പലരും പല തരത്തില്‍ സേവനമനുഷ്ഠിച്ചിട്ട് വിരമിച്ചെങ്കിലും ഇങ്ങനെയൊരു യാത്രയയപ്പ് ലഭിച്ചിട്ടില്ല. പ്രധാനമന്ത്രിയുടേയും രാഷ്ട്രപതിയുടേയും സ്‌നേഹാശംസകളോടെ യാത്രയയപ്പ് കിട്ടുന്നത് വിരാട് എന്ന കുതിരയ്ക്ക് മാത്രമാണ്. രാഷ്ട്രപതിയുടെ അംഗരക്ഷക സംഘത്തിലെ വിശ്വസ്തനായ വിരാട് എന്ന കുതിര സേവനത്തില്‍നിന്ന് വിരമിച്ചു. 19 വര്‍ഷത്തെ സേവനത്തിന് ശേഷമാണ് വിരാട് എന്ന കറുത്ത കുതിര മടങ്ങിയത്.

73ാം റിപ്പബ്ലിക് ദിനാഘോഷങ്ങള്‍ക്ക് ശേഷമായിരുന്നു വിരാടിന്റെ വിടവാങ്ങല്‍. പരേഡ് അവസാനിച്ചതിന് പിന്നാലെ പ്രസിഡന്റ് രാംനാഥ് കോവിന്ദ്, പ്രധാനമന്ത്രി നരേന്ദ്ര മോദി, പ്രതിരോധ മന്ത്രി രാജ്‌നാഥ് സിങ് എന്നിവര്‍ തലയില്‍ തലോടിയാണ് വിരാടിനെ യാത്രയാക്കിയത്.

ഹനോവേറിയന്‍ ഇനത്തിലുള്ള വിരാടിനെ 2003ലാണ് രാഷ്ട്രപതിയുടെ അംഗരക്ഷക സംഘത്തില്‍ ഉള്‍പ്പെടുത്തിയത്. ഇത്തവണത്തേത് ഉള്‍പ്പെടെ പതിമൂന്ന് റിപ്പബ്ലിക് ദിന പരേഡുകളുടെ ഭാഗമായ വിശ്വസ്തനായ കുതിരയായിരുന്നു വിരാട്. പ്രായമായതിനാലാണ് വിരാടിന് വിരമിക്കല്‍ പ്രഖ്യാപിച്ചത്.

അസാധാരണമായ സേവനത്തിനും കഴിവുകള്‍ക്കും രാജ്യത്തിന്റെ ആദരം ലഭിക്കുന്ന ആദ്യത്തെ കുതിരയാണ് വിരാട്. കരസേനാ ദിനത്തിന്റെ ഭാഗമായി ജനുവരി 15ന് വിരാടിന് ചീഫ് ഓഫ് ആര്‍മി സ്റ്റാഫ് കമന്‍ഡേഷന്‍ ബഹുമതി നല്‍കി രാജ്യം ആദരിച്ചിരുന്നു.

ഇന്നലത്തെ നരേന്ദ്രമോദിയുടെ വേഷം ഏറെ ശ്രദ്ധിക്കപ്പെട്ടു. റിപ്പബ്ലിക് ദിനാഘോഷ പരിപാടിക്കായി പ്രധാനമന്ത്രി നരേന്ദ്ര മോദി എത്തിയത് ഉത്തരാഖണ്ഡുകാരുടെ പരമ്പരാഗത തൊപ്പിയും മണിപ്പൂരി ഷാളും ധരിച്ചാണ്. 'ഉത്തരാഖണ്ഡിന്റെ സംസ്ഥാന പുഷ്മായ ബ്രഹ്മകമലം കൊണ്ട് തൊപ്പി അലങ്കരിച്ചിരിക്കുന്നു'വെന്ന് മുഖ്യമന്ത്രി പുഷ്‌കര്‍ സിങ് ധാമി ട്വീറ്റ് ചെയ്തു.

