3500 കോടി രൂപയുടെ നിക്ഷേപ പദ്ധതിയില് കിറ്റക്സ് പിന്മാറി; നടപടി കിറ്റക്സില് വിവിധ സര്ക്കാര് വകുപ്പുകള് നടത്തിയ പരിശോധനകളില് പ്രതിഷേധിച്ച്; കിറ്റക്സിലെ പരിശോധനകള്ക്കു പിന്നില് സ്ഥലം എംഎല്എ എന്ന് സാബു ജേക്കബ്
സര്ക്കാരുമായി ഒപ്പുവച്ച 3500 കോടി രൂപയുടെ നിക്ഷേപ പദ്ധതിയില് കിറ്റക്സ് പിന്മാറി. കിറ്റക്സില് സര്ക്കാര് വകുപ്പുകള് നടത്തുന്ന പരിശോധനകളില് പ്രതിഷേധിച്ചാണ് നടപടി. കിറ്റക്സ് ചെയര്മാന് സാബു ജേക്കബ് കൊച്ചില് നടത്തിയ വാര്ത്താ സമ്മേളനത്തിലാണ് ഇക്കാര്യം അറിയിച്ചത്. കഴിഞ്ഞ വര്ഷം അസെന്ഡിലാണ് കിറ്റക്സ് സര്ക്കാരുമായി ചേര്ന്ന് 3500 കോടി നിക്ഷേപം നടത്താന് തീരുമാനിച്ചത്. ഒരു അപ്പാരല് പാര്ക്കും കൊച്ചി, തിരുവനന്തപുരം, പാലക്കാട് എന്നിവിടങ്ങളില് 600 പുതുസംരംഭകര്ക്ക് അവസരം ഒരുങ്ങുമായിരുന്ന വ്യവസായ പാര്ക്ക് നിര്മിക്കാനുമുള്ള ധാരണാ പത്രത്തില് നിന്നുമാണു പിന്മാറുന്നത്.
കഴിഞ്ഞ ഒരു മാസത്തിനുള്ളില് 11 തവണ വിവിധ വിഭാഗങ്ങളിലെ ഉദ്യോഗസ്ഥര് കിറ്റക്സ് യൂണിറ്റുകളില് പരിശോധനയ്ക്ക് എത്തിയതായി സാബു പറയുന്നു. പത്തിലേറെ വണ്ടികളില് വന്നിറങ്ങുന്ന 40, 50 പേരുടെ സംഘം വിവിധ ഫ്ലോറുകളിലേയ്ക്ക് ഇരച്ചു കയറുകയാണു പതിവ്. ജോലി തടസപ്പെടുത്തി വനിതാ ജീവനക്കാരുടെ ഉള്പ്പടെ ഫോണ്നമ്പരും വിലാസവും എഴുതിയെടുത്താണു മടങ്ങുന്നത്. മുന്നൂറില് അധികം ജോലിക്കാരെ ചോദ്യം ചെയ്തു പോകുന്നതല്ലാതെ എന്തിനാണു പരിശോധിച്ചതെന്നു പറയാറില്ലെന്നും അദ്ദേഹം പറയുന്നു.
അപ്പാരല് പാര്ക്കിലും വ്യവസായ പാര്ക്കിലുമായി 35000 പേര്ക്കു ജോലി ലഭിക്കുമായിരുന്ന പദ്ധതിയാണ് ഒഴിവാക്കുന്നത്. ധാരണാ പത്രം അനുസരിച്ച് അപ്പാരല് പാര്ക്കിനുള്ള സ്ഥലം എടുത്ത് വിശദമായ പ്ലാനും പ്രൊജക്റ്റ് റിപ്പോര്ട്ടും തയാറായിരുന്നു. കോവിഡ് പ്രതിസന്ധികള്ക്കിടയിലും വലിയ മുതല് മുടക്കുള്ള നിക്ഷേപ പദ്ധതികളുമായി മുന്നോട്ടു പോകാനുള്ള എല്ലാ നടപടികളും പൂര്ത്തിയാക്കിയതാണ്.
2025ല് പദ്ധതി പൂര്ത്തിയാക്കാനിരിക്കെയാണു പിന്മാറ്റം. എന്നാല് ഇപ്പോഴുള്ള അനുഭവങ്ങളുടെ പശ്ചാത്തലത്തില് കൂടുതല് മുതല്മുടക്കാനുള്ള ധാരണാ പത്രത്തില് നിന്നും പിന്നോട്ട് പോകുവാന് നിര്ബന്ധിതരായിരിക്കുകയാണ്. ട്രിപ്പിള് ലോക്ക്ഡൗണ് സമയത്ത് യാതൊരു കോവിഡ് മാനദണ്ഡങ്ങളും പാലിക്കാതെയായിരുന്നു പരിശോധനകളെന്നും അദ്ദേഹം പറഞ്ഞു.
കിറ്റക്സിലെ പരിശോധനകള്ക്കു പിന്നില് സ്ഥലം എംഎല്എയാണെന്നു സംശയിക്കുന്നതായും സാബു ജേക്കബ് പറഞ്ഞിരുന്നു. അതേസമയം കിറ്റെക്സിനെതിരെ ഹൈക്കോടതിക്കു ലഭിച്ച പരാതിയുടെ അടിസ്ഥാനത്തില് കോടതി നിര്ദേശപ്രകാരമായിരിക്കും പരിശോധനകളെന്നു സ്ഥലം എംഎല്എ പി.വി. ശ്രീനിജിന് പ്രതികരിച്ചു.
https://www.facebook.com/Malayalivartha