കെ.എം. മാണിയോട് ഇടതുമുന്നണി ചെയ്ത ക്രൂരത ജോസ്​ കെ. മാണി മറന്നാലും ജനങ്ങള്‍ മറക്കില്ലെന്ന്​ ഉമ്മന്‍ ചാണ്ടി. അര്‍ഹിക്കാത്ത രാജ്യസഭ സീറ്റ് കേരള കോണ്‍ഗ്രസിന്​ നല്‍കിയതിനാണോ പിന്നില്‍നിന്ന് കുത്തി എന്ന് ജോസ് ആരോപിക്കുന്നതെന്നും അദ്ദേഹം ചോദിച്ചു. മാധ്യമങ്ങളോട്​ സംസാരിക്കുകയായിരുന്നു ഉമ്മന്‍ ചാണ്ടി.

കെ.എം. മാണിയെ കേരളം സ്നേഹിച്ചിരുന്നു. ജോസ് ഉള്ളതുകൊണ്ട്​ ഇടതുമുന്നണിക്ക്​ ഗുണമൊന്നും കിട്ടില്ല. തദ്ദേശ തെരഞ്ഞെടുപ്പില്‍ കോട്ടയത്തടക്കം അതുകണ്ടതാണ്​. രാഹുല്‍ ഗാന്ധിയുടെ വരവ്​ യു.ഡി.എഫിന്​ ഗുണം ചെയ്​തു. നിയമസഭ തെരഞ്ഞെടുപ്പില്‍ യു.ഡി.എഫ്​ മികച്ച വിജയം നേടും. തെരഞ്ഞെടുപ്പ് സര്‍വേ ഗുണം ചെയ്തെന്നും ഇതോടെ യു.ഡി.എഫ്​ പ്രവര്‍ത്തകര്‍ ഉണര്‍ന്ന്​ പ്രവര്‍ത്തിച്ചെന്നും അദ്ദേഹം കൂട്ടിച്ചേര്‍ത്തു.

യു.ഡി.എഫിന്റെ ക്യാപ്​റ്റനാണോയെന്ന ചോദ്യത്തിന്​ അല്ല എന്നായിരുന്നു മറുപടി. ക്യാപ്​റ്റനെ ജനങ്ങള്‍ തീരുമാനിക്കും. മുന്നണിയില്‍ പ്രശ്​നങ്ങളൊന്നുമില്ല. പുതുപ്പള്ളി എപ്പോഴും തന്നോടൊപ്പമാണ്. തെരഞ്ഞെടുപ്പില്‍ സഹായിക്കുന്നതിനേക്കാള്‍ പത്തിരട്ടി സ്നേഹം അവര്‍ തനിക്ക് നല്‍കുന്നുണ്ട്​.

ശബരിമല വിഷയം വിവാദമാക്കാന്‍ യു.ഡി.എഫ്​ ശ്രമിച്ചിട്ടില്ല. ഭക്തരുടെ കാര്യത്തില്‍ വിട്ടുവീഴ്ചയില്ലാത്ത നിലപാടാണുള്ളത്. ശബരിമല വിഷയം ഉന്നയിക്കാന്‍ ബി.ജെ.പിക്ക്​ അവകാശമില്ല. സുപ്രീംകോടതി വിധി വന്നപ്പോള്‍ അവര്‍ കാഴ്ചക്കാരായി നിന്നു. സംസ്ഥാന സര്‍ക്കാറും അതുതന്നെ ചെയ്തു. ബി.ജെ.പിയുടെയും സി.പി.എമ്മി​െന്‍റയും നിലപാട് ജനങ്ങള്‍ തിരിച്ചറിഞ്ഞെന്നും അദ്ദേഹം പറഞ്ഞു.