ഗുരൂവായൂര്‍ ഒരുങ്ങി ... ഇന്ന് 248 വിവാഹങ്ങള്‍.... ക്ഷേത്രനടയില്‍ ഒരേസമയം അഞ്ചു കല്യാണങ്ങള്‍, ശീട്ടാക്കുന്ന എല്ലാവര്‍ക്കും കല്യാണം നടത്താനുള്ള എല്ലാ സജ്ജീകരണങ്ങളും പൂര്‍ത്തിയായതായും തിരക്കുകാരണം ആരേയും ഒഴിവാക്കില്ലെന്നും ദേവസ്വം ചെയര്‍മാന്‍.

ഈ വര്‍ഷത്തെ ഏറ്റവും കൂടുതല്‍ വിവാഹങ്ങള്‍ നടക്കുന്ന ദിവസവും ഇന്നാണ്. ചിങ്ങ മാസത്തിലെ പ്രധാന മുഹൂര്‍ത്തമാണ് ഇന്ന് എന്നതാണ് പ്രത്യേകത. പൊതുവെ വിവാഹത്തിന് ഏറ്റവും അനുയോജ്യമായാണ് ചിങ്ങമാസം കണക്കാക്കപ്പെടുന്നത്. കര്‍ക്കിടകം രാമായണ മാസവും പഞ്ഞമാസമായി കണക്കാക്കുന്നതിനാല്‍ വിവാഹങ്ങള്‍ അധികം നടക്കാറില്ല എന്നതാണ് വസ്തുത. ഇന്നത്തെ ദിവസം മാത്രമല്ല ചിങ്ങമാസം മുഴുവനും വിവാഹങ്ങളുടെ വന്‍ തിരക്കാണ് ക്ഷേത്രത്തില്‍ അനുഭവപ്പെടുക.

248 കല്യാണങ്ങള്‍ക്കാണ് ശീട്ടാക്കിയിട്ടുള്ളത്. ഞായറാഴ്ച രാവിലേയും ശീട്ടാക്കാമെന്നുള്ളതിനാല്‍ എണ്ണം കൂടിയേക്കും. ക്ഷേത്രനടയില്‍ ഒരേസമയം അഞ്ചു കല്യാണങ്ങള്‍ നടക്കും. ആദ്യമായാണ് ഇങ്ങനെയൊരു സജ്ജീകരണം ഏര്‍പ്പെടുത്തുന്നത്. ക്ഷേത്രത്തിനു മുന്നില്‍ ഒന്നാമത്തെ മണ്ഡപമായും കിഴക്കേ അറ്റത്ത് അഞ്ചാമത്തെ മണ്ഡപമായും രണ്ടെണ്ണം ഇന്നലെ വൈകീട്ട് സ്ഥാപിച്ചു.

താലികെട്ടിന്റെ ശീട്ടും ഓണ്‍ലൈനില്‍ ബുക്ക് ചെയ്തതിന്റെ പ്രിന്റും ഒത്തുനോക്കാന്‍ മേല്‍പ്പുത്തൂര്‍ ഓഡിറ്റോറിയത്തിന്റെ തൊട്ടു തെക്കായി പന്തല്‍ സജ്ജീകരിച്ചു.

വധൂവരന്മാരും ബന്ധുക്കളും താലികെട്ടിന് അരമണിക്കൂര്‍ മുമ്പ് അവിടെ എത്തണം. അവിടെനിന്ന് ടോക്കണ്‍ കൊടുക്കും. അതിനുശേഷം വധൂവരന്മാര്‍ മേല്‍പ്പുത്തൂര്‍ ഓഡിറ്റോറിയത്തില്‍ ഇരിക്കണം. ക്രമമനുസരിച്ച് ദേവസ്വം സുരക്ഷാ ഉദ്യോഗസ്ഥര്‍ മൈക്കില്‍ ടോക്കണ്‍ നമ്പറുകള്‍ വിളിക്കും. അതിനനുസരിച്ചാണ് മണ്ഡപത്തിലേക്ക് എത്തേണ്ടത്.

താലികെട്ടിനായി അഞ്ചു മണ്ഡപങ്ങളിലും കൂടുതല്‍ കോയ്മമാരെ നിയോഗിച്ചു. 28 സെക്യൂരിറ്റിക്കാര്‍ അധികമായി ഉണ്ടാകും. ചെറിയ പാര്‍ക്കിങ് കേന്ദ്രങ്ങള്‍ക്കു പുറമേ, പടിഞ്ഞാറേ നട മായാ സ്റ്റാന്‍ഡിലും തെക്കേ നട ദേവസ്വം സ്‌കൂള്‍ മൈതാനത്തും താത്കാലിക സൗകര്യമൊരുക്കി.
ദര്‍ശനത്തിനുള്ള വരി ഞായറാഴ്ച വടക്കേ നടയിലായിരിക്കും.

ക്ഷേത്രക്കുളത്തിനടുത്തുനിന്നും വരി ആരംഭിച്ച് കിഴക്കേനടയിലെ ക്യൂപന്തലിലേക്ക് ഭക്തരെ പ്രവേശിപ്പിക്കും. കിഴക്കേ നടപ്പന്തലിലെ തിരക്ക് കുറയ്ക്കാനാണിത്. ദീപസ്തംഭത്തിനു മുന്നില്‍ തൊഴാനായി തടസ്സമില്ല. അതിനുള്ള വരി മേല്‍പ്പുത്തൂര്‍ ഓഡിറ്റോറിയത്തിന്റെ വടക്ക് ചേര്‍ന്നായിരിക്കും. മാത്രവുമല്ല കല്യാണക്കാരും ദര്‍ശനത്തിനുള്ളവരും കൂടിച്ചേരുന്ന അവസ്ഥ ഒഴിവാകുകയും ചെയ്യാം.