തൃപുരയില്‍ സിപിഎം ചരിത്രത്തിലെ ചാരമായി മാറിയിരിക്കുന്നു. അവിടെ ചെങ്കൊടിയെ മറച്ച് കാവിക്കൊടി പറന്നുകളിക്കുന്നു. അടുത്ത വര്‍ഷം മേയിലെ നിയമസഭാ തെരഞ്ഞെടുപ്പില്‍ പശ്ചിമ ബംഗാളില്‍ മാര്‍ക്സിസ്റ്റു കമ്യൂണിസ്റ്റ് പാര്‍ട്ടി ഒറ്റസംഖ്യയിലേക്കു ചുരുങ്ങും. മേയിലെതന്നെ നിയമസഭാ തെരഞ്ഞെടുപ്പില്‍ കേരളത്തില്‍ പാര്‍ട്ടി തുലോം ദയനീയമായ പ്രകടമാണ് കാഴ്ചവയ്ക്കുന്നതെങ്കില്‍ ഈ പാര്‍ട്ടിയുടെ ഭാവിയെന്താകും. ഡല്‍ഹി ഭായി വീര്‍ സിംഗ് മാര്‍ഗിലെ ഗോള്‍ മാര്‍ക്കറ്റില്‍ സ്ഥിതി ചെയ്യുന്ന പാര്‍ട്ടി ദേശീയ ആസ്ഥാനമായ എകെജി ഭവന്‍പോലും പൂട്ടിപ്പോകുന്ന സ്ഥിതിയുണ്ടാകുമോ ഈ പ്രസ്ഥാനത്തിന്.

ഒരു കാര്യം തീര്‍ച്ചായായി വരികയാണ്. ഒരു പതിറ്റാണ്ടു കഴിയുമ്പോള്‍ സിപിഎമ്മിലെ പോളിറ്റ് ബ്യൂറോ എന്ന പരമോന്നത അധികാര സമിതിയില്‍ മലയാളികള്‍ മാത്രമേ ഉണ്ടാകാനിടയുള്ളു. കേന്ദ്ര കമ്മിറ്റിയിലും ഏറെക്കുറെ ഇതുതന്നെയാവും സിപിഎമ്മിന്റെ ഭാവിസാധ്യത.പോളിറ്റ് ബ്യൂറോയില്‍ ഒരുനിര വയോധികര്‍ ഇരുപ്പുറപ്പിച്ചിട്ടുണ്ടെങ്കിലും എപ്പോഴെങ്കിലും മിണ്ടിക്കാണുന്നവര്‍ സീതാറാം യൂച്ചൂരിയും പ്രകാശ് കാരാട്ടും മാത്രമാണ്. കേരള വിഷയങ്ങളില്‍ ഇവര്‍ മിണ്ടുന്നതുതന്നെ അല്‍പം ഭയത്തോടെയുമാണ്.

മധ്യവസ്‌കരും വന്ദ്യവയോധികരും മാത്രം ഉള്‍പ്പെട്ട സമിതിയാണ് സിപിഎമ്മിന്റെ കേന്ദ്രസമിതികള്‍. കൃത്യമായി പറഞ്ഞാല്‍ 97കാരന്‍ വിഎസ് അച്യുതാനന്ദന്‍ പുറത്താക്കപ്പെട്ടതുകൊണ്ടു മാത്രം 82 വയസുമുതല്‍ 64 വയസുവരെ പ്രായമുള്ളവരാണ് ഇപ്പോഴത്തെ സിപിഎം പോളിറ്റ് ബ്യൂറോയെ അലങ്കരിക്കുന്ന നേതാക്കള്‍. ഇവരുടെ കാലശേഷം പോളിറ്റ് ബ്യൂറോയ്ക്ക് പുതിയ തലമുറ സംവിധാനത്തിനു സാധ്യതയുണ്ടോ എന്നത് ഗൗരവതരമായ പഠനവിഷയമാക്കേണ്ടിയിരിക്കുന്നു.

