ഏത് നിമിഷവും പിടിവീഴും... ആള്മാറാട്ടം നടത്തിയതിന് പൊലീസ് കേസെടുത്ത വ്യാജ അഭിഭാഷക സെസി സേവ്യറിന്റെ അറസ്റ്റു തടയണമെന്ന ഹര്ജി ഹൈക്കോടതി തള്ളി; സുഹൃത്തുക്കള് വഞ്ചിക്കുകയായിരുന്നെന്ന് സെസി; ഇനി കാര്യങ്ങള് അറസ്റ്റിലേക്ക്
ആലപ്പുഴ കോടതിയില് ആള്മാറാട്ടം നടത്തിയതിന് പൊലീസ് കേസെടുത്ത വ്യാജ അഭിഭാഷക സെസി സേവ്യറിന്റെ അറസ്റ്റിലേക്കാണ് കാര്യങ്ങള് പോകുന്നത്. അറസ്റ്റ് തടയണമെന്ന ഹര്ജി ഹൈക്കോടതി തള്ളിയിരിക്കുകയാണ്. ഹര്ജിയില് വിശദമായ വാദം കേള്ക്കണമെന്ന നിലപാടെടുത്ത കോടതി ഇവരുടെ ഹര്ജി ഈ മാസം 30നു പരിഗണിക്കുന്നതിനു മാറ്റി. ഹൈക്കോടതി കേസ് പരിഗണിക്കുന്നതിന്റെ പേരില് പൊലീസിന് ഇവരെ അറസ്റ്റു ചെയ്യുന്നതിനു തടസമില്ല.
അതേസമയം കോടതിയില് അഭിഭാഷകയായി ആള്മാറാട്ടം നടത്തിയ സെസി സേവ്യര് നല്കിയ മുന്കൂര് ജാമ്യാപേക്ഷ പരിഗണിയ്ക്കുന്നത് ഹൈക്കോടതി ഈ മാസം 30 ലേക്ക് മാറ്റി.
തനിക്കെതിരായ വഞ്ചനാകുറ്റം നിലനില്ക്കില്ലെന്ന് സെസ്സി സേവ്യര് വാദിച്ചു. മനഃപൂര്വം ആള്മാറാട്ടം നടത്തിയിട്ടില്ല, സുഹൃത്തുക്കള് തന്നെ വഞ്ചിക്കുകയായിരുന്നുവെന്നും സെസിയുടെ മുന്കൂര് ജാമ്യാപേക്ഷയില് വ്യക്തമാക്കിയിരുന്നു. പാവപ്പെട്ട കുടുംബത്തിലെ അംഗമായ താന് സുഹൃത്തുക്കളുടെ പ്രേരണയില് വീണ്ടു വിചാരമില്ലാതെ ബാര് അസോസിയേഷന് തെരഞ്ഞെടുപ്പില് മത്സരിയ്ക്കുകയായിരുന്നു. അസോസിയേഷന് അംഗമില്ലാതിരുന്നിട്ടും തന്നെ പത്രിക സ്വീകരിച്ചു. ജാമ്യം ലഭിയ്ക്കാവുന്ന വകുപ്പുകള് പ്രകാരമെടുത്ത കേസിലെ വകുപ്പുകള് പിന്നീട് മാറ്റുകയായിരുന്നുവെന്നും പ്രതിഭാഗം കോടതിയില് വാദിച്ചു.
വ്യാജരേഖകള് ചമച്ച് അഭിഭാഷകയായി ആലപ്പുഴ കോടതിയില് പ്രാക്ടീസ് ചെയ്തിരുന്ന യുവതിക്കെതിരെ പരാതിയുയര്ന്നപ്പോഴാണ് വാര്ത്തയായത്. കുട്ടനാട് രാമങ്കരി സ്വദേശിനിയാണ് സെസ്സി സേവ്യര്. ബാര് അസോസിയേഷന് നല്കിയ പരാതിയുടെ അടിസ്ഥാനത്തിലായിരുന്നു ആലപ്പുഴ നോര്ത്ത് പൊലീസ് കേസെടുത്തത്.
