തിരുവനന്തപുരം കൊല്ലം ജില്ലകളിലെ സ്‌കൂളുകള്‍ക്കും പ്രൊഫഷണല്‍ കോളജുകള്‍ ഉള്‍പ്പെടെ എല്ലാ കോളജുകള്‍ക്കും ഇന്ന് അവധി.... കനത്ത മഴ പെയ്യുന്ന സാഹചര്യത്തിലാണ് തിരുവനന്തപുരത്തും കൊല്ലത്തും അവധി പ്രഖ്യാപിച്ചത്. നേരത്തെ നിശ്ചയിച്ച പരീക്ഷകള്‍ക്കും പൊതു പരീക്ഷകള്‍ക്കും മാറ്റമില്ല.

തിരുവനന്തപുരത്തും കൊല്ലത്തും കനത്തമഴ തുടരുന്നു. ഇന്നലെ ഉച്ചകഴിഞ്ഞ് തുടങ്ങിയ മഴ നിര്‍ത്താതെ പെയ്യുകയായിരുന്നു. തിരുവനന്തപുരത്ത് പലയിടങ്ങളിലും വെള്ളക്കെട്ടുണ്ടായി. വെള്ളറട കുരിശുമലയുടെ അടിഭാഗത്തെ മലവെള്ളപ്പാച്ചിലിനെത്തുടര്‍ന്നു 10 കുടുംബങ്ങളെ മാറ്റിപ്പാര്‍പ്പിച്ചു. വെള്ളം കയറി ആര്യനാട് ആയിരവല്ലി ക്ഷേത്രത്തിലെ ചുറ്റുമതില്‍ നശിച്ചു. നിലമേലില്‍ എം.സി റോഡില്‍ വെള്ളം കയറി.

അതേസമയം സ്‌കൂള്‍ സമയം വൈകുന്നേരം വരെയാക്കുന്നതില്‍ തീരുമാനം ഉടനുണ്ടായേക്കും. ഡിസംബര്‍ 15 മുതല്‍ ക്ലാസുകള്‍ വൈകിട്ടു വരെ നടത്താമെന്നായിരുന്നു വിദ്യാഭ്യാസ വകുപ്പിന്റെ നിര്‍ദ്ദേശം. എന്നാല്‍ കൊവിഡിന്റെ പുതിയ വക ഭേദം ഒമൈക്രോണ്‍ കണ്ടെത്തിയതോടെ രാജ്യത്ത് പ്രതിരോധ നടപടികള്‍ വീണ്ടും കടുപ്പിച്ചിട്ടുണ്ട്.

ഈ പശ്ചാലത്തില്‍, കേന്ദ്ര നിര്‍ദ്ദേശം കൂടി കണക്കിലെടുത്താകും അന്തിമ തീരുമാനം.സംസ്ഥാനത്ത് സ്‌കൂളുകളുടെ നിലവിലെ സമയക്രമം മാറ്റണമെങ്കില്‍ ദുരന്ത നിവാരണവകുപ്പിന്റെ കൂടി അനുമതി അനിവാര്യമാണ്. സ്‌കൂള്‍ സമയം ദീര്‍ഘിപ്പിക്കാനുള്ള ആലോചനയില്‍ ഉയര്‍ന്ന നിര്‍ദ്ദേശങ്ങള്‍ വിദ്യാഭ്യാസ വകുപ്പ് മുഖ്യമന്ത്രിക്ക് സമര്‍പ്പിച്ചിട്ടുണ്ട്.