ഏകാധ്യപത്യം, ആള്‍പ്രമാണിത്വം, അധികാരവാഴ്ച എന്നിവയ്ക്കെതിരെ സിദ്ധാന്തം ആവിഷ്‌കരിക്കാറുള്ള സിപിഎമ്മിലെ പോളിറ്റ് ബ്യുറോയില്‍, ഒരിക്കല്‍ കയറിപ്പറ്റിയവര്‍ ആ പദവിയില്‍ ഇരുന്നുമരിക്കുക എന്നതാണ് പാരമ്പര്യവും ചരിത്രവും. വിഭാഗീയത എന്നു പേരുചാര്‍ത്തിയ ഗ്രൂപ്പിസത്തിന്റെ പേരില്‍ വിഎസ് അച്യുതാനന്ദന്‍ പോളിറ്റ് ബ്യറോയില്‍ നിന്ന് പുറത്താക്കപ്പെട്ടിരുന്നില്ലെങ്കില്‍ ഇപ്പോള്‍ 97 വയസു കാണുമായിരുന്നു. പോളിറ്റ് ബ്യൂറോയില്‍ 28 വര്‍ഷമായി ഇരിപ്പുറപ്പിച്ചിരിക്കുന്ന മലയാളിയായ എസ് രാമചന്ദ്രന്‍ പിള്ളയ്ക്ക് 82 വയസായിരിക്കുന്നു. കേരളത്തിലും കേന്ദ്രത്തിലും കാര്യമായ പദവിയിലൊന്നും വിരാജിച്ചിട്ടില്ലാത്ത സഖാവ് രാമചന്ദ്രന്‍പിള്ള ഉടനെയൊന്നും ആ പദിവിയില്‍ നിന്ന് മാറ്റപ്പെടാനിടയില്ല. പോളിറ്റ് ബ്യൂറോയിലെ ചെറുപ്പക്കാരുടെ നിരയിലുള്ള ജനറല്‍ സെക്രട്ടറി ആന്ധ്രക്കാരന്‍ സീതാറാം യെച്ചൂരിക്ക് പ്രായം 68 വയസ്. ചെറുപ്പക്കാരന്റെ ഭാവം കൈവിടാതെ ചിരിക്കുന്ന അര്‍ധമലയാളി പ്രകാശ് കാരാട്ടിനും ഭാര്യ വൃന്ദ കാരാട്ടിനും പ്രായം 72ലെത്തിയിരിക്കുന്നു. തമിഴ് നാട്ടുകാരന്‍ എകെ പത്മനാഭനും സീനിയര്‍ സിറ്റിസണ്‍ തന്നെ. പശ്ചിമബംഗാളില്‍ സിപിഎമ്മിനെ ശക്തിപ്പെടുത്താന്‍ വിവാഹം വരെ ഉപേക്ഷിച്ചു പാര്‍ട്ടിക്കായി ജീവിതം സമര്‍പ്പിച്ച ബിമന്‍ ബസു സഖാവിന് പ്രായം 80 കഴിഞ്ഞിരിക്കുന്നു. വടികുത്തിയവും വയ്പുപല്ലുവച്ചവരും വീല്‍ചെയറില്‍ കറങ്ങുന്നവരുമാണ് പോളിറ്റ് ബ്യൂറോയിലെ ഒരു നിര വയോധികര്‍ എന്നു പറയാതെ വയ്യ. തൃപുരയില്‍ സിപിഎമ്മിന്റെ അവശേഷിക്കുന്ന വിലാസമായ മണിക് സര്‍ക്കാരിന് 71 വയസ്. കേരള മുഖ്യമന്ത്രി പിണറായി വിജയന് പ്രായം 76 തികഞ്ഞിരിക്കുന്നു. 20 വര്‍ഷമായി പോളിറ്റ് ബ്യൂറോയെ അലങ്കരിക്കുന്ന ബംഗാളിയായും മുന്‍ മുഖ്യനുമായ ബുദ്ധ ദേബ് ഭട്ടാചാര്യക്കുമുണ്ട് 76 വയസ്. തമിഴ് നാട്ടില്‍ നിന്നുള്ള കെ വരദരാജനും ആന്ധ്രക്കാരനും 75 വയസില്‍ എത്തിയവരാണ്.

