ആലപ്പുഴയില് ഇന്ന് ഹര്ത്താല്.... ചാരുംമൂട്ടില് സിപിഐ-കോണ്ഗ്രസ് സംഘര്ഷത്തിന് പിന്നാലെ സ്ഥലത്തെ കോണ്ഗ്രസ് ഓഫീസ് സിപിഐ പ്രവര്ത്തകര് അടിച്ചുതകര്ത്തതില് പ്രതിഷേധിച്ച് പ്രദേശത്തെ അഞ്ചു പഞ്ചായത്തുകളില് ഇന്ന് കോണ്ഗ്രസ് ഹര്ത്താല് പ്രഖ്യാപിച്ചു
ചാരുംമൂട്ടില് സിപിഐ-കോണ്ഗ്രസ് സംഘര്ഷം. സംഘര്ഷത്തിന് പിന്നാലെ സ്ഥലത്തെ കോണ്ഗ്രസ് ഓഫീസ് സിപിഐ പ്രവര്ത്തകര് അടിച്ചുതകര്ത്തു. കൊടിമരത്തെ ചൊല്ലിയാണ് ഇരു പാര്ട്ടി പ്രവര്ത്തകരും തമ്മില് സംഘര്ഷമുണ്ടായത്. രണ്ട് പോലീസുകാര്ക്കടക്കം 25 പേര്ക്ക് പരിക്കേറ്റതായാണ് വിവരം.
സിപിഐ സ്ഥാപിച്ച കൊടിമരം നേരത്തെ കോണ്ഗ്രസ് നേതാക്കളുടെ പരാതിയെ തുടര്ന്ന് പിഴുതുമാറ്റിയിരുന്നു. എന്നാല് പിന്നീട് സിപിഐ പ്രവര്ത്തകര് ചേര്ന്ന് കോണ്ഗ്രസ് ഓഫീസിന് മുമ്പില് വീണ്ടും കൊടി നാട്ടി. ഇതിനെതിരെ കോണ്ഗ്രസ് നേതാക്കള് റവന്യൂ അധികൃതരെ സമീപിച്ചു.
ഉദ്യോഗസ്ഥര് എത്താന് വൈകിയതോടെ ഇരു പാര്ട്ടികളും തമ്മില് വാക്കേറ്റമുണ്ടായി.തുടര്ന്ന് ആര്ഡിഒയും വില്ലേജ് ഓഫീസറും സ്ഥലത്തെത്തി കൊടിമരം മാറ്റാന് സിപിഐയോട് ആവശ്യപ്പെട്ടെങ്കിലും മാറ്റില്ലെന്ന നിലപാടില് പ്രവര്ത്തകര് ഉറച്ചുനിന്നു.
പിന്നാലെ കോണ്ഗ്രസ് പ്രവര്ത്തകര് കൊടി മാറ്റാന് ശ്രമിച്ചു. തുടര്ന്നാണ് ഇരു പാര്ട്ടിക്കാരും തമ്മില് വടിയും മറ്റും ഉപയോഗിച്ച് ഏറ്റുമുട്ടിയത്.രൂക്ഷമായ കല്ലേറും ഉണ്ടായി. ഇരുവിഭാഗത്തെയും പിരിച്ചുവിടാന് വന്ന പോലീസിന് നേരേയും കല്ലേറുണ്ടായി.
സംഘര്ഷത്തിന് പിന്നാലെ ചാരുംമൂട്ടിലെ കോണ്ഗ്രസ് ഓഫീസ് സിപിഐ പ്രവര്ത്തകര് അടിച്ചുതകര്ത്തെന്ന് കോണ്ഗ്രസ് ആരോപിക്കുന്നു. ഓഫീസ് അടിച്ചു തകര്ത്തതില് പ്രതിഷേധിച്ച് പ്രദേശത്തെ അഞ്ചു പഞ്ചായത്തുകളില് ഇന്ന് കോണ്ഗ്രസ് ഹര്ത്താല് പ്രഖ്യാപിച്ചു.നൂറനാട്, പാറമേല്, ചുനക്കര, താമരക്കുളം, തഴക്കര പഞ്ചായത്തുകളിലാണ് ഇന്ന് ഹര്ത്താല്.രാവിലെ ആറ് മുതല് വൈകീട്ട് ആറ് മണി വരെയാണ് ഹര്ത്താല്.
https://www.facebook.com/Malayalivartha
