പുറത്താക്കാതിരിക്കാന് ഗവര്ണറുടെ കാരണം കാണിക്കല് നോട്ടിസിന് പത്ത് വൈസ് ചാന്സലര്മാരും മറുപടി നല്കി
പുറത്താക്കാതിരിക്കാന് ഗവര്ണറുടെ കാരണം കാണിക്കല് നോട്ടിസിന് മറുപടി നല്കാനുള്ള സമയ പരിധി അവസാനിക്കുന്നതിന് തൊട്ടു മുന്പ് 10 വൈസ് ചാന്സലര്മാരും രാജ്ഭവന് മറുപടി കൈമാറി. അഞ്ചു മണിക്ക് തൊട്ടു മുന്പ് കണ്ണൂര് വിസി ഡോ. ഗോപിനാഥ് രവീന്ദ്രനാണ് അഭിഭാഷകന് മുഖേന മറുപടി നല്കിയത്. സാങ്കേതിക സര്വകലാശാല വിസി സുപ്രീം കോടതി വിധിയെ തുടര്ന്ന് സ്ഥാനം ഒഴിഞ്ഞതിനാല് മറുപടി നല്കിയില്ല.
സുപ്രീം കോടതി വിധിയെ തുടര്ന്ന് 11 വി.സി മാര്ക്കാണ് പിരിച്ചു വിടാതിരിക്കാന് കാരണമുണ്ടെങ്കില് വിശദീകരിക്കാന് ഗവര്ണര് ആവശ്യപ്പെട്ടത്. നേരിട്ട് വിശദീകരിക്കണമെന്ന് ആവശ്യപ്പെട്ടവര്ക്ക് സമയം അനുവദിക്കും. 11 വിസിമാരുടെ നിയമനം യു ജി സി ചട്ടം അനുസരിച്ചല്ല എന്ന് രാജ്ഭവന് കണ്ടെത്തിയിരുന്നു. വി.സിമാരുടെ ഹര്ജികള് ഇപ്പോള് ഹൈക്കോടതിയുടെ പരിഗണനയിലാണ്.
ഗവര്ണറുടെ നോട്ടീസിന് മലയാളം സര്വകലാശാല വൈസ് ചാന്സലര് ഡോ. അനില് വള്ളത്തോള് നേരത്തെ മറുപടി നല്കി. ഇന്നലെ തപാല് മാര്ഗമാണ് കത്തയച്ചതെന്ന് അനില് വള്ളത്തോള് കോഴിക്കോട് പറഞ്ഞു. രേവതി പട്ടത്താനത്തിന്റെ ഭാഗമായുള്ള കൃഷ്ണഗീതി പുരസ്കാരം ഏറ്റുവാങ്ങാന് എത്തിയപ്പോഴാണ് ഇക്കാര്യം അറിയിച്ചത്.
എന്നാല് പരസ്യ പ്രതികരണത്തിന് അദ്ദേഹം തയ്യാറായില്ല. അക്കാദമിക് മികവുകള് പരിഗണിക്കുമ്പോള് വി.സിയായിരിക്കാന് തനിക്ക് എല്ലാ വിധ യോഗ്യതയുമുണ്ടെന്നുള്ളതാണ് മറുപടി കത്തിലെ ഉള്ളടക്കമെന്നാണ് സൂചന. എന്നാല് ഉള്ളടക്കം വ്യക്തമാക്കാന് ആഗ്രഹിക്കുന്നില്ലെന്നും അനില് വള്ളത്തോള് പറഞ്ഞു.
https://www.facebook.com/Malayalivartha
