കാവല്‍ സിനിമ തിയേറ്ററുകളില്‍ ഹിറ്റായി ഓടിക്കൊണ്ടിരിക്കുമ്പോള്‍ ചിലര്‍ വിദ്വേഷ പ്രചാരണവുമായി രംഗത്തെത്തിയിരുന്നു. സുരേഷ് ഗോപി ബിജെപി ആണെന്നും അദ്ദേഹത്തിന്റെ സിനിമ ബഹിഷ്‌കര്‍ക്കണമെന്നുമായിരുന്നു ഇവരുടെ ആവശ്യം. ആദ്യ ദിവസം നന്നായി ഓടിയ ചില പ്രദേശങ്ങളില്‍ ഇതിനെ തുടര്‍ന്ന് ആളില്ലാതെ വരികയും ചെയ്തു.ഇതേതുടര്‍ന്ന് സുരേഷ് ഗോപിയെ പിന്തുണച്ച്‌ നിരവധിപേര്‍ രംഗത്തെത്തി. ഇതില്‍ മാധ്യമപ്രവര്‍ത്തകന്‍ ഐപ്പ് വള്ളിക്കാടന്റെ കുറിപ്പ് ശ്രദ്ധേയമാകുകയാണ്.

അദ്ദേഹത്തിന്റെ പോസ്റ്റിലേക്ക്,

ആഴ്ചയില്‍ ഒരാളെങ്കിലും സുരേഷ് ഗോപി സാറിന്റെ നമ്പര്‍ തരാമോ എന്ന് ചോദിച്ച്‌ എന്നെ വിളിക്കുകയോ മെസേജ് അയക്കുകയോ ചെയ്യാറുണ്ട്. പല വാതിലിലും മുട്ടിയിട്ടും കാര്യങ്ങള്‍ സാധിക്കാതെ നിസ്സഹരായ സാധാരണക്കാരാണ് അവരില്‍ പലരും. സ്വന്തം ഭര്‍ത്താവിന്റെ ഉപദ്രവം സഹിക്കാതെ അദ്ദേഹത്തെക്കൊണ്ട് ഒന്ന് ഉപദേശിപ്പിക്കാമോ എന്ന് ചോദിച്ച്‌ വിളിച്ചവര്‍ പോലുമുണ്ട് ആ കൂട്ടത്തില്‍. അവര്‍ക്കക്കൊക്കെ ഇഷ്ടമാണ് സുരേഷ് ഗോപിയെ, വിശ്വാസമാണ് അദ്ദേഹത്തെ.

ഞാനദ്ദേഹത്തോടൊപ്പം യാത്ര ചെയ്തിട്ടുണ്ട്, വീട്ടില്‍ പോയിട്ടുണ്ട്. കഴിഞ്ഞ തിരഞ്ഞെടുപ്പ് കാലത്ത് ഇന്റര്‍വ്യൂ തരാതെ മടക്കിയിട്ടുണ്ട്. നമ്മുടെ വാര്‍ത്തകള്‍ കണ്ട് അഞ്ജനയെ അടക്കം നേരില്‍ പോയി കണ്ടിട്ടുണ്ട്, കുറെ ആള്‍ക്കാരെ വിളിച്ചിട്ടുണ്ട്. പലര്‍ക്കും സഹായം നല്‍കിയിട്ടുണ്ട്.
അദ്ദേഹത്തിന്റെ രാഷ്ട്രീയത്തോട് എതിര്‍പ്പുണ്ടാകാം,എനിക്കും നിങ്ങള്‍ക്കും പക്ഷേ വ്യക്തി എന്ന നിലയിലും സിനിമാനടന്‍ എന്ന നിലയിലും കിട്ടുന്നതില്‍ നിന്നും പങ്കുവെക്കുന്ന ആ മനുഷ്യന്റെ നന്‍മയെ അഭിനന്ദിക്കാതിരിക്കാന്‍ കഴിയില്ല.

കുറുപ്പെന്ന സിനിമ കുടുംബസമേതം കണ്ടേച്ച്‌ ഒരാഴ്ച പിന്നിട്ടപ്പോഴാണ് മക്കളോടൊപ്പം കാവല്‍ സിനിമ ഇന്നലെ കണ്ടത്. പക്ഷേ ആ സിനിമയിലുടനീളം സുരേഷ് ഗോപിയെന്ന യഥാര്‍ത്ഥ മനുഷ്യനെത്തന്നെയാണ് കണ്ടത്.എന്തിന് റോച്ചമ്മക്കും കൊച്ചൈപ്പിനും കാവല്‍ സിനിമ ഇഷ്ടപ്പെട്ടു.കഴിഞ്ഞ സിനിമയുടെ കേട് തീര്‍ത്തുവെന്നനും പറയാം..

കാവല്‍ സിനിമയെക്കുറിച്ച്‌ ഒരാളോട് അന്വേഷിച്ചപ്പോള്‍ ഇതൊരു ബിജെപി അനുഭാവ സിനിമയാണെന്നാണ് പറഞ്ഞത്. ഇന്ന് രാവിലെ തന്നെ അതിയാനെ വിളിച്ച്‌ ആ കേടും തീര്‍ത്തു. കാവല്‍ നല്ല സിനിമയാണ്, സുരേഷ് ഗോപിയെ പോലെ കുറച്ചുപേര്‍ ഈ സമൂഹത്തില്‍ ഉണ്ടാകേണ്ട നന്‍മയെക്കുറിച്ച്‌ സംസാരിക്കുന്ന സിനിമ. അതിശയോക്തിയില്ലാത്ത തല്ലും ഇടിയുമൊക്കെയുണ്ട്,ചിത്രേച്ചിയുടെയും മധു ബാലകൃഷ്ണന്റെയും ഉഗ്രന്‍ പാട്ടുകളും.

പ്രിയ സുരേഷ് ഗോപി ചേട്ടാ നിങ്ങളൊരു കാവല്‍ക്കാരന്‍ തന്നെയാണ് അത് നിങ്ങളുടെ നിഷ്കളങ്കമായ വാക്കുകളിലൂടെ പ്രവര്‍ത്തനങ്ങളിലൂടെ ജീവിതത്തിലൂടെ സിനിമയിലൂടെ തെളിയിച്ചുകൊണ്ടേയിരിക്കുന്നു. ഒരു പിടിച്ചോറ് വായില്‍ വെച്ച്‌ നല്‍കുന്ന രംഗമുണ്ട് സിനിമയില്‍. സത്യത്തില്‍ ഞാനുമത് കഴിച്ചു അത്രമേല്‍ ഹൃദ്യമായിരുന്നു ആ രംഗം.ഈ കെട്ടകാലത്തില്‍ പരസ്യങ്ങള്‍ക്കപ്പുറം രഹസ്യമായി സുരേഷ് ഗോപിയെന്ന മനുഷ്യന്‍ ചെയ്ത കുറെ നല്ല കാര്യങ്ങള്‍ക്ക് സാക്ഷിയായ വ്യക്തി എന്ന നിലയില്‍

I really respect you Sir….
#SureshGopi #sureshgopifans #sureshgopiofficial #iypevallikadan #kaval #Kavalmovie #SG