നരേന്ദ്ര മോദിക്ക് ആര്‍ എസ് എസിന്റെ മുന്നറിയിപ്പ്. സൂക്ഷിച്ചില്ലെങ്കില്‍ ദുഃഖിക്കേണ്ടി  വരുമെന്നാണ്  മുന്നറിയിപ്പ്. പരസ്യമായി പറഞ്ഞില്ലെങ്കിലും പരോക്ഷ മുന്നറിയിപ്പാണ് ആര്‍ എസ് എസ് നല്‍കിയിരിക്കുന്നത് .

കോവിഡ് വ്യാപനത്തിന്റെ പേരില്‍ നരേന്ദ്ര മോദി സര്‍ക്കാരിന്റെ സല്‍പ്പേര്  കളങ്കപ്പെടുത്താന്‍ ശ്രമം നടക്കുന്നതായാണ് ആര്‍ എസ് എസ് കണ്ടെത്തിയിരിക്കുന്നത്. അവര്‍ അക്കാര്യം പൊതിഞ്ഞ് പറഞ്ഞുവെന്നേയുള്ളു. അത് പ്രധാനമന്ത്രിയോടുള്ള അടുപ്പം കൊണ്ടു മാത്രമാണ്.

കോവിഡ്  ശക്തമായ വെല്ലുവിളിയാണ് ഉയര്‍ത്തുന്നതെന്നാണ്  ആര്‍എസ്എസ് സര്‍ക്കാര്യവാഹ് (ജനറല്‍ സെക്രട്ടറി) ദത്താത്രേയ  ഹോസബോളെ പറഞ്ഞത്.

സ്ഥിതി നിര്‍ണായകമാണെങ്കിലും സമൂഹത്തിന്റെ ശക്തിയും വളരെ വലുതാണ്. ഏറ്റവും ശ്രമകരമായ പ്രതിസന്ധി നേരിടാനുള്ള ഭാരതീയരുടെ കഴിവ് ലോകമെമ്പാടും അറിയപ്പെടുന്നതാണ് എന്നാല്‍ സമൂഹത്തിലെ വിനാശകരവും ഭാരത് വിരുദ്ധവുമായ ശക്തികള്‍ക്ക് ഈ പ്രതികൂല സാഹചര്യങ്ങള്‍ മുതലെടുത്ത് രാജ്യത്ത് നിഷേധാത്മകതയുടെയും അവിശ്വാസത്തിന്റെയും അന്തരീക്ഷം സൃഷ്ടിക്കാന്‍ കഴിയും.

സാഹചര്യം പരിഹരിക്കാനുള്ള ക്രിയാത്മക ശ്രമങ്ങള്‍ക്ക് പുറമെ ഈ വിനാശകരമായ ശക്തികളുടെ ഗൂഡാലോചനകളെക്കുറിച്ചും ജാഗ്രത പാലിക്കണം ഹോസബോളെ  പ്രസ്താവനയില്‍ പറഞ്ഞു.

പാകിസ്ഥാന്‍ ഉള്‍പ്പെടെയുള്ള രാജ്യങ്ങള്‍ ഇന്ത്യക്ക് പിന്തുണ പ്രഖ്യാപിച്ചതോടെയാണ് ആര്‍എസ്എസ് കേന്ദ്ര സര്‍ക്കാരിന് മുന്നറിയിപ്പ് നല്‍കിയത്. മറ്റ് രാജ്യങ്ങള്‍ ഇന്ത്യക്ക് അനുകൂലമായി അത്ഭുതകരമായ പിന്തുണയാണ് നല്‍കിയത്. എന്നാല്‍ കേന്ദ്ര സര്‍ക്കാര്‍ ഇതിനെ ഒരു അഭിമാന പ്രശ്‌നമായാണ്  കണക്കാക്കിയിരിക്കുന്നത്. ഓക്‌സിജന്‍ കിട്ടാതെ നിരവധിയാളുകളാണ് ഇന്ത്യയില്‍ മരിക്കുന്നത്. വലിയ നാണക്കേടാണ് ഇക്കാര്യത്തില്‍ ഇന്ത്യക്ക് സംഭവിച്ചിരിക്കുന്നത്.

