സി.പി.എം ആസ്ഥാനമായ എ.കെ.ജി സെന്ററിനു നേരേ വ്യാഴാഴ്ച രാത്രി സ്‌ഫോടകവസ്തു എറിഞ്ഞയാളെ എത്രയും വേഗം പിടികൂടാനുള്ള ശ്രമത്തിലാണ് പോലീസ്. എത്രയും വേഗം പ്രതിയെ പിടിച്ചില്ലെങ്കില്‍ പ്രതിപക്ഷ ആക്ഷേപം കൂടും. ഇത് പാര്‍ട്ടിയേയും സര്‍ക്കാരിനേയും പ്രതിരോധത്തിലാക്കും. അതിനാല്‍ തന്നെ ശക്തമായ അന്വേഷണമാണ് നടക്കുന്നത്.

നിര്‍ണായകമായ വിവരങ്ങളാണ് പോലീസിന് ലഭിച്ചത്. ബോംബെറിഞ്ഞയാളുടെ ഹോണ്ട ഡിയോ സ്‌കൂട്ടറും അതിന്റെ നമ്പരും പൊലീസ് തിരിച്ചറിഞ്ഞു. സ്‌ഫോടകവസ്തു എറിഞ്ഞശേഷം യുവാവ് കുന്നുകുഴി, പൊട്ടക്കുഴി വഴി മെഡിക്കല്‍കോളേജ് വരെ എത്തിയതിന്റെ സി.സി.ടി.വി ദൃശ്യങ്ങള്‍ ഫോറന്‍സിക് ലാബില്‍ പരിശോധിച്ചാണ് നമ്പര്‍ ഉറപ്പിച്ചത്.

പ്രതിയെക്കുറിച്ച് വ്യക്തമായ സൂചന ലഭിച്ചതായി എ.ഡി.ജി.പി വിജയ് സാക്കറെ പറഞ്ഞു. ഡെപ്യൂട്ടി കമ്മിഷണര്‍ ജെ.കെ.ദിനിലിന്റെ നേതൃത്വത്തില്‍ 14അംഗ സംഘത്തെ അന്വേഷണത്തിന് നിയോഗിച്ചു. പ്രതിയെ ഉടന്‍ അറസ്റ്റ് ചെയ്യുമെന്ന് സംഘം അറിയിച്ചു. കുന്നുകുഴി ഭാഗത്തുനിന്ന് സ്‌കൂട്ടറിലെത്തിയ യുവാവാണ് എ.കെ.ജി സെന്ററിനോട് ചേര്‍ന്ന എ.കെ.ജി ഹാളിന്റെ ചുറ്റുമതിലിലേക്ക് സ്‌ഫോടകവസ്തു എറിഞ്ഞത്.

ഐ.പി.സി 436 (സ്‌ഫോടകവസ്തു ഉപയോഗിച്ച് ജീവനും സ്വത്തിനും നാശമുണ്ടാക്കല്‍), സ്‌ഫോടക വസ്തു നിരോധന നിയമം 3 (എ) എന്നിവ ചുമത്തി എഫ്.ഐ.ആര്‍ രജിസ്റ്റര്‍ ചെയ്തു. പത്തുവര്‍ഷം വീതം ശിക്ഷിക്കാവുന്ന വകുപ്പുകളാണിവ. സ്‌ഫോടകവസ്തു തിരിച്ചറിയാന്‍ ഫോറന്‍സിക് ലാബില്‍ പരിശോധന നടക്കുകയാണ്.

പ്രദേശത്തെ ടവര്‍ പരിധിയിലുണ്ടായിരുന്ന ഫോണുകള്‍ കണ്ടെത്താന്‍ സൈബര്‍ സെല്‍ പരിശോധനയും നടത്തുന്നുണ്ട്. ജീവനക്കാരടക്കം ഓഫീസിലുണ്ടായിരുന്നപ്പോള്‍ വാഹനങ്ങള്‍ പ്രവേശിക്കുന്ന ഗേറ്റിലൂടെ ഓഫീസ് വളപ്പിലേക്ക് സ്‌ഫോടകവസ്തു വലിച്ചെറിഞ്ഞ് സ്‌ഫോടനം നടത്തിയെന്നാണ് കന്റോണ്‍മെന്റ് പൊലീസിന്റെ എഫ്.ഐ.ആറിലുള്ളത്.

