പ്രായപൂര്ത്തിയാകാത്ത മലയാളി പെണ്കുട്ടിയെ ചെന്നൈയില് പീഡിപ്പിച്ചു ഭീഷണിപ്പെടുത്തി പണം തട്ടിയ കേസില് 2 മലയാളി യുവാക്കള് അറസ്റ്റില്
മൂന്നു വര്ഷം മുന്പ് പരിചയപ്പെട്ട പ്രായപൂര്ത്തിയാകാത്ത മലയാളി പെണ്കുട്ടിയെ പീഡിപ്പിച്ചു ദൃശ്യങ്ങള് പകര്ത്തി ഭീഷണിപ്പെടുത്തി പണം തട്ടിയെന്ന കേസില് രണ്ടു മലയാളി യുവാക്കള് അറസ്റ്റില്.
പെണ്കുട്ടിയുടെ മാതാപിതാക്കളുടെ പരാതിയില് ചെന്നൈ താംബരം എരുക്കഞ്ചേരി എസ്എം നഗര് ഒഎസ്സി കോളനി നിവാസിയും ചെങ്ങന്നൂര് സ്വദേശിയുമായ സുബിന് ബാബു (24), സുഹൃത്ത് സജിന് വര്ഗീസ് (27) എന്നിവരാണു അറസ്റ്റിലായത്. മുഖ്യപ്രതി സുബിന് സ്വകാര്യ കമ്പനിയില് മാനേജരാണ്.
സെംപാക്കം സ്വദേശിനിയായ 16-കാരി പെണ്കുട്ടിയെ മൂന്നു വര്ഷം മുന്പാണ് സുബിന് പരിചയപ്പെട്ടത്. അന്നു പ്രണയം നടിച്ചു വിവാഹവാദ്ഗാനം നല്കിയാണു പ്രതി പീഡിപ്പിച്ചതെന്ന് താംബരം ഓള് വിമന് പൊലീസ് പറഞ്ഞു. ഫോണില് പകര്ത്തിയ പീഡന ദൃശ്യങ്ങള് പ്രചരിപ്പിക്കുമെന്നു ഭീഷണിപ്പെടുത്തി പിന്നീട് പണവും ആഭരണങ്ങളും അടക്കം മൂന്നു ലക്ഷത്തോളം രൂപ പലപ്പോഴായി തട്ടിയെടുത്തു.
പിന്നീട് സുഹൃത്ത് സജിനുമായി ചേര്ന്ന് ദൃശ്യങ്ങള് സമൂഹമാധ്യമങ്ങളിലും അശ്ലീല വെബ്സൈറ്റുകളിലും പ്രചരിപ്പിക്കുമെന്ന് ഭീഷണിപ്പെടുത്തി. പ്രായപൂര്ത്തിയായതിനാല് വിവാഹം കഴിക്കണമെന്ന് പെണ്കുട്ടി ആവശ്യപ്പെട്ടതോടെയാണ് ഇങ്ങനെ ഭീഷണിപ്പെടുത്തിയത്. തുടര്ന്നും പണം ആവശ്യപ്പെട്ടു ഭീഷണി തുടര്ന്നതോടെ പെണ്കുട്ടി ജീവനൊടുക്കാന് ശ്രമിച്ചു. കൗണ്സിലിങ് നല്കുന്നതിനിടെയാണു പെണ്കുട്ടി പീഡനവിവരം മാതാപിതാക്കളെ അറിയിച്ചത്.
മാസങ്ങള്ക്കു ശേഷം വീണ്ടും പണം ആവശ്യപ്പെട്ടു ഭീഷണി മുഴക്കിയതോടെയാണു അതുവരെ മാനഹാനി ഭയന്നു പരാതി നല്കാതിരുന്ന രക്ഷിതാക്കള് പൊലീസില് പരാതി നല്കിയത്. പണം നല്കിയില്ലെങ്കില് ദൃശ്യങ്ങള് പരസ്യപ്പെടുത്തുമെന്നും കൊന്നുകളയുമെന്നുമായിരുന്നു പറഞ്ഞത്. പ്രതികള്ക്കെതിരെ പോക്സോ നിയമം ചുമത്തിയതായും ജുഡിഷ്യല് കസ്റ്റഡിയില് റിമാന്ഡ് ചെയ്തതായും പൊലീസ് പറഞ്ഞു.
https://www.facebook.com/Malayalivartha