സമൂഹത്തില്‍ സര്‍ഗാത്മകത, പ്രത്യാശ, വിശ്വാസം എന്നിവയുടെ അന്തരീക്ഷം നിലനിര്‍ത്തുന്നതിന് സംഭാവന നല്‍കണമെന്ന് മാധ്യമങ്ങള്‍ ഉള്‍പ്പെടെ സമൂഹത്തിലെ എല്ലാ വിഭാഗങ്ങളോടും ഹോസബോളെ അഭ്യര്‍ത്ഥിച്ചു. സോഷ്യല്‍ മീഡിയയില്‍ സജീവമായിരിക്കുന്നവര്‍ ക്രിയാത്മക പങ്ക് വഹിക്കണമെന്നും കൂടുതല്‍ സംയമനം പാലിക്കണമെന്നും അദ്ദേഹം പറഞ്ഞു. രാജ്യത്തിനും കേന്ദ്ര സര്‍ക്കാരിനുമെതിരെ സാമൂഹിക മാധ്യമങ്ങളില്‍ ഉയരുന്ന വിമര്‍ശനങ്ങള്‍ കണക്കിലെടുത്താണ് ആര്‍ എസ് എസിന്റെ ഉപദേശം.

പകര്‍ച്ചവ്യാധി പെട്ടെന്നു വഷളായതിനാല്‍ ആശുപത്രികളില്‍ കിടക്കകള്‍, ഓക്സിജന്‍, ആവശ്യമായ മരുന്നുകള്‍ എന്നിവയുടെ കുറവ് ജനങ്ങള്‍ നേരിടുന്നുന്നതായി ആര്‍ എസ് എസ് സമ്മതിച്ചു.   വെല്ലുവിളികള്‍  നേരിടാന്‍ കേന്ദ്ര-സംസ്ഥാന സര്‍ക്കാരുകളും പ്രാദേശിക നാഗരിക സംഘടനകളും വിപുലമായ ശ്രമങ്ങള്‍ നടത്തുന്നുണ്ടെന്നും ആര്‍ എസ് എസ് ജനറല്‍ സെക്രട്ടറി  പറഞ്ഞു.

ആരോഗ്യ പ്രവര്‍ത്തകരും സുരക്ഷാ ഉദ്യോഗസ്ഥരും  ശുചിത്വ പ്രവര്‍ത്തകരും  മുമ്പത്തെപ്പോലെ ഉത്തരവാദിത്തങ്ങള്‍ നിറവേറ്റുകയാണെന്ന് അദ്ദേഹം പറഞ്ഞു. രാഷ്ട്രീയ സ്വയംസേവക സംഘത്തിലെ സ്വയംസേവകര്‍ എല്ലായ്പ്പോഴും എന്നപോലെ സമൂഹത്തിന്റെ ആവശ്യങ്ങള്‍ നിറവേറ്റുന്നതിനായി രാജ്യത്തുടനീളം വിവിധ തരം സേവനങ്ങള്‍ സജീവമായി നടത്തുന്നുണ്ടെന്നും അദ്ദേഹം പറഞ്ഞു.

വെല്ലുവിളിയുടെ ഗൗരവം തിരിച്ചറിഞ്ഞ നിരവധി സാമൂഹിക, മത സ്ഥാപനങ്ങള്‍ ഉള്‍പ്പെടെയുള്ള പൊതു സമൂഹം സഹായത്തിനായി എല്ലാത്തരം ശ്രമങ്ങളിലും സ്വമേധയാ പങ്കാളികളായിട്ടുണ്ട്.സ്ഥിതി ഗുരുതരമാണെങ്കിലും സ്ഥിതി മറികടക്കാന്‍ സമാധാനം പാലിക്കേണ്ടതുണ്ടെന്നും സര്‍ക്കാര്യവാഹ് പറഞ്ഞു.

മാസ്‌കുകള്‍ ധരിക്കുക, ശുചിത്വം, ശാരീരിക അകലം, സ്വകാര്യ, പൊതു പരിപാടികളിലെ സംഖ്യകളുടെ പരിധി, കര്‍ഫ്യൂ പോലുള്ള നിയന്ത്രണങ്ങള്‍,  നീരാവി ശ്വസനം, പ്രതിരോധ കുത്തിവയ്പ്പ് തുടങ്ങിയ ആരോഗ്യ പരിഹാരങ്ങളെക്കുറിച്ച് അവബോധം സൃഷ്ടിക്കേണ്ടത് പ്രധാനമാണെന്ന് ഹോസബോളെ  പറഞ്ഞു.

പൊതുജനങ്ങള്‍ക്ക് വേണ്ടിയാണ് ആര്‍ എസ് എസ് സംസാരിക്കുന്നതെന്ന് പ്രത്യക്ഷത്തില്‍ തോന്നുമെങ്കിലും സംഗതി അങ്ങനെയല്ല. ശ്രദ്ധിക്കാനുള്ള നിര്‍ദ്ദേശമാണ് ആര്‍ എസ് എസ് കേന്ദ്ര സര്‍ക്കാരിന് നല്‍കുന്നത്. വരും ദിവസങ്ങളില്‍ ശ്രദ്ധിച്ചില്ലെങ്കില്‍ സ്ഥിതി  കൂടുതല്‍ ഗുരുതരമാകും.