക്കുകയായിരുന്നു സുരേന്ദ്രൻ.

ഈ കേസ് പ്രധാനമന്ത്രി നേരിട്ട് നിരീക്ഷിക്കുന്നുണ്ട്. മുഖ്യമന്ത്രിയുടെ വിശ്വസ്തന്മാര്‍ എല്ലാവരും ഈ കള്ളക്കടത്തിന് സഹായിച്ചു. അരുണ്‍ ബാലചന്ദ്രന്റെ ഇടപെടല്‍ അത് വ്യക്തമാക്കുന്നു. മുഖ്യമന്ത്രിയുടെ ഓഫീസിലെ ഉന്നതരായിട്ടുള്ള പലര്‍ക്കും മന്ത്രിസഭയിലെ പലര്‍ക്കും ഈ കള്ളക്കടത്തില്‍ പങ്കുണ്ട്. അതുകൊണ്ട് ശിവശങ്കറിനെ സസ്‌പെന്റു ചെയ്താലും മുഖ്യമന്ത്രി രക്ഷപ്പെടാന്‍ പോകുന്നില്ല. മുഖ്യമന്ത്രിയിലേക്ക് തന്നെയാണ് ഈ അന്വേഷണം തിരിയുന്നത്. മുഖ്യമന്ത്രി അറിഞ്ഞുകൊണ്ടു തന്നെയാണ് ഈ കൊള്ളക്കാരെ ഓഫീസില്‍ വച്ചതെന്നും സുരേന്ദ്രന്‍ ആരോപിച്ചു.