നാണയം വിഴുങ്ങിയതിനെ തുടര്‍ന്ന് ഗുരുതരാവസ്ഥയിലായ മൂന്ന് വയസുകാരന്‍ പൃഥ്വിരാജിനെയും അമ്മയെയും അമ്മുമ്മയെയും ആലുവായില്‍ നിന്ന് എറണാകുളത്തേക്കും അവിടെ നിന്ന് ആലപ്പുഴയിലെ ആശുപത്രിയിലേക്കും എത്തിച്ച ബാബു വറുഗീസ് എന്ന ഓട്ടോറിക്ഷ ഡ്രൈവറെ പ്രശംസിച്ച്‌ ബിജെപി നേതാവ് കുമ്മനം രാജശേഖരന്‍ രംഗത്ത് . അദ്ദേഹത്തിന്റെ മകന്‍ തളര്‍‌ച്ച ബാധിച്ച്‌ വീട്ടില്‍ കിടക്കപ്പായയില്‍ തന്നെയാണ്. കൊവിഡ് കാലമായതിനാല്‍ ഓട്ടവുമില്ല. എന്നിട്ടും മനുഷ്യത്വം വ‌റ്റാതെ ഏറെ നേരം ഏറെദൂരവും ആ കുടുംബത്തോടൊപ്പം നിന്ന ബാബു വര്‍ഗീസിനെ നമസ്‌കരിക്കുന്നതായി കുമ്മനം രാജശേഖരന്‍ ഫേസ്ബുക്കിലിട്ട പോസ്‌റ്റില്‍ പറയുന്നു.ചികിത്സിക്കാന്‍ കടമെടുത്തു നട്ടം തിരിയുമ്ബോഴും അങ്ങയുടെ മന:സാക്ഷി മരവിച്ചില്ല. ആ അമ്മമാരുടെ കണ്ണീര്‍ ബാബുവിന്റെ മനുഷ്യത്വത്തെ ഉണര്‍ത്തി എന്നും അദ്ദേഹം പറയുന്നു ..

കുമ്മനം രാജശേഖരന്റെ ഫേസ്ബുക്ക് പോസ്‌റ്റ് ഇവിടെ വായിക്കാം.

ബാബു വറുഗീസ് ഒപ്പം നമ്മളുണ്ട്,

നിങ്ങളാണ് നാടിന്റെ മാതൃക. കുട്ടി നാണയം വിഴുങ്ങിയതുമൂലം ചികിത്സക്ക് വേണ്ടി കണ്ണീരൊഴുക്കി നിസഹായരായി നിന്ന അമ്മയെയും അമ്മുമ്മയെയും ആലുവായില്‍ നിന്ന് ഓട്ടോറിക്ഷയില്‍ കയറ്റി എറണാകുളത്തു എത്തിച്ചു. തിരിച്ച്‌ ആലപ്പുഴ ആശുപത്രിയില്‍ നിന്ന് വീട്ടില്‍ എത്തിച്ചു. അഭിനന്ദനങ്ങള്‍. നാടിന്റെ അഭിമാനമാണ് അങ്ങ്. സ്വന്തം മകന്‍ തളര്‍ന്ന് വീട്ടില്‍ കിടക്കപ്പായില്‍ കിടന്ന് മുക്കിയും, മൂളിയും, നിരങ്ങിയും കഴിയുമ്ബോഴും , ചികിത്സിക്കാന്‍ കടമെടുത്തു നട്ടം തിരിയുമ്ബോഴും അങ്ങയുടെ മന:സാക്ഷി മരവിച്ചില്ല. ആ അമ്മമാരുടെ കണ്ണീര്‍ ബാബുവിന്റെ മനുഷ്യത്വത്തെ ഉണര്‍ത്തി.

തിരുവല്ലയില്‍ വണ്ടിയിടിച്ചു മാരകമായ പരിക്കുകളോടെ രക്തം വാര്‍ന്നൊലിച്ചു കിടന്ന ബൈക്ക് യാത്രക്കാരനെ സഹായിക്കാന്‍ കൂട്ടം കൂടിനിന്നവരാരും തയ്യാറായില്ലെന്ന വാര്‍ത്ത കേട്ട് ഇന്നലെ തരിച്ചു നിന്ന "പ്രബുദ്ധ കേരളം " ഇന്ന് അങ്ങയെ ഓര്‍ത്തു അഭിമാനിക്കുന്നു. കോവിഡ്കാലത്ത് ഓട്ടോറിക്ഷാ ഡ്രൈവര്‍ ജോലിക്ക് ഒന്നും കിട്ടാനില്ല എന്ന എല്ലാവര്ക്കും അറിയാം. എന്നിട്ടും ത്യാഗത്തിന് തയ്യാറായി. ജീവിതത്തിന്റെ പരിക്കന്‍ യാഥാര്‍ത്ഥ്യങ്ങളെ നേരില്‍ കണ്ടതിന്റെ അനുഭവസമ്ബത്ത് അങ്ങയെ മഹാനാക്കുന്നു. ബാബു വറുഗീസ്, പ്രത്യാശയും പ്രതീക്ഷയുമാണ് അങ്ങ്. സ്വന്തം കുടുംബം കഷ്ടപ്പെടുമ്ബോഴും ആ അമ്മയും കുഞ്ഞും അമ്മുമ്മയും അനുഭവിച്ച വേദന സ്വന്തം നെഞ്ചിലേറ്റുവാങ്ങിയ അങ്ങേയ്ക്ക് അനന്തകോടി നമസ്കാരം! അങ്ങ് ഉണര്‍ത്തിവിട്ട സേവന സന്നദ്ധതയുടെ പ്രചോദനാത്മകമായ ഉജ്ജ്വല വികാരം ഏവരുടേയും ഹൃദയത്തില്‍ ഒരു പ്രചോദനമായി എന്നെന്നും ത്രസിക്കും, തുടിക്കും! ബാബു വറുഗീസ്, അങ്ങ് തനിച്ചല്ല. മകന്റെ ചികിത്സയ്ക്ക് ആവുന്ന എല്ലാ സഹായവും നല്‍കാന്‍ ഈ നാട്ടില്‍ ജീവകാരുണികരായ സുമനസുകള്‍ മുന്നോട്ട് വരും ..ഒപ്പം നമ്മള്‍ ഉണ്ട്. Account Details:- Mr Babu Varghese. Ac No :- 14660100031694 Federal Bank , Aluva IFSC :- FDRL0001132