ഇനി പ്രതിപക്ഷ നേതാവ് രമേശ് ചെന്നിത്തല എന്തു പറയും. ദേശീയ ചാനലുകള്‍ക്കൊപ്പം മലയാളത്തിലെ 2 പ്രധാന ചാനലുകളായ മാതൃഭൂമി ന്യൂസും ഏഷ്യാനെറ്റും ഭരണതുടര്‍ച്ചയാണ് പറയുന്നത്.

കേരളത്തില്‍ യുഡിഎഫിനെ അധികാരത്തിലേറ്റാന്‍ രാഹുല്‍ ഗാന്ധിയും ആന്റണിയും പഠിച്ച പണി പലതും നോക്കിയിട്ടും നടക്കില്ലെന്നാണ് കാര്യങ്ങള്‍ സൂചിപ്പിക്കുന്നത്. ഭരണം കിട്ടാതെ വന്നാല്‍ കെ. സുധാകരന്‍ പറഞ്ഞപോലെ കോണ്‍ഗ്രസ് തകരും.

കേരളത്തില്‍ 120 വരെ സീറ്റുനേടി ഇടതുമുന്നണി ഭരണം നിലനിര്‍ത്തുമെന്ന് പ്രവചിച്ച് മാതൃഭൂമി ന്യൂസ്ആക്‌സിസ് മൈ ഇന്ത്യ എക്‌സിറ്റ് പോള്‍. 104 മുതല്‍ 120 വരെ സീറ്റ് എല്‍.ഡി.എഫ്. നേടുമ്പോള്‍ യു.ഡി.എഫ്. 2036 സീറ്റിലൊതുങ്ങും. എന്‍.ഡി. എ.യ്ക്കും മറ്റുള്ളവര്‍ക്കും രണ്ടുവരെ സീറ്റാണ് സര്‍വേ പ്രവചിക്കുന്നത്. 47 ശതമാനം വോട്ടുവിഹിതം എല്‍.ഡി.എഫ്. നേടുമ്പോള്‍ യു.ഡി.എഫ്.38, എന്‍.ഡി.എ.12, മറ്റുള്ളവര്‍ മൂന്നു ശതമാനവും വോട്ടുനേടും.

കോവിഡ് പ്രതിസന്ധി മികച്ച രീതിയില്‍ കൈകാര്യം ചെയ്തതും ഭക്ഷ്യകിറ്റ് ഉള്‍പ്പെടെയുള്ള ജനക്ഷേമ പദ്ധതികളുമാണ് ഇടതുമുന്നണിക്ക് ഈ തിരഞ്ഞെടുപ്പില്‍ പ്രധാന അനുകൂലഘടകമെന്ന് മാതൃഭൂമി ന്യൂസ്ആക്‌സിസ് മൈ ഇന്ത്യ എക്‌സിറ്റ് പോള്‍. പ്രധാനമായും അഞ്ചുകാര്യങ്ങളാണ് എല്‍.ഡി.എഫിനെ മികച്ച വിജയത്തിലേക്ക് നയിക്കുകയെന്ന് സര്‍വേ ചൂണ്ടിക്കാട്ടുന്നു.

പിണറായി സര്‍ക്കാരിന് അനുകൂലമായി ശക്തമായ തരംഗം നിലനില്‍ക്കുന്നു. യുവാക്കള്‍ക്കിടയില്‍ മുഖ്യമന്ത്രി പിണറായി വിജയനുള്ള വന്‍ സ്വീകാര്യതയാണുള്ളത്. കോവിഡ് ഒന്നാംതരംഗം മികച്ച രീതിയില്‍ കൈകാര്യം ചെയ്തതാണ് പിണറായിയുടെ ജനപ്രീതി ഉയര്‍ത്തിയത്.

