നിയമസഭാ തെരഞ്ഞെടുപ്പ് കഴിഞ്ഞിട്ട് ഒരു മാസത്തോളമായി. ഇനി ഫലം കൂടിയേ വരാനുള്ളൂ. അതേസമയം കള്ളപ്പണവും അത് തട്ടിയെടുത്തതും ഇപ്പോള്‍ വാര്‍ത്തകളില്‍ നിറയുകയാണ്. ദേശീയ പാര്‍ട്ടിയെന്ന് മാത്രമാണ് മാധ്യമങ്ങള്‍ പറയുന്നത്. ഏത് രാഷ്ട്രീയ പാര്‍ട്ടിയാണെന്ന ചോദ്യവുമായി സോഷ്യല്‍ മീഡിയയും രംഗത്തുണ്ട്. അത് പോലീസുകാര്‍ തന്നെ ഉടന്‍ പറയും.

നിയമസഭാ തിരഞ്ഞെടുപ്പില്‍ ചെലവാക്കാനെത്തിച്ച മൂന്നരക്കോടി കള്ളപ്പണം ദേശീയ പാര്‍ട്ടിയുടെ നേതാക്കള്‍ തട്ടിയെടുത്തത് കണ്ണൂര്‍ കല്ല്യാശ്ശേരിയിലെ ഗുണ്ടയെ ഉപയോഗിച്ചാണെന്ന് പൊലീസിന് വിവരം ലഭിച്ചു. ഇയാള്‍ തൃശൂരില്‍ എത്തുംവരെ പണം കൊണ്ടുവന്ന വാഹനം ജില്ലാ നേതാക്കള്‍ പിടിച്ചിട്ടു.

രാത്രിയാത്ര അപകടകരമാണെന്നു പറഞ്ഞ് രണ്ട് നേതാക്കള്‍ ഡ്രൈവറെ തൃശൂരില്‍ താമസിപ്പിച്ചു. പണം കൊണ്ടുവന്ന വാഹനം അന്ന് കടത്തിവിടില്ലെന്ന് ഉറപ്പാക്കിയിട്ട് ഇവര്‍ പാര്‍ട്ടിയുടെ വിശ്വസ്തനായ ഗുണ്ടയെ ബന്ധപ്പെട്ടു.

ഏപ്രില്‍ മൂന്നിന് പുലര്‍ച്ചെ രണ്ടരയോടെ ഇയാള്‍ കാറില്‍ തൃശൂരിലെത്തി. ഇരിങ്ങാലക്കുടയില്‍ താമസിക്കുന്ന തലശ്ശേരി സ്വദേശിയായ മറ്റൊരു ഗുണ്ടയെയും ഇതിനിടെ തൃശൂരിലെത്തിച്ചു. രണ്ട് കാറുകളില്‍ സഹായത്തിനായി നാല് പേരെയും ഒപ്പം കൂട്ടി.

പണവുമായെത്തിയ കാറിന്റെ ഡ്രൈവറെ വെളുപ്പിന് നാലിന് എറണാകുളത്തേക്ക് പറഞ്ഞുവിട്ടു. പിന്നിലായി മൂന്ന് കാറുകളില്‍ ഗുണ്ടാസംഘം പിന്തുടര്‍ന്നു. കൊടകരയിലെ മേല്‍പ്പാലം കഴിഞ്ഞപ്പോള്‍ പണവുമായി പോകുന്ന കാറിനെ ഗുണ്ടാസംഘത്തിന്റെ ഒരു കാര്‍ മറികടന്നു.