പ്രതിയെ കണ്ടെത്താന്‍ പ്രദേശത്തെ വീടുകളിലെയും സ്ഥാപനങ്ങളിലെയും സി.സി.ടി.വി ദൃശ്യങ്ങള്‍ പൊലീസ് 15സംഘങ്ങളായി തിരിഞ്ഞ് പരിശോധിച്ചു. സ്‌കൂട്ടര്‍ ഗേറ്റിനടുത്ത് നിറുത്തി സ്‌ഫോടകവസ്തു എറിയുന്ന ദൃശ്യം എ.കെ.ജി സെന്ററിലെ സി.സി.ടി.വി കാമറയില്‍ നിന്ന് കിട്ടിയെങ്കിലും അതില്‍ പ്രതിയുടെ മുഖമോ സ്‌കൂട്ടറിന്റെ നമ്പറോ വ്യക്തമായിരുന്നില്ല. എ.കെ.ജി സെന്ററിന്റെ കവാടത്തില്‍ ആറംഗ പൊലീസ് സംഘം കാവലുണ്ടായിരുന്നപ്പോഴാണ് മറ്റൊരു ഗേറ്റിലൂടെ സ്‌ഫോടകവസ്തു എറിഞ്ഞത്.

സംഭവത്തിനു പിന്നില്‍ രാഷ്ട്രീയമുണ്ടോയെന്ന് ഇപ്പോള്‍ പറയാനാവില്ലെന്ന് എ.ഡി.ജി.പി വിജയ് സാക്കറെ പറഞ്ഞു. ചില സൂചനകളുണ്ട്. ഒരാളാണ് പ്രതിയെന്നാണ് സൂചന. മറ്റ് കാര്യങ്ങള്‍ അന്വേഷണത്തില്‍ കണ്ടെത്തുമെന്നും പറഞ്ഞു.

അതേസമയം സിപിഎം സംസ്ഥാന കമ്മിറ്റി ഓഫിസായ എകെജി സെന്ററിനു നേരെ സ്‌ഫോടക വസ്തു എറിഞ്ഞ സംഭവത്തില്‍ ഉത്തരം കിട്ടാത്ത നിരവധി ചോദ്യങ്ങളാണ് ഉയരുന്നത്.

സ്‌ഫോടകവസ്തു എറിഞ്ഞ പ്രതി എത്തിയത് സ്‌കൂട്ടറില്‍. വെള്ള ഷര്‍ട്ട് ധരിച്ചിരുന്നു. ഹെല്‍മറ്റ് ഇല്ല, മാസ്‌ക് ധരിച്ചിരുന്നു. സിസിടിവിയുടെ വ്യക്തതയില്ലായ്മ കാരണവും സ്ഥലത്തു വെളിച്ചമില്ലാതിരുന്നതിനാലും പ്രതിയെ തിരിച്ചറിയാന്‍ കഴിഞ്ഞില്ല.

സ്‌ഫോടകവസ്തു വന്നു പതിച്ച ഗേറ്റിന്റെ തൂണില്‍ ചെറിയ മെറ്റല്‍ കഷ്ണങ്ങളാണു പാകിയിട്ടുള്ളത്. ഇതില്‍ മൂന്നു മെറ്റല്‍ കഷണങ്ങള്‍ ഇളകി വീണു. ഇതിനാല്‍ സ്‌ഫോടക ശേഷി വളരെ കുറഞ്ഞ വസ്തുവാണെന്നു ഫൊറന്‍സിക് വിദഗ്ധരുടെ നിഗമനം. സാധാരണ പടക്കത്തില്‍ ഉപയോഗിക്കുന്ന അലുമിനിയം പൗഡര്‍, പൊട്ടാസ്യം ക്ലോറൈറ്റ് എന്നിവയുടെ അംശം കണ്ടെത്തി. പൊട്ടാസ്യം ക്ലോറൈറ്റ് ശക്തിയായി പതിച്ചാല്‍ സ്‌ഫോടനം നടക്കും.