84 ലക്ഷം കുടുംബങ്ങള്‍ക്ക് ഭക്ഷ്യകിറ്റ് ഗുണമായിട്ടുണ്ട്. ഇതുള്‍പ്പെടെയുള്ള ജനക്ഷേമ പദ്ധതികള്‍ വോട്ടായിമാറും. േക്ഷമപെന്‍ഷന്‍ വര്‍ധിപ്പിച്ചതും ഭരണത്തുടര്‍ച്ചയ്ക്കിടയാക്കും

മലപ്പുറമൊഴികെ 13 ജില്ലകളിലും ഇടതുതേരോട്ടമാണ് മാതൃഭൂമി ന്യൂസ്ആക്‌സിസ് മൈ ഇന്ത്യ സര്‍വേ പ്രവചിക്കുന്നത്. മലബാറിലെ 63 മണ്ഡലങ്ങളില്‍ 46ഉം എല്‍.ഡി.എഫിനൊപ്പമെന്ന് സര്‍വേ വിലയിരുത്തുമ്പോള്‍ 17 ഇടത്ത് മാത്രമാണ് യു.ഡി.എഫിന് മേല്‍ക്കൈ. എറണാകുളം, തൃശ്ശൂര്‍, ഇടുക്കി ജില്ലകളിലെ 29 മണ്ഡലങ്ങളില്‍ 22 ഇടത്ത് എല്‍.ഡി.എഫ്. മേല്‍ക്കൈ നേടും.

അഞ്ചിടത്ത് മാത്രമാണ് യു.ഡി.എഫിന് മുന്‍തൂക്കം. രണ്ടിടത്ത് മറ്റുള്ളവരും ജയിക്കുമെന്നാണ് പ്രവചനം. കോട്ടയം മുതല്‍ തിരുവനന്തപുരം വരെയുള്ള ജില്ലകളിലെ 48 മണ്ഡലങ്ങളില്‍ 44ഉം എല്‍.ഡി.എഫിനൊപ്പമാണ്. നാലിടത്ത് മാത്രമാണ് യു.ഡി.എഫിന് മേല്‍ക്കൈ. 28,124 പേരാണ് സര്‍വേയില്‍ പങ്കെടുത്തത്. പ്രത്യേകം തയ്യാറാക്കിയ ചോദ്യാവലിയുമായി ആളുകളെ നേരില്‍ക്കണ്ടാണ് സര്‍വേ നടത്തിയത്

അതേസമയം സംസ്ഥാന നിയമസഭാ തെരഞ്ഞെടുപ്പില്‍ കേരളത്തില്‍ തുടര്‍ഭരണം പ്രവചിച്ച് ഏഷ്യാനെറ്റ് ന്യൂസ് സീ ഫോര്‍ പോസ്റ്റ് പോള്‍ സര്‍വെ ഫലവും പുറത്തായി. 77 മുതല്‍ 86 സീറ്റ് വരെ ഇടതുപക്ഷത്തിന് ലഭിക്കുമെന്നും 52 മുതല്‍ 61 സീറ്റ് വരെ നേടി യുഡിഎഫ് രണ്ടാമതെത്തുമെന്നും സര്‍വെ ഫലം വ്യക്തമാക്കുന്നു. ബിജെപിക്ക് രണ്ട് മുതല്‍ അഞ്ച് വരെ സീറ്റുകളാണ് ലഭിക്കുക.

മറ്റുള്ളവര്‍ മൂന്ന് സീറ്റ് വരെ നേടിയേക്കാമെന്നും സര്‍വെ പറയുന്നുണ്ട്. വോട്ട് ശതമാനത്തിലും മുന്നില്‍ ഇടതുപക്ഷമാണ്. 42 ശതമാനം വോട്ടാണ് ഇടതുമുന്നണിക്ക് ലഭിക്കുക. യുഡിഎഫിന് 38 ശതമാനം വോട്ട് ലഭിക്കും. മൂന്നാം സ്ഥാനത്തെത്തുന്ന എന്‍ഡിഎക്ക് 17 ശതമാനം വോട്ടാണ് നേടാനാവുക.

സംസ്ഥാനത്തെ സ്ത്രീ വോട്ടര്‍മാരില്‍ 43 ശതമാനം സ്ത്രീകളും പിന്തുണക്കുന്നത് ഇടതുമുന്നണിയെയാണ്. 37 ശതമാനമാണ് യുഡിഎഫിനെ പിന്തുണക്കുന്നത്. പുരുഷന്മാരിലും കൂടുതല്‍ പിന്തുണ ഇടതിനാണ്. 41 ശതമാനം. 39 ശതമാനം പേര്‍ യുഡിഎഫിനെ പിന്തുണക്കുന്നു.