മറ്റ് രണ്ട് കാറുകളാണ് കാറില്‍ ഇടിച്ചത്. അപകടം മനസിലാക്കി ഡ്രൈവര്‍ പുറത്തിറങ്ങി. ആ സമയം, ഗുണ്ടാസംഘം കാര്‍ തട്ടിക്കൊണ്ടുപോവുകയായിരുന്നു. കാര്‍ ഡ്രൈവര്‍ കോഴിക്കോട് ചേളന്നൂര്‍ കണ്ണങ്കര എ.കെ. വീട്ടില്‍ ഷംജീറാണ് കൊടകര പൊലീസില്‍ പരാതി നല്‍കിയത്. കൊള്ള ആസൂത്രണം ചെയ്ത പാര്‍ട്ടി നേതാവ് അരമണിക്കൂറിനുള്ളില്‍ സ്‌റ്റേഷനിലെത്തി ഒത്തുതീര്‍പ്പിന് ശ്രമിച്ചു. പാര്‍ട്ടിയിലെ നേതാക്കള്‍ തന്നെയാണ് സംഭവം പുറത്തറിയിച്ചത്.

അതേസമയം കുഴല്‍പ്പണ കടത്ത്, കവര്‍ച്ചാ കേസുകളില്‍ സമഗ്ര അന്വേഷണം വേണമെന്ന് സി.പി.എം തൃശൂര്‍ ജില്ലാകമ്മിറ്റി ആവശ്യപ്പെട്ടു. ഉന്നതര്‍ക്കും ഇതില്‍ ബന്ധമുണ്ടെന്ന് തെളിയിക്കുന്ന എസ്.എം.എസ് സന്ദേശങ്ങളും പുറത്തുവന്നിട്ടുണ്ട്. ഭൂമി ഇടപാടിനായി എറണാകുളത്തേക്ക് കൊണ്ടുപോയ 25 ലക്ഷം രൂപയും കാറും തട്ടിയെടുത്തെന്ന പരാതിയില്‍ കൊടകര പൊലീസിന്റെ അന്വേഷണമാണ് മൂന്നരക്കോടിയുടെ കള്ളപ്പണത്തിലെത്തിയത്.

എറണാകുളത്തേക്ക് മാത്രം കൊടുത്തുവിട്ട കുഴല്‍പ്പണത്തിന്റെ കണക്ക് 3.5 കോടിയിലേറെയാണെന്നാണ് വിവരം. എന്നാല്‍ 25 ലക്ഷം നഷ്ടപ്പെട്ടെന്നാണ് കോഴിക്കോട് സ്വദേശി നല്‍കിയ പരാതി. ഇക്കാര്യത്തിലും അന്വേഷണം നടത്തണമെന്ന് ജില്ലാ സെക്രട്ടറി എം.എം വര്‍ഗീസ് ആവശ്യപ്പെട്ടു.

നിയമസഭാ തിരഞ്ഞെടുപ്പില്‍ ഉപയോഗിക്കാന്‍ കോടികണക്കിന് രൂപ കുഴല്‍പണമായി കൊണ്ടുവന്ന സംഭവം തിരഞ്ഞെടുപ്പ് കമ്മിഷന്‍ അന്വേഷിക്കണമെന്ന് എല്‍.ഡി.എഫ് ആവശ്യപ്പെട്ടു. ഈ കള്ളപ്പണത്തില്‍ നിന്ന് മൂന്നര കോടി രൂപ തൃശൂര്‍ കൊടകരയില്‍ കൊള്ളയടിക്കപ്പെട്ട സംഭവം ഗൗരവമുള്ളതാണ്.

സമാനമായ സംഭവം പാലക്കാടും നടന്നു. പണം ഒഴുക്കി ജനവിധി അട്ടിമറിക്കാനുള്ള ഗൂഢനീക്കമാണ് ഇവിടെ വെളിപ്പെട്ടത്. ഉത്തരേന്ത്യന്‍ മോഡലില്‍ കള്ളപ്പണം ഒഴുക്കി ജനാധിപത്യം അട്ടിമറിക്കാന്‍ നടത്തിയ ശ്രമം തിരഞ്ഞെടുപ്പ് കമ്മീഷന്‍ ഗൗരവമായി കാണണണമെന്ന് എല്‍ഡിഎഫ് കണ്‍വീനര്‍ എ വിജയരാഘവന്‍ പ്രസ്താവനയില്‍ പറഞ്ഞു.