ലക്ഷണങ്ങളില്ലാത്ത കൊവിഡ് രോഗികളെ വീട്ടില്‍ പാര്‍പ്പിച്ച്‌ ചികിത്സ നല്‍കുന്ന രീതി കേരളത്തിലും പ്രായോഗികമാക്കാൻ സർക്കാർ പദ്ധതി. മുഖ്യമന്ത്രി പിണറായി വിജയന്റെ പ്രഖ്യാപനത്തിന് പിന്നാലെ മാനദണ്ഡങ്ങള്‍ (പ്രോട്ടോക്കോള്‍) തയ്യാറാക്കാന്‍ ആരോഗ്യവകുപ്പ് . കേന്ദ്രത്തിന്റെ ഈ മാനദണ്ഡങ്ങളുടെ ചുവടുപിടിച്ചാണ് സംസ്ഥാനവും കരട് പ്രോട്ടോക്കോള്‍ തയ്യാറാക്കുക. കൊവിഡ് രോഗികളുടെ എണ്ണം കൂടിയതോടെ ലക്ഷണങ്ങള്‍ ഇല്ലാത്തവരെയും ചെറിയ ലക്ഷണങ്ങള്‍ ഉള്ളവരെയും വീട്ടില്‍ തന്നെ ചികിത്സിക്കാന്‍ കേന്ദ്ര സര്‍ക്കാരും ഐ.സി.എം.ആറും നേരത്തെ നിര്‍ദ്ദേശം നൽകിയിരുന്നു . സംസ്ഥാന സര്‍ക്കാര്‍ നിയോഗിച്ച വിദഗ്ദ്ധ സമിതി വീട്ടിലെ ചികിത്സയ്ക്ക ശുപാര്‍ശ നല്‍കി. എന്നാൽ സര്‍ക്കാര്‍ തീരുമാനമെടുത്തിരുന്നില്ല. ഇപ്പോള്‍ പ്രതിദിന രോഗികളുടെ എണ്ണം കുതിച്ചുയര്‍ന്നതോടെ സര്‍ക്കാര്‍ ഈ കാര്യവും ചിന്തയ്ക്ക് എടുത്തിട്ടുണ്ട്.

നിലവില്‍ സംസ്ഥാനത്തെ 29 സര്‍ക്കാര്‍ ആശുപത്രികളിൽ കൊവിഡ് ചികിത്സ നല്‍കുന്നുണ്ട് . പക്ഷേ രോഗികളുടെ എണ്ണം കൂടിയ സാഹചര്യത്തിൽ മെഡിക്കല്‍ കോളേജ് ആശുപത്രികളില്‍ ഉള്‍പ്പെടെ കിടത്തി ചികിത്സയ്ക്ക് സ്ഥലമില്ലാത്ത സ്ഥിതി . ഫസ്റ്റ് ലൈന്‍ ചികിത്സാ കേന്ദ്രങ്ങളില്‍ പലയിടത്തും ആരോഗ്യപ്രവര്‍ത്തകരുടെ കുറവുണ്ട് . സൗകര്യങ്ങള്‍ക്ക് പരിമിതിയുമുണ്ട്. സംസ്ഥാനത്ത് കൊവിഡ് സ്ഥിരീകരിച്ചവരില്‍ 45 ശതമാനത്തിലും ലക്ഷണങ്ങളില്ല. 30 ശതമാനം പേര്‍ക്ക് ചെറിയ ലക്ഷണങ്ങള്‍ മാത്രമാണുള്ളത്. ഇത്തരക്കാര്‍ക്ക് വിദഗ്ദ്ധ ചികിത്സ വേണ്ടെന്നും വീട്ടിലെ ചികിത്സ മതിയെന്നുമുള്ള നിലപാടാണ് വിദഗ്ദ്ധ സമിതിക്കുള്ളത്.

കരട് പ്രോട്ടോക്കോള്‍ നിര്‍ദ്ദേശങ്ങള്‍ ഇതൊക്കെയാണ് ;

 ലക്ഷണങ്ങളില്ലാത്തതോ, നേരിയ ലക്ഷണങ്ങളുള്ളതോ ആയ കൊവിഡ് രോഗികള്‍ക്ക് വീട്ടില്‍ ചികിത്സ നടത്താം.

 ക്വാറന്റൈന്‍ നിര്‍ദ്ദേശങ്ങള്‍ കര്‍ശനമായി പാലിക്കണം. മറ്റ് കുടുംബാംഗങ്ങളുമായി സമ്ബര്‍ക്കം വരരുത്.

 24 മണിക്കൂറും രോഗിയുടെ കാര്യങ്ങള്‍ ശ്രദ്ധിക്കുന്നതിന് ഒരാളുടെ സേവനം ലഭ്യമാക്കണം.

 രോഗിയും രോഗിയുടെ കാര്യങ്ങള്‍ നോക്കുന്നവരും സുരക്ഷ ഉറപ്പാക്കണം.

 വീടിന് സമീപത്തുള്ള സര്‍ക്കാര്‍ ആശുപത്രിയിലെ മെഡിക്കല്‍ ഓഫീസറുടെ സേവനം ഉറപ്പാക്കണം,​ ഏത് സമയത്തും ബന്ധപ്പെടാന്‍ ഫോണ്‍ നമ്ബര്‍ ഉണ്ടാകണം.

 രോഗം മൂര്‍ച്ഛിക്കുന്ന സാഹചര്യമുണ്ടായാല്‍ വീട്ടില്‍ നിന്ന് ആശുപത്രിയില്‍ എത്താന്‍ ഗതാഗതസൗകര്യം ഉണ്ടായിരിക്കണം. അടിയന്തര സാഹചര്യത്തിന് ആംബുലന്‍സും വേണം.

 10 വയസിന് താഴെയുള്ള കുട്ടികളെയും 65 വയസിന് മുകളിലുള്ളവര്‍ക്കുമായി റിവേഴ്സ് ക്വാറന്റൈന്‍ സംവിധാനം വേണം.

 രോഗിയുടെ ആരോഗ്യനില കൃത്യമായി നിരീക്ഷിച്ച്‌ ദിവസവും ജില്ലാ സര്‍വെയലന്‍സ് ഓഫീസറെ അറിയിക്കണം.

 ടെലിമെഡിസിന്‍ സൗകര്യം ഏര്‍പ്പെടുത്തുന്നതും നല്ലതാണ്.

 മാനസിക സംഘര്‍ഷം കുറയ്ക്കുന്നതിനുള്ള മാര്‍ഗങ്ങളും സ്വീകരിക്കണം.

 രോഗം പൂര്‍ണമായി ഭേദമായെന്ന ലാബ് റിപ്പോര്‍ട്ട് മെഡിക്കല്‍ ഓഫീസര്‍ സാക്ഷ്യപ്പെടുത്തിയ ശേഷമേ വീട്ടിലെ ചികിത്സ അവസാനിപ്പിക്കാവൂ.