ലോകരക്ഷയ്ക്കായി അവന് വന്നു... സോഷ്യല് മീഡിയയില് തരംഗമായി ഫാദര് ജെയിംസ് പനവേല്; നമ്മള് ക്രിസ്ത്യാനികള് ഇങ്ങനെയായിരുന്നില്ല എന്ന് പറഞ്ഞ് തുടങ്ങുന്ന അച്ചനെ ഏറ്റെടുത്ത് ജാതിമതഭേദമന്യേയുള്ള സമൂഹം; ഫാദറിന്റെ പ്രസംഗം എല്ലാ മതക്കാര്ക്കുമുള്ളത്
നാദിര്ഷ ജയസൂര്യ ടീമിന്റെ 'ഈശോ' സിനിമയുമായി ബന്ധപ്പെട്ട വിവാദം ഏതാണ്ട് മങ്ങിയ മട്ടായിരുന്നു. ആ സമയത്താണ് ഒരു ഫാദറിന്റെ പ്രസംഗം കഴിഞ്ഞ ദിവസം മുതല് സോഷ്യല് മീഡിയയില് വൈറലായത്. ജാതിമതഭേദമന്യേ പലരും ഫേസ്ബുക്കില് ഷെയര് ചെയ്തതോടെ അച്ചനെപ്പറ്റി തിരക്കി. ആ പ്രസംഗം ഒന്ന് കേട്ടാല് ആരും വീണുപോകും. അത്രയ്ക്ക് ഉള്ളില് തട്ടുന്നതാണ് വാക്കുകള്.
'ഈശോ' സിനിമയ്ക്കെതിരെ ഏതാനും ക്രിസ്തൃന് സംഘടനകളും വിശ്വാസികളും രംഗത്തെത്തിയിരുന്നു. ഇശോ എന്ന് പേരില് ചിത്രമിറക്കിയാല് മതവികാരം വ്രണപ്പെടുമെന്നായിരുന്നു ആരോപണം. ഇതുമായി ബന്ധപ്പെട്ട് ഒരു ഫാദര് നടത്തിയ പ്രസംഗമാണ് സമൂഹമാധ്യമങ്ങളിലിപ്പോള് വൈറലാകുന്നത്. വിവാദങ്ങള് അനാവശ്യമായിരുന്നുവെന്ന് ഫാദര് ജെയിംസ് പനവേല് പള്ളി പെരുന്നാളിനോട് അനുബന്ധിച്ച് നടന്ന പ്രസംഗത്തിനിടെ അഭിപ്രായപ്പെടുന്നു. സംവിധായകന് ജിയോ ബേബിയാണ് പ്രസംഗത്തിന്റെ വീഡിയോ സമൂഹമാധ്യമങ്ങളില് പങ്കുവച്ചത്. അങ്കമാലി രൂപതയുടെ മുഖപത്രമായ 'സത്യദീപ'ത്തിന്റെ ഇംഗ്ലീഷ് എഡിഷന്റെ അസോസിയേറ്റ് എഡിറ്ററാണ് ഫാ. ജെയിംസ് പനവേലില്.
ഫാദര് ജെയിംസ് പനവേലിന്റെ പ്രസംഗം ഇങ്ങനെയാണ്...
സ്വാതന്ത്ര്യം ലഭിച്ച് 75 വര്ഷം പിന്നിടുമ്പോള് നമുക്ക് സൗകര്യങ്ങളും നേട്ടങ്ങളുമുണ്ട്. പക്ഷെ നമ്മുടെ കൂടെ ജീവിക്കുന്ന മനുഷ്യനെ അവന്റെ നിറം നോക്കി, മതം നോക്കി, ജാതി നോക്കി, കുടുംബമഹിമ നോക്കി വകഞ്ഞു മാറ്റുന്ന മനോഭാവം ഉണ്ടെങ്കില് ക്രിസ്തു ഇല്ല, ജീവിതത്തില് സത്യമില്ല. രണ്ടാഴ്ച്ച മുമ്പാണ് നാദിര്ഷയുടെ ഇറങ്ങാനിരിക്കുന്ന സിനിമക്ക് ഈശോ എന്ന പേരു വീണത്. ഉടന് തന്നെ വാളും വടിയുമായി കത്തിക്കാന് ഇറങ്ങിത്തിരിച്ച ഒരു ക്രൈസ്തവ സമൂഹം ഇവിടെയുണ്ട്.
ഇതിനു മുമ്പും സിനിമകള്ക്ക് പേര് വന്നിട്ടുണ്ട്, ഈ.മ.യൗ, ആമേന്, ഹല്ലേലൂയ്യ എന്നിങ്ങനെ എന്തെല്ലാം സിനിമകള് ഉണ്ടായിട്ടുണ്ട്. അന്നൊക്കെ സംയമനം പാലിച്ച ക്രിസ്ത്യാനി ഇന്ന് വാളെടുത്തിറങ്ങിയിരിക്കുകയാണ്. അങ്ങനെ സമൂഹമാധ്യമങ്ങളില് നമുക്ക് ക്രിസംഘി എന്ന പേര് വീണു. അത് നമ്മുടെ സ്വഭാവം കൊണ്ട് നമുക്ക് കിട്ടിയ പേരാണ്. പണ്ടൊന്നും നമ്മള് ഇങ്ങനെയായിരുന്നില്ല. മറ്റുള്ളവരേക്കാളും തീവ്രമായ വര്ഗീയത എങ്ങനെയാണ് നമ്മളിലേക്ക് വന്നത്.
ഈശോ എന്ന പേരില് ഒരു സിനിമ ഇറക്കിയാല് പഴുത്ത് പൊട്ടാറായി നില്ക്കുന്ന വ്രണമാണോ നിങ്ങളുടെ മതവികാരം? ഇതിനപ്പുറമാണ് ക്രിസ്തു എന്ന് മനസിലാക്കുന്ന ഒരു വിശ്വാസിക്ക് ഇതൊന്നും ഒന്നുമല്ല. ക്രിസ്തുവിനെ ശരിയായി ഉള്ക്കൊള്ളാന് കഴിയാതെ വരുമ്പോഴാണ് കൊത്തി കീറാനും മാന്തി കീറാനും തീ കത്തിക്കാനും ഇറങ്ങുന്ന വര്ഗീയവാദി ക്രിസ്ത്യാനികളാകുന്നത്. ഇത് സമുദായവാദമാണ്, മതാത്മകതയാണ്. നമുക്ക് വേണ്ടത് സമുദായവാദമോ മതാത്മകതയോ അല്ല. നമുക്ക് വേണ്ടത് ആത്മീയതയാണ്. അത് മനുഷ്യനെ സ്നേഹിക്കലാണ്, ചുറ്റുമുള്ള മനുഷ്യനെ തിരിച്ചറിയലാണ്.'
ഈ ഫാദറിന്റെ പ്രസംഗം കേട്ട് അറിയാതെ കയ്യടിച്ച് പോകും. അങ്ങനെ അച്ചന് ഒറ്റ ദിവസം കൊണ്ട് സ്റ്റാറായി.
https://www.facebook.com/Malayalivartha