ഉത്തരാഖണ്ഡിലെ 1.25 കോടി ജനങ്ങള്‍ക്ക് വേണ്ടി താന്‍ പ്രധാനമന്ത്രിക്ക് നന്ദി പറയുന്നുവെന്നും അദ്ദേഹം കൂട്ടിച്ചേര്‍ത്തു. കേദാര്‍നാഥില്‍ പ്രാര്‍ഥിക്കുമ്പോഴെല്ലാം പ്രധാനമന്ത്രി മോദി ബ്രഹ്മകമലം പുഷ്പം ഉപയോഗിക്കാറുണ്ടെന്ന് ഉദ്യോഗസ്ഥര്‍ പറഞ്ഞു.

പരമ്പരാഗത മണിപ്പൂരി ഷാള്‍ പ്രധാനമന്ത്രി പലപ്പോഴായി ധരിക്കാറുള്ളതാണ്. കൈകൊണ്ട് നെയ്ത സ്‌കാര്‍ഫ് മണിപ്പൂരിലെ മെതേയ് ഗോത്രത്തിന്റെ പാരമ്പര്യത്തില്‍പ്പെട്ടതാണ്. ഉത്തരഖാണ്ഡും മണിപ്പൂരും അടുത്ത മാസം തിരഞ്ഞെടുപ്പ് നടക്കുന്ന സംസ്ഥാനങ്ങളാണ് എന്നതാണ് പ്രധാനമന്ത്രിയുടെ വേഷത്തിലെ രാഷ്ട്രീയം എന്നാണ് ആരോപണം.

ഉത്തരാഖണ്ഡില്‍ ഫെബ്രുവരി 17നും മണിപ്പൂരില്‍ ഫെബ്രുവരി 27നും മാര്‍ച്ച് മൂന്നിലുമായിട്ടാണ് തിരഞ്ഞെടുപ്പ്. കഴിഞ്ഞ വര്‍ഷത്തെ റിപ്പബ്ലിക് ദിനാഘോഷത്തില്‍ പ്രധാനമന്ത്രി മോദി ഗുജറാത്തിലെ ജാംനഗര്‍ രാജകുടുംബം സമ്മാനിച്ച സിന്ദൂര തലപ്പാവ് ധരിച്ചിരുന്നു.

അതേസമയം 73ാമത് റിപബ്ലിക് ദിനം രാജ്യം വര്‍ണാഭമായി ആഘോഷിച്ചു. ദേശീയ യുദ്ധസ്മാരകത്തില്‍ പ്രധാനമന്ത്രി ആദരം അര്‍പ്പിച്ചതോടെ ആഘോഷങ്ങള്‍ക്ക് ഔദ്യോഗികമായി തുടക്കമായി. സന്ദര്‍ശകരെ ചുരുക്കി, കര്‍ശന കോവിഡ് മാനദണ്ഡങ്ങള്‍ പാലിച്ച് ബുധനാഴ്ച രാവിലെ പത്തരയോടെ റിപബ്ലിക് ദിന പരേഡ് രാജ്പഥില്‍ ആരംഭിച്ചു. സൈനിക ശക്തി വിളിച്ചോതുന്ന പരേഡില്‍ രാഷ്ടപതി സല്യൂട്ട് സ്വീകരിച്ചു.

25 നിശ്ചല ദൃശ്യങ്ങള്‍ ഇത്തവണ പരേഡിലുണ്ടായി. ഇതുകൂടാതെ ഇന്ത്യന്‍ വ്യോമസേനയുടെ 75 വിമാനങ്ങളുടെ ഗ്രാന്‍ഡ് ഫ്‌ലൈ പാസ്റ്റ്, മത്സര പ്രക്രിയയിലൂടെ തിരഞ്ഞെടുത്ത 480 നര്‍ത്തകരുടെ പ്രകടനങ്ങള്‍ എന്നിവ പരേഡിലെ പ്രധാന ആകര്‍ഷണങ്ങളായി. കാണികളുടെ സൗകര്യം കൂടി കണക്കിലെടുത്ത് ആദ്യമായി പത്ത് വലിയ എല്‍ഇഡി സ്‌ക്രീനുകളും ഇവിടെ സ്ഥാപിച്ചിരുന്നു.