പരിശീലനം പൂര്‍ത്തിയാക്കിയ 99 ഡ്രൈവര്‍ പൊലീസ് കോണ്‍സ്റ്റബിള്‍മാരുടെ പാസിംഗ് ഔട്ട് പരേഡ് തിരുവനന്തപുരത്ത് നടന്നു. പേരൂര്‍ക്കട എസ്.എ.പി ഗ്രൗണ്ടില്‍ നടന്ന പരേഡില്‍ മുഖ്യമന്ത്രി പിണറായി വിജയന്‍ അഭിവാദ്യം സ്വീകരിച്ചു. രാജ്യത്തെ ഏറ്റവും ശ്രദ്ധിക്കുന്ന സേനയായി കേരള പൊലീസ് മാറിയെന്ന് മുഖ്യമന്ത്രി പറഞ്ഞു.


'പഴയകാലത്തില്‍ നിന്ന് വ്യത്യസ്തമായ നിലയിലേക്ക് പൊലീസ് ഉയര്‍ന്നു. ബ്രിട്ടീഷ് കാലത്തുണ്ടായിരുന്ന മോശം പ്രതിച്ഛായ മാറി. പൊലീസിന് പുതിയ മുഖം നല്‍കിയത് 1957 ലെ ഇം.എം.എസ് സര്‍ക്കാരാണ്.

രാജ്യം ശ്രദ്ധിക്കുന്ന സേനയായി കേരള പൊലീസ് മാറി. പൊലീസില്‍ ചേരുന്നവരില്‍ പ്രൊഫഷണലുകളും ഉണ്ടെന്നതാണ് പ്രത്യേകത. സേനയുടെ പ്രവര്‍ത്തന രീതിയിലും മാറ്റം വന്നു'- മുഖ്യമന്ത്രി പറഞ്ഞു.

അതേസമയം, എ.കെ.ജി സെന്ററിന് നേരെയുണ്ടായ ബോംബാക്രമണത്തിലെ പ്രതികളെ ഇത് വരെ പിടികൂടാന്‍ പൊലീസിന് സാധിച്ചിട്ടില്ല. സംഭവവുമായി ബന്ധപ്പെട്ട് സേനയ്ക്കെതിരെയും മുഖ്യമന്ത്രിക്കെതിരെയും രൂക്ഷ വിമര്‍ശനവുമായി പ്രതിപക്ഷ നേതാക്കള്‍ എത്തുകയാണ്.

സ്വന്തം പാര്‍ട്ടിയുടെ ഓഫീസ് സംരക്ഷിക്കാന്‍ കഴിയാത്ത മുഖ്യമന്ത്രി എങ്ങനെയാണ് ജനങ്ങളുടെ ജീവനും സ്വത്തിനും സംരക്ഷണം നല്‍കുകയെന്ന് കേന്ദ്രമന്ത്രി വി.മുരളീധരന്‍ ചോദിച്ചിരുന്നു.

കേരളത്തിലെ ആഭ്യന്തര വകുപ്പ് സമ്പൂര്‍ണ പരാജയമാണെന്ന് ജനങ്ങള്‍ക്ക് ബോദ്ധ്യമായെന്നും അദ്ദേഹം പറഞ്ഞു.