കെ എസ് ആർ ടി സി ബസിലെ സന്തോഷ് പണ്ഡിറ്റിന്റെ യാത്ര സോഷ്യൽ മീഡിയയിൽ കഴിഞ്ഞ ദിവസങ്ങളിൽ വൈറലായിരുന്നു. എന്നാൽ ആ യാത്രയ്ക്ക് എന്താണ് ഇത്ര പ്രത്യേകതയെന്ന് നിരവധി ആരാധകർ ചോദിച്ചിരുന്നു. ഒടുവിൽ അതിനുള്ള ഉത്തരം എത്തി... സന്തോഷിന്റെ ഈ നന്മയ്ക്ക് സോഷ്യൽ മീഡിയയിൽ നിറഞ്ഞ കയ്യടിയാണ് കിട്ടുന്നത്. കക്കൂസോ, കിടക്കാൻ നല്ലൊരു വീടുപോലും ഇല്ലാത്ത ഒരു കുടുംബത്തിന് സഹായമെത്തിക്കാനായിരുന്നു സന്തോഷ് പണ്ഡിറ്റിന്റെ ആ യാത്ര.

കോഴിക്കോട് നിന്ന് കെ എസ് ആർ ടി സി ബസിലാണ് തിരുവനന്തപുരം വെഞ്ഞാറമൂട്ടിലുള്ള കുടുംബത്തെ കാണാൻ സന്തോഷ് എത്തിയത്. സ്വന്തമായി മൂന്ന് സെന്റ് സ്ഥലമുണ്ടെങ്കിലും ഇതിൽ താമസിക്കാൻ സൗകര്യമുള്ള വീടില്ല. ഇടിഞ്ഞ് െപാളിഞ്ഞ് വീഴാറായ ഒരു കെട്ടിടമാണ് ഉള്ളത്. കുടുംബത്തിനുള്ള ആദ്യ സഹായമായി ഇവർക്ക് കക്കൂസ് വയ്ക്കാനുള്ള സൗകര്യമാണ് അദ്ദേഹം നൽകിയത്. ക്ലോസറ്റ്, കല്ലുകൾ, പൈപ്പ് എന്നിങ്ങനെ കക്കൂസ് നിർമിക്കാനുള്ള സാധനങ്ങൾ സന്തോഷ് എത്തിച്ചുനൽകി. വീട് എന്ന് സ്വപ്നം ബാക്കിയാണെങ്കിലും ഒപ്പമുണ്ടാകുമെന്ന് സന്തോഷ് പണ്ഡിറ്റ് പറഞ്ഞു.

നിരവധി സാമൂഹിക സേവന കാര്യങ്ങളിൽ സന്നദ്ധനാണ് താരം. ജനസേവന പ്രവർത്തനങ്ങൾ മുമ്പും സന്തോഷ് പണ്ഡിറ്റ് ചെയ്തിരുന്നു. അതെല്ലാം സോഷ്യൽ മീഡിയ ഏറ്റെടുത്ത് വൻ വിജയമാക്കിരുന്നു. അതിന് പിന്നാലെയായിരുന്നു മറ്റൊരു സാമൂഹിക സേവനവുമായി സന്തോഷ് പണ്ഡിറ്റ്എത്തിയത്.സന്നദ്ധ സേവനത്തിനായി യാത്രചെയ്യുന്ന സന്തോഷ് പണ്ഡിറ്റിന്റെ ചിത്രം ആ ബസിലെ കണ്ടക്‌ടർ തന്നെ പകർത്തി സോഷ്യൽ മീഡിയയിൽ പങ്കുവയ്ക്കുകയായിരുന്നു.

നിമിഷങ്ങൾക്കകം തന്നെ ഈ ചിത്രം വൈറലായി. ആലപ്പുഴ സ്വദേശിയായ ഷെഫീഖ് ആയിരുന്നു ഈ ബസ്സിലെ കണ്ടക്ടർ. ആലപ്പുഴയിൽ വർഷങ്ങൾക്ക് മുമ്പ് സന്തോഷ് പണ്ഡിറ്റ് ഒരു പരിപാടിക്ക് വന്നപ്പോൾ ഷഫീഖ് പരിചയപ്പെട്ടിരുന്നു. ടിക്കറ്റ് എടുക്കാൻ പണം നീട്ടിയപ്പോൾ ഷെഫീഖ് സന്തോഷിനെ തിരിച്ചറിഞ്ഞു. ആലപ്പുഴയിൽ എത്തുമ്പോൾ ചായ കുടിക്കാൻ സമയം കിട്ടുമോ എന്ന് സന്തോഷ്‌ ചോദിച്ചതോടെ ഷെഫിഖ് കൂടുതൽ അദ്ദേഹവുമായി സംസാരിച്ചു.

തുടർന്നാണ് ‘ചില വ്യക്തിത്വങ്ങള്‍ ഇപ്രകാരം ആണ്..ആരവങ്ങള്‍ ഇല്ലാതെ...നമ്മളുടെ സ്വന്തം ആനവണ്ടിയില്‍..ആരാണെന്ന് പറയാമോ...' എന്ന കുറിപ്പോടെ സന്തോഷ് പണ്ഡിറ്റിന്റെ ചിത്രം ഷഫീഖ് കെഎസ്ആർടിസി ആരാധകരുടെ വാട്സാപ്പ് ഗ്രൂപ്പിലും ഫെയ്സ്ബുക്കിലും എല്ലാം പങ്കുവെച്ചത്. സന്തോഷ് പണ്ഡിറ്റിന്റെ ഈ സാമൂഹ്യ സേവനങ്ങൾ ആരാധകർ ഏറ്റെടുക്കുമ്പോൾ ഒരുകാലത്ത് ട്രോളുകയും വിമർശിക്കുകയും, തെറിവിളിക്കുകയും ചെയ്തവർ വരെ കയ്യടിച്ചുപോവുകയാണ്. സ്വന്തം ബുദ്ധി കൊണ്ടും കഴിവ് കൊണ്ടും നല്ല മനസ്സുകൊണ്ടും കേരളത്തിലെ പൊതു ജനത്തിന്റെ സ്നേഹം പിടിച്ചു പറ്റിയവൻ.... സൂപ്പർ സ്റ്റാർ എന്ന വിളിക്ക് അർഹൻ' എന്നൊക്കെയാണ് താരത്തിന്റെ കമന്റ് ബോക്സുകളിൽ നിറയുന്നത്.