മതിയായ യോഗ്യതയില്ലാതെ രണ്ടര വര്ഷം ആലപ്പുഴ കോടതിയില് അഭിഭാഷകയായി സെസി പ്രാക്ടീസ് ചെയ്തു വരുന്നതായി ബാര് അസോസിയേഷന് നല്കിയ പരാതിയില് പറയുന്നു. അസോസിയേഷന് ലഭിച്ച അജ്ഞാത കത്തിന്റെ അടിസ്ഥാനത്തില് നടത്തിയ അന്വേഷണത്തിലാണ് സെസി നല്കിയ എന്റോള്മെന്റ് നമ്പര് വ്യാജമാണെന്ന് അസോസിയേഷന് കണ്ടെത്തിയത്.
ആലപ്പുഴയിലെ പ്രമുഖ അഭിഭാഷകന്റെ കീഴില് രണ്ട് വര്ഷം മുമ്പാണ് സെസി ഇന്റേണ്ഷിപ്പിനായി എത്തുന്നത്. പഠനം പൂര്ത്തീകരിച്ചെന്ന് അറിയിച്ച സെസി ഇദ്ദേഹത്തിന്റെ കീഴില് തന്നെ ജൂനിയര് ആയി പ്രാക്ടീസ് ആരംഭിക്കുകയും ചെയ്തിരുന്നു. ഇതിനിടയില് ഇവര് ബാര് അസോസിയേഷനിലേക്ക് മത്സരിക്കുകയും അസോസിയേഷന്റെ ലൈബ്രേറിയനായി തിരഞ്ഞെടുക്കപ്പെടുകയും ചെയ്തു. നിരവധി കേസുകളില് കമ്മീഷന് അംഗമായി പങ്കെടുക്കുകയും ചെയ്തു. ഇതിനിടയിലാണ് അജ്ഞാത കത്ത് അസോസിയേഷന് ലഭിച്ചത്.
തിരവനന്തപുരം സ്വദേശിനിയായ മറ്റൊരു അഭിഭാഷകയുടെ എന്റോള്മെന്റ് നമ്പറാണ് ഇവര് ഉപയോഗിച്ചിരുന്നത്. ആള്മാറാട്ടം, വഞ്ചന തുടങ്ങിയ വകുപ്പുകള് ചുമത്തിയാണ് പൊലീസ് കേസെടുത്തത്. സെസി ഒളിവിലാണെന്നാണ് പോലീസ് ഭാഷ്യം.
ഇതിനിടെ ആലപ്പുഴ ഫസ്റ്റ് ക്ലാസ് മജിസ്ട്രേറ്റ് കോടതിയില് കീഴടങ്ങാനെത്തിയ സെസി ജാമ്യമില്ലാ വകുപ്പുകള് ചുമത്തിയതറിഞ്ഞ് നാടകീയമായി മുങ്ങിയിരുന്നു. രക്ഷപ്പെടാന് അഭിഭാഷകരടക്കമുള്ളവരുടെ സഹായവും ലഭിച്ചു. ഇതിനു പിന്നാലെ ബാര് അസോസിയേഷന് യോഗം ചേര്ന്ന് വ്യാജ അഭിഭാഷകയുടെ കേസില് അഭിഭാഷകര് ഹാജരാകരുതെന്ന് തീരുമാനിച്ചു.
സെസി സേവ്യറുടെ വക്കാലത്ത് ആലപ്പുഴ ബാര് അസോസിയേഷനിലെ ആരും ഏറ്റെടുക്കരുതെന്ന് ജനറല് ബോഡി യോഗം കര്ശന നിര്ദേശം നല്കി. വക്കാലത്തെടുക്കുന്നവരെ അസോസിയേഷനില് നിന്ന് പുറത്താക്കാനാണ് തീരുമാനം.
https://www.facebook.com/Malayalivartha