പശ്ചിമബംഗാളില്‍നിന്നുള്ള നിരുപം സെന്‍ 74 തികഞ്ഞയാള്‍. ബംഗാളില്‍ നിന്നുതന്നെയുള്ള സൂര്യകാന്ത മിശ്രയ്ക്കും 70 കടന്നിരിക്കുന്നു. ഇനിയാണ് പോളിറ്റ് ബ്യൂറോയിലെ താരതമ്യേന ചെറുപ്പക്കാരുടെ പ്രായവിശേഷങ്ങള്‍ മനസിലാക്കാനുള്ളത്. കേരളഘടകം പാര്‍ട്ടി സെക്രട്ടറി സ്ഥാനത്തു നിന്നും പുറത്തായ കോടിയേരി ബാലകൃഷ്ണനു പ്രായം 67. കൊല്ലംകാരന്‍ മറിയം അലക്സാണ്ടര്‍ ബേബി എന്ന എംഎ ബേബിക്കുമുണ്ട് 66 വയസ്. ബംഗാളികളായ തപന്‍കുമാര്‍ സെന്‍ -പ്രായം 69. പയ്യനെന്നു പറായാവുന്ന ബംഗാളി നിലോല്‍പല്‍ ബാസുവിന് 64 വയസ്.

അടുത്ത നിയമസഭാ തെരഞ്ഞെടുപ്പോടെ ബംഗാളിലും തൃപുരയിലും ചെങ്കൊടിയും പാര്‍ട്ടി ഓഫീസുകളും കാണാനിടയില്ല. ഇപ്പോള്‍തന്നെ പശ്ചിമ ബംഗാളില്‍ സിപിഎം ലോക്കല്‍, ഏരിയ കമ്മിറ്റി ഓഫീസുകള്‍ ഏറെയും വില്‍ക്കുകയോ അടച്ചുപൂട്ടുകയോ ചെയ്യപ്പെട്ടിരിക്കുന്നു.ആന്ധ്രാ, തമിഴ് നാട് സംസ്ഥാനങ്ങളില്‍ ജില്ലാ കമ്മിറ്റികള്‍ക്കു താഴെ ഒരു പാര്‍ട്ടി സംവിധാനം സിപിഎമ്മില്‍ ഇല്ലാതായിക്കൊണ്ടിരിക്കുന്നു. 18 സംസ്ഥാനങ്ങളില്‍ ജില്ലാ കമ്മിറ്റി സംവിധാനം പോലുമില്ല. ആറു സംസ്ഥാനങ്ങളില്‍ സംസ്ഥാ കമ്മിറ്റയിലും സിപിഎമ്മിന് ഇന്നില്ലെന്നോര്‍ക്കണം.ഇനി കേരളത്തില്‍ മാത്രമായി സിപിഎം ഒതുങ്ങുന്ന കാലത്ത് പോളിറ്റ് ബ്യൂറോയില്‍ മലയാളികള്‍ മാത്രമാവുകയും പോളിറ്റ് ബ്യൂറോ യോഗം തിരുവനന്തപുരത്ത് ചുരുങ്ങുകയും ചെയ്യപ്പെടുന്ന കാലം വന്നേക്കാം. നോക്കണേ, പി സുന്ദരയ്യയും ജ്യോതി ബസുവും എകെ ഗോപാലനും ഇഎംഎസ് നമ്പൂതിരിപ്പാടും ഹര്‍കിഷന്‍ സിംഗ് സുര്‍ജിതും ആദര്‍ശത്തിന്റെ ആള്‍രൂപങ്ങളായി നയിച്ച ദേശീയ പാര്‍ട്ടി കേരളം പോലൊരു ചെറിയ സംസ്ഥാനത്തിലേക്ക് ചുരുങ്ങിച്ചെറുതാവുന്ന ദയനീയാവസ്ഥ. പ്രത്യയശാസ്ത്രം കാലഹരണപ്പെടുമ്പോള്‍ അതില്‍ കാലോചിതമായ പൊളിച്ചെഴുത്തു വരുത്താതെ ഒരു പ്രസ്ഥാനവും നിലനില്‍ക്കില്ലെന്ന തിരിച്ചറിവ് ഇന്ത്യയിലെ കമ്മ്യൂണിസ്റ്റുകള്‍ക്ക് എന്നുണ്ടാവുമോ എന